ރައްޔިތުންގެ މަޖިލީހުން ވަޒީރުންނަށާއި ސަރުކާރަށް ބިރު ދައްކަމުންދާކަމަށާއި ތަކުރާރުކޮށް ސަރުކާރުގެ ވަޒީރުންނަށް އެބޭފުޅުންގެ މަސްއޫލިއްޔަތު އަދާކުރުމަށް ހުރަސްއަޅާ ބިރު ދައްކަމުންދާކަމަށް ކުރީގެ ކޮމިޔުނިކޭޝަން މިނިސްޓަރ މުހައްމަދު މަލީހު ޖަމާލު ރައްޔިތުންގެ މަޖިލީހުގެ ޖަލްސާއެއްގައި ވިދާޅުވެފައިވާ މައްސަލަ އިތުރަށް ބެލުމަށް މަލީހު ކޮމިޓީއަށް ހާޒިރުކުރުމަށް އިމްތިޔާޒު އަދި ސުލޫކީ ކޮމިޓީން ނިންމައިފިއެވެ.

މަރޗް މަހުގެ 1 ވަނަ ދުވަހު ބޭއްވި މަލީހުގެ އިތުބާރު ނެތްކަމުގެ މައްސަލައިގެ ބަހުސްގައި މަލީހަށް ޖަވާބުދާރީވުމަށް ލިބިވަޑައިގެންނެވި ފުރުސަތުގައި ވާހަކަދައްކަވަމުން މަލީހު ވަނީ މަޖިލީހުން ކަނޑައެޅިގެން ވަޒީރުންނަށާއި ސަރުކާރަށް ބިރު ދައްކަމުންދާ ކަމަށާއި ތަކުރާރުކޮށް ސަރުކާރުގެ ވަޒީރުންނަށް އެބޭފުޅުންގެ މަސްއޫލިއްޔަތު އަދާކުރުމަށް ހުރަސް އަޅާ ބިރު ދައްކާކަމަށާއި އެގޮތުން ކުރީގެ ޖެންޑަރ މިނިސްޓަރ ޝިދާތާ ޝަރީފް އިސްތިއުފާދެއްވުމަށް މަޖުބޫރިކުރުވިކަމަށް ވިދާޅުވެފައެވެ.

މަލީހުގެ މިވާހަކަތަކަކީ ރައްޔިތުންގެ މަޖިލީހުގެ އިމްތިޔާޒުތަކާއި މަސައްކަތްތަކަށް އަދި ގަދަރަށް އުނިކަން ލިބޭފަދަ ވާހަކައަކަށްވާތީ އެކަން ބައްލަވައިދެއްވުމަށް އިމްތިޔާޒު އަދި ސުލޫކު ކޮމިޓީއަށް ހުށަހެޅުއްވީ ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދެވެ. ރައީސް ނަޝީދު އެކަމާ ގުޅިގެން ކޮމިޓީއަށް ފޮނުއްވި ސިޓީފުޅުގައި ވަނީ މަލީހުގެ މިވާހަކަފުޅަކީ ރައްޔިތުންގެ މަޖިލީހުގެ އިމްތިޔާޒުތަކާއި ބާރުތަކުގެ ޤާނޫނުގެ ދަށުން މަޖިލީހުގެ އިމްތިޔާޒުތަކާއި ގަދަރަށް އުނިކަން ލިބޭ ފަދަ ވާހަކަތަކެއްކަމުން އެކަން ކޮމިޓީން ބައްލަވައިދެއްވުމަށް އެދިވަޑައިގަންނަވާކަމަށެވެ.

އެހެންކަމުން މިމައްސަލަ ކޮމިޓީން ބެލުމަށްޓަކައި މިކަމުގައި މަލީހު ކޮމިޓީއަށް ހާޒިރުކޮށް މިފަދަ ތުހުމަތެއް ކުރަނީ ކޮން އަސާސެއްގެ މައްޗަށްތޯ ސާފުކުރުމަށް މަލީހު ކޮމިޓީއަށް ހާޒިރުކުރުމަށް ހުށަހެޅުއްވީ މަނަދޫ ދާއިރާގެ މެމްބަރ އަހުމަދު ހާރޫނެވެ. ހާރޫނުގެ މިހުށަހެޅުއްވުމަށް ތާއީދުކުރެއްވީ ގަމު ދާއިރާގެ މެމްބަރ މުހައްމަދު ވިސާމެވެ.

އެހެންކަމުން އަންގާރަ ދުވަހުގެ ކޮމިޓީ ބައްދަލުވުން މުގައްރިރު ނިންމަވާލެއްވީ މި މައްސަލަ އިތުރަށް ކުރިޔަށް ގެންދިޔުމަށް މަލީހު ކޮމިޓީއަށް ހާޒިރުކޮށް މަލީހުގެ ބަހެއް މިކަމުގައި ހޯދުމަށެވެ.

މިމައްސަލާގައި ކޮމިޓީން ބަލަނީ ރައްޔިތުންގެ މަޖިލީހުގެ އިމްތިޔާޒުތަކާއި ބާރުތަކުގެ ޤާނޫނުގެ 4 ވަނަ މާއްދާގެ 7 ގައި ބުނާ މުޅި މަޖިލީހަށް ނުވަތަ ކޮމިޓީއަށް ގަސްތުގައި ކަމެއް އޮޅުވާލުމެވެ. އެ ޤާނޫނުގެ 4 ވަނަ މާއްދާގައި ބަޔާންވެގެންވަނީ އިމްތިޔާޒަށް އުނިކަން ލިބޭ ފަދަ އަމަލުތަކެވެ.

މަލީހުގެ އިތުބާރުނެތްކަމުގެ މައްސަލަ މަޖިލީހުގައި ކުރިޔަށްދިޔަ ދުވަހު މިނިސްޓަރަށް ޖަވާބުދާރީވުމަށް ލިބިވަޑައިގެންނެވި ފުރުސަތުގައި ވަނީ ވަރަށް ބޮޑަށް މަޖިލީސް ހިނގާގޮތަށް ފާޑުވިދާޅުވެ ވާހަކަދައްކަވާފައެވެ. އަދި ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދު މަޖިލިސް ކުރިޔަށްގެންދަވަނީ ޚުދުމުހުތާރުކޮށްކަމަށް ވެސް ވަނީ ވިދާޅުވެފައެވެ.

އިތުބާރުނެތްކަމަށް ފާސްވެ މަލީހުގެ މަގާމު ގެއްލުމަށްފަހު މަލީހު ގެންދަވަނީ ރައްޔިތުންގެ މަޖިލީހުން ކުރަމުންދާ މަސައްކަތްތަކަށް ވަރަށް ބޮޑަށް ފާޑުވިދާޅުވަމުންނެވެ. އަދި އިދިކޮޅު ކޯލިޝަނުން ލޯކަލް ކައުންސިލް އިންތިޚާބަށް ކުރަމުންދާ ކެމްޕެއިންގައި މަލީހުވަނީ ބައިވެރިވެ ވަޑައިގަންނަވާފައެވެ.