ދިވެހިރާއްޖޭގެ ނުކުޅެދުންތެރިކަން ހުންނަ މީހުންގެ ހައްގުތައް ރައްކާތެރިކުރުމާއި ހިމާޔަތްކުރުމަށްޓަކައި ރާއްޖެއިން ސޮއިކޮށްފައިވާ ބައިނަލްއަގްވާމީ މުއާހަދާތަކާއި ރާއްޖޭގައި ތަންފީޒުކުރަންޖެހޭ ޤާނޫނުތަކާއި ގަވާއިދުތަކާއި ސިޔާސަތުތަކާއި އުސޫލުތައް ތަންފީޒުކުރުން މިހާރަށްވުރެ ހަރުދަނާކުރުމަށް ސަރުކާރުން ޚާއްސަ ސަމާލުކަމެއް ދިނުމަށް އިލްތިމާސްކޮށް ގޮވާލާ ހުށަހެޅި ގަރާރު ބަލައިގަނެ އިތުރަށް ދިރާސާކުރުމަށް ހިޔުމަން ރައިޓްސް އެންޑް ޖެންޑަރ ކޮމިޓީއަށް ފޮނުވައިފިއެވެ.

މި ގަރާރު ބަލައިގަތުމަށް ފާސްވެފައިވަނީ ގަރާރު ބަލައިގަތުމަށް ނެގުނު ވޯޓުގައި ބައިވެރިވެވަޑައިގެންނެވި 48 މެމްބަރުންގެ އިއްތިފާގުންނެވެ.

މިގަރާރު މަޖިލީހަށް ހުށަހަޅުއްވާފައިވަނީ މަޑުއްވަރީ ދާއިރާގެ ޕީއެންސީ މެމްބަރ އާދަމް ޝަރީފެވެ.

ގަރާރު ހުށަހަޅުއްވަމުން އާދަމް ޝަރީފް ވިދާޅުވީ ދިވެހިރާއްޖެއަކީ ނުކުޅެދުންތެރިކަން ހުންނަ މީހުންނާއި ކުދިންގެ ހައްގުތައް ރައްކާތެރިކުރުމަށްޓަކައި އެކުލަވާލާފައިވާ ބައިނަލްއަގްވާމީ މުއާހަދާ "ކޮންވެންޝަން އޮން ދަ ރައިޓްސް އޮފް ޕަރސަންސް ވިތު ޑިސްއެބިލިޓީ" ގައި ސޮއިކޮށްފައިވާ ގައުމެކެވެ. އަދި ނުކުޅެދުންތެރިކަން ހުންނަ މީހުންގެ ހައްގުތައް ރައްކާތެރިކުރުމާއި މާލީ އެހީތެރިކަން ފޯރުކޮށްދިނުމުގެ ޤާނޫނު ތަންފީޒުކުރަން ފަށާފައިވާ ގައުމެއްކަމަށް ވެސް ވިދާޅުވިއެވެ.

ރާއްޖޭގައި މާލީ އެހީތެރިކަން ލިބޭ ނުކުޅެދުންތެރިކަން ހުރި 9500 މީހުންނާއި ކުދިންގެ ހައްގުތައް ރައްކާތެރިކުރުމާއި މާލީ އެހީތެރިކަން ފޯރުކޮށްދިނުމުގެ ޤާނޫނުން ރައްކާތެރިކުރަންޖެހޭ ހައްގުތަކާއި ދައުލަތުން އަދާކުރަންޖެހޭ ޒިންމާތަކަކީ ދިވެހި އެތައް އާއިލާއެއް ބަރޯސާވަމުންދާ ކަމެއްކަމަށް ޝަރީފް ވިދާޅުވިއެވެ.

މީގެއިތުރުން މި ޤާނޫނުން ލާޒިމުކުރާ ބައެއް ކަންކަން އެންމެ އެދެވޭގޮތުގައި ކުރެވިފައި ނެތުމުގެ ސަބަބުން ނުކުޅެދުންތެރިކަން ހުންނަ މީހުންގެ ހައްގުތައް ރައްކާތެރި ނުކުރެވުމާއި އެފަދަ މީހުންގެ އާއިލާތަކުން ބަރުދާސްތުކުރަންޖެހޭ ދަތިތަކާއި ވޭންތަކާއި ގޮންޖެހުންތަކާއި ޚިޔާލަށް ވެސް ނުގެނެވޭފަދަ އެތައް ކަމަކުން އެމީހުންގެ ހައްގުތައް ގެއްލިގެން ދިޔުމާއި ނިގުޅައިގަތުން މުޖުތަމައުގައި އިތުރަށް ހަވާސާވަމުންދާކަމަށް އާދަމް ޝަރީފް ވިދާޅުވިއެވެ.

ޝަރީފް ވިދާޅުވީ ނުކުޅެދުންތެރިކަން ހުންނަ މީހުންނާއި ކުދިންނަށް ސިއްހީ އެހީތެރިކަން ލިބޭނެ ޚާއްސަ ނިޒާމެއް ނެތުމާއި މުޖުތަމައު ބައިވެރިވާ ރިހެބިލިޓޭޝަން ޕްރޮގްރާމެއް ނެތުމާއި އެފަދަ މީހުންނަށް މުޖުތަމައުގައި ބައިވެރިވެގެން އުޅެވޭނެ ނިޒާމެއް ނެތުމާއި ނުކުޅެދުންތެރިކަން ހުންނަކަން އެންމެ ޅަފަތުގައި ދެނެނުގަނެވުމާއި އެކަން އެނގޭ ހިސާބުން އެފަދަ ކުދިންނަށާއި އާއިލާތަކަށް ބޭނުންވާ ނަފުސާނީ އެހީތެރިކަން ދެވޭނެ ނިޒާމެއް އެފަދަ ކުދީންނަށް މަދަރުސީ ތައުލީމާއި މަތީ ތައުލީމާއި މަސައްކަތްތެރިކަމާބެހޭ ތައުލީމާއި ދިރިއުޅުމަށް ބޭނުންވާ ހުނަރުތައް ދަސްކޮށްދިނުމަށް ޤާނޫނުން ލާޒިމުކުރާ ކަންކަން އެންމެ އެދެވޭގޮތުގައި ފޯރުކޮށްދެވެމުންނުދާ ކަމަށެވެ.

މިގަރާރަށް ބަހުސްކުރައްވަމުން ހުރިހާ މެމްބަރުން ވެސް ވަނީ ނުކުޅެދުންތެރިކަން ހުންނަ މީހުންނަށް ދޭންޖެހޭ ރައްކާތެރިކަމާއި ޚިދުމަތްތައް ދޭންޖެހޭކަމަށް ވިދާޅުވެ ގަރާރަށް ތާއީދުކުރައްވާކަމަށް ވިދާޅުވެފައެވެ. އަދި މިހާރަށްވުރެ ބޮޑަށް އެހީތެރިކަން ފޯރުކޮށްދޭންޖެހޭކަން މެމްބަރުން ފާހަގަކުރެއްވިއެވެ.