ދިވެހިރާއްޖޭގެ ކަނޑުގެ ސަރަހައްދުގައި ދާ އަޅައިގެން މަސްވެރިކަން ކުރާ ރާއްޖެއިން ބޭރުގެ ބޯޓު ފަހަރުތައް މިދުވަސްވަރު އިންތިހާއަށް ގިނައިން ފެންނަމުންދާތީވެ މިކަމަށް ވަގުތުން ފިޔަވަޅުއަޅައި ރާއްޖޭގެ އިގްތިޞާދީ ސަރަހައްދު ބެލެހެއްޓުމަށް އިތުރަށް ސަމާލުކަން ދިނުމަށް ސަރުކާރަށް ގޮވާލައި ހުށަހެޅި ކުއްލި މައްސަލަ ބޭރުކޮށްލައިފިއެވެ.

މި މައްސަލަ މަޖިލީހަށް ހުށަހެޅުއްވީ މަހިބަދޫ ދާއިރާގެ ޕީޕީއެމް މެމްބަރ އަހުމަދު ތާރިގެވެ. މައްސަލަ ހުށަހަޅުއްވަމުން ތާރިގް ވިދާޅުވީ ރާއްޖޭގެ ކަނޑުގެ ސަރަހައްދުން މިދުވަސްވަރު ދާ އަޅައިގެން މަސްވެރިކަންކުރާ ރާއްޖެއިން ބޭރުގެ ބޯޓުފަހަރު ގިނަ އަދަދަކަށް ފެންނަމުންދާކަމުގެ މައުލޫމާތު މަސްވެރިން ދެމުންދާތީ އާއި އުތުރުގެ އަތޮޅުތަކާ ދިމާއިން ފެންނަ ބޯޓު ފަހަރު އިތުރުވެ މަސްވެރިކަމަށް އިންތިހާއަށް އަސަރުކުރަމުންދާ ކަމަށެވެ. އަދި ދާ އަޅައިގެން ރާއްޖޭގެ އިގްތިޞާދީ ސަރަހައްދުގައި މަސްވެރިކަން ކުރުމަކީ ޤާނޫނާ ޚިލާފުކަމަށްވާއިރު ރާއްޖެއިން ބޭރުން މިފަދަ ބޯޓުތަކާމެދު އިތުރަށް ފަރުވާތެރިވެ ރާއްޖޭގެ އިގްތިޞާދީ ސަރަހައްދު ބެލެހެއްޓުމަށް އިތުރަށް ޚާއްސަ ސަމާލުކަމެއް ދިނުމަށް ސަރުކާރަށް ގޮވާލައްވާކަމަށެވެ.

މީގެއިތުރުން ނިމިގެންދިޔަ ފެބްރުއަރީ މަހުގެ 24 ވަނަ ދުވަހު ނ އަތޮޅުން 30 މޭލު ބޭރުން ކަންނެލި މަސްވެރިކަން ކުރާ 2 ދޯންޏަކުން ރިޕޯޓްކޮށް އަދި ދިވެހި ސިފައިން އަންނަންދެން އެބޯޓަށް ފާރަވެރިވެ، އެންމެ ފަހުން ރާއްޖޭގެ ކޯސްޓްގާޑުން ހިފަހައްޓާފައިވާ ރާއްޖޭގެ ސަރަހައްދުގައި ދާ އެޅުމުގެ މަސްވެރިކަން ކުރަމުންދިޔަ ބޯޓާ މެދު އެއްވެސް ފިޔަވަޅެއް އެޅުމެއްނެތި ދޫކޮށްލުމަށް ސަރުކާރުން ނިންމާފައިވާކަމުގެ މައުލޫމާތު ލިބިފައިވާކަމަށް ތާރިގް ވިދާޅުވިއެވެ. އަދި އޭގައި ތިބި މީހުންނަށް ދައުވާ ނުކުރުމަށް ޕީޖީ ނިންމާފައިވާކަމަށް ފުލުހުންނާ ހަވާލާދީ މީޑިޔާތަކުން ރިޕޯޓްކޮށްފައިވާކަމަށް ވެސް ތާރިގް ވިދާޅުވިއެވެ.

މަސްވެރިންގެ އެތައް ވަގުތާއި މަސައްކަތުން މިފަދަ ބޯޓުފަހަރު ހިފަހައްޓައި ރިޕޯޓްކުރަމުންދާއިރު ރާއްޖޭގެ ސަރަހައްދުން އަތުލައިގަންނަ ދާއަޅާ މަސްބޯޓުތަކަށް އެއްވެސް ފިޔަވަޅެއް ނާޅާއި، ރާއްޖޭގެ ޤާނޫނުތަކާއި ޚިލާފަށް ދާއެޅުމުގެ މަސައްކަތްކުރި މީހުންނާމެދު ދައުވާ ކުރުމެއްނެތި ދޫކޮށްލުމަކީ އެފަދަ ބޯޓުތަކާއި މީހުންނަށް ލިބޭ އިތުރު ފުރުސަތަކަށްވެ ރާއްޖޭގެ މަސްވެރިކަމުގެ ސިނާއަތަށް ނުހަނު ގެއްލުން ލިބޭކަމަކަށްވާތީވެ އަދި މިފަދަ ބޯޓުތަކަށް ފިޔަވަޅު ނޭޅުމަކީ ސަރުކާރުން މަސްވެރިކަމުގެ ސިނާއަތާމެދު ވެވޭ އިހުމާލެއްކަމަށް ދެކި 24 ފެބްރުއަރީގައި ސިފައިންގެ ބެލުމުގެ ދަށަށް ގެނެވުނު ދާ އަޅާ ބޯޓާމެދު ޤާނޫނާއި ގަވާއިދުތަކުން އެޅެން ހުރި ފިޔަވަޅުތައް ވަގުތުން އެޅުމަށް ގޮވާލާ މި ކުއްލި މައްސަލަ ހުށަހަޅުއްވާކަމަށް ތާރިގް ވިދާޅުވިއެވެ.

މިމައްސަލަ ބަލައިގަތުމަށް ނެގުނު ވޯޓުގައި ބައިވެރިވެވަޑައިގެންނެވި މެމްބަރުންގެ ތެރެއިން މިމައްސަލަ ބަލައިގަތުމަށް ފެންނަކަމަށް ވޯޓު ދެއްވީ 10 މެމްބަރުންނެވެ. މައްސަލަ ބަލައިގަންނަން ނުފެންނަކަމަށް 26 މެމްބަރުން ވޯޓު ދެއްވިއެވެ.

މިމައްސަލަ ބަލައިގަންނަން ނުފެންނަކަމަށް ފާސްވުމުން މިކުއްލި މައްސަލައަށް ބަހުސްކޮށްފައެއްނުވެއެވެ.