ރައްޔިތުންގެ މަޖިލީހުގެ ބައެއް މެމްބަރުން ސަލާން ނުފޮނުއްވާ އަދި ކަރަންޓީނުގެ ހާލަތުގައި ނޫނަސް ޖަލްސާތަކަށް ވަޑައިނުގަންނަވާ ތިއްބަވާތީ ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދު ކަންބޮޑުވުން ފާޅުކުރައްވައިފިއެވެ.

އަންގާރަ ދުވަހުގެ ޖަލްސާ ފައްޓަވަމުން ރިޔާސަތުން ވަނީ ޖަލްސާއަށް ވަޑައިގެންތިއްބެވި މެމްބަރުންގެ އަދަދާއި ސަލާމުގައި ތިއްބެވި މެމްބަރުންގެ އަދަދު އަދި ކަރަންޓީނުގައި ތިއްބެވި މެމްބަރުންގެ އަދަދު ހާމަކުރައްވާފައެވެ. ކޮންމެ ދުވަހެއްގެ ޖަލްސާ ފައްޓަވަމުން ވެސް ރިޔާސަތުން ޖަލްސާގެ ހާޒިރީ ވިދާޅުވެދެއްވައެވެ.

އަންގާރަ ދުވަހުގެ ޖަލްސާ ފެއްޓެވިއިރު 33 މެމްބަރުން ޖަލްސާގައި ތިއްބެވިއިރު 6 މެމްބަރުން ތިއްބެވީ ސަލާމުގައެވެ. އަދި ކަރަންޓީނުގައި 2 މެމްބަރުން ތިއްބެވިއެވެ. ހޯމަ ދުވަހުގެ ޖަލްސާގައި ވެސް 6 މެމްބަރުން ސަލާމުގައި ތިއްބެވި ކަމަށް މަޖިލީހުގެ ރައީސް ވިދާޅުވިއެވެ.

މިިދިޔަ ހަފްތާގެ ޖަލްސާތަކަށް ބަލާލާއިރު މިދިޔަ ހަފްތާގެ ހޯމަ ދުވަހު 5 މެމްބަރުން ސަލާމުގައި ތިއްބެވިއިރު އަންގާރަ ދުވަހު 4 މެމްބަރުން އަދި ބުދަ ދުވަހު 6 މެމްބަރުން ތިއްބެވީ ސަލާމުގައެވެ.

އަންގާރަ ދުވަހުގެ ޖަލްސާގައި ހާޒިރީ ވިދާޅުވެދެއްވުމަށްފަހު ރައީސް ނަޝީދު ވިދާޅުވީ ކެނދިކުޅުދޫ ދާއިރާގެ މެމްބަރ އަހުމަދު އީސާ ޖަލްސާތަކަށް ވަޑައިނުގަންނަވާ އަދި ސަލާން ނުފޮނުއްވާ ހުންނަވާ ސަބަބާމެދު ކަންބޮޑުވެވަޑައިގަންނަވާކަމަށެވެ.

މެމްބަރުން ވަކި މުއްދަތެއްނެތް ގޮތަށް ސަލާމުގައި ތިއްބަވާތީ އެކަމުގެ ކަންބޮޑުވުން މީގެކުރިން ވެސް ރައީސް ނަޝީދު ވަނީ ފާޅުކުރައްވާފައެވެ.

މިކަމުގައި އާންމުންގެ ކަންބޮޑުވުންތަކެއް ހުރިއިރު މަޖިލީހުގެ ގަވާއިދުގައި މެމްބަރުންނަށް ސަލާމުގައި ތިއްބެވޭނެ ވަކި މުއްދަތެއް ހާމަކޮށްފައެއް ނޯވެއެވެ.

މެމްބަރުންގެ ހާޒިރީގެ މައްސަލައަށް ކޮންމެވެސް ވަރެއްގެ ހައްލެއް ގެނައުމަށްޓަކައި މިހާރު އަމަލުކުރަމުންދާ މަޖިލީހުގެ ގަވާއިދުގައި ވަނީ ސަލާމާއި ޗުއްޓީގައި ތިބޭ މެންބަރުން ފިޔަވައި، އެ މަހެއްގެ ތެރޭގައި ބޭއްވޭ ޖަލްސާތަކުގެ ދެބައިކުޅަ އެއްބައި ޖަލްސާތަކަށް މެމްބަރަކު ހާޒިރުނުވެއްޖެނަމަ އެ މެމްބަރެއްގެ މުސާރައިން 50 އިންސައްތައަށްވާ މިންވަރު ކަނޑަން ޖެހޭނެކަމަށެވެ.