އާންމު ގަވާއިދުތަކާބެހޭ ޤާނޫނުގެ ދަށުން އެކުލަވާލަންޖެހޭ ޤާނޫނުތަކުގެ ތެރެއިން ކޮމިޓީތަކުގައި މިހާރުހުރި ފަސް ބިލެއްގެ މަސައްކަތް އަވަހަށް ނިންމަވާދެއްވުމަށް ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދު އެދިވަޑައިގަންނަވައިފިއެވެ.

ބުދަ ދުވަހުގެ ޖަލްސާގައި ވާހަކަދައްކަވަމުން ރައީސް ނަޝީދު ވިދާޅުވީ ގަވާއިދު ކޮމިޓީން އާންމު ގަވާއިދުތަކާ ބެހޭ ޤާނޫނުގެ ދަށުން އެކުލަވާލަންޖެހޭ ބިލްތަކުގެ ތެރެއިން ފަސް ބިލެއް ކޮމިޓީތަކުގައިވާކަމަށް އަންގާފައިވާކަމަށެވެ. ކޮމިޓީތަކުގައިވާ ފަސް ބިލަކީ ބިނާވެށި ޕްލޭންކުރުމާއި ހިންގުމުގެ ބިލް، ތަފާސް ހިސާބުގެ ބިލް، މޯލްޑިވްސް މަނިޓަރީ އޮތޯރިޓީގެ ޤާނޫނަށް އިސްލާހު ގެނައުމުގެ ބިލް، މަތީ ތައުލީމުގެ ބިލް އަދި މަދަނީ އިޖުރާޢަތުގެ ބިލެވެ.

ރައީސް ނަޝީދު ވިދާޅުވީ މިބިލްތަކުގެ މަސައްކަތް މެމްބަރުން ހޭލާތިއްބަވައިގެންވެސް ނިންމަވައި ދެއްވުމަށް އެދިވަޑައިގަންނަވާކަމަށެވެ.

އާންމު ގަވާއިދުތަކާ ބެހޭ ޤާނޫނުގެ ޖަދުވަލު 1 އަދި 2 ގައި ބަޔާންކޮށްފައިވާ ގަވާއިދުތަކަށް އަމަލުކުރުމުގެ މުއްދަތު 13 ވަނަ ފަހަރަށް ރައްޔިތުންގެ މަޖިލީހުން އިތުރުކޮށްފައިވަނީ މިދިޔަ އަހަރުގެ އެންމެ ފަހުގެ ޖަލްސާގައެވެ. މުއްދަތު އިތުރުކޮށްފައިވަނީ މިއަހަރުގެ ސެޕްޓެމްބަރ މަހާ ހަމައަށެވެ.

އެގަވާއިދުތަކަށް އަމަލުކުރުމުގެ މުއްދަތު އިތުރުކުރަމުން އައިސްފައިވާއިރު ބުދަ ދުވަހުގެ ޖަލްސާގައި ވާހަކަދައްކަވަމުން ރައީސް ނަޝީދު ވިދާޅުވީ މިގަވާއިދުތަކުގެ މުއްދަތު މިހާރު ހަމަވާން އޮތް މިއަހަރުގެ ސެޕްޓެމްބަރ މަހުގެ ފަހުން ދެން މުއްދަތު އިތުރުކުރުމަށް ގަސްތުނުކުރައްވާކަމަށެވެ.

އާންމު ގަވާއިދުތަކާ ބެހޭ ޤާނޫނަކީ މިހާރު އަމަލުކުރަމުން އަންނަ އައު ޤާނޫނު އަސާސީ އައުމާއެކު ކުރިން އަމަލުކުރަމުންދިޔަ ގަވާއިދުތަކަށް އަމަލުކުރުމުގެ ޤާނޫނީ ބާރެއް ދިނުމަށްޓަކައި އެކުލަވާލާފައިވާ ޤާނޫނެކެވެ. މި ޤާނޫނުގެ ދަށުން ހުރި ގަވާއިދުތަކަށް އަމަލުކުރަމުން އަންނާނީ އެގަވާއިދަކާ ގުޅުންހުރި ޤާނޫނެއް ވުޖޫދުވަންދެންނެވެ. އެގާނޫނެއް ވުޖޫދުވަންދެން އަމަލުކުރުމުގެ މުއްދަތު އަންނަނީ އިތުރުކުރަމުންނެވެ.