ރާއްޖޭގައި ކުށް މަދުކޮށް، ޖިނާޢީ އަދުލުގެ ކަންކަން ހަރުދަނާކުރުމާއި ގުޅޭގޮތުން ޔޫއެންއޯޑީސީއާއެކު މަޝްވަރާކޮށްފި

ރާއްޖޭގައި ކުށް މަދުކޮށް، ޖިނާޢީ އަދުލުގެ ކަންކަން ހަރުދަނާކުރުމާ ގުޅޭގޮތުން ޔޫއެންއޯޑީސީއާއެކު މަޝްވަރާކޮށްފިއެވެ.

މި މަޝްވަރާކުރައްވާފައިވަނީ، މިނިސްޓަރ އޮފް ހޯމް އެފެއަޒް ޝެއިޚް އިމްރާން އަބްދުﷲ އިސްވެ ހުންނަވާ 14 ވަނަ ޔުނައިޓެޑް ނޭޝަންސް ކޮންގްރެސް އޮން ކްރައިމް ޕްރިވެންޝަން އެންޑް ކްރިމިނަލް ޖަސްޓިސްގެ ހަވާސާގައި ޔޫއެންއޯޑީސީގެ އެކްޒެކެޓިވް ޑިރެކްޓަރ ގަދަ ފަތި ވަލީއާކު ބޭއްވި ބައްދަލުކުރެއްވުމުގައެވެ. މި ބައްދަލުވުމުގައި ކުށް މަދު މުޖުތަމަޢުއެއް ބިނާކުރުމަށް ކުރެވޭނެ މަސައްކަތްތަކާއި މިކަމުގައި ޔޫއެންއޯޑީސީން ފޯރުކޮށްދެވިދާނެ އެހީތަކާ ގުޅޭގޮތުން ފުޅާދާއިރާއެއްގައި ވަނީ މަޝްވަރާކޮށްފައެވެ. މީގެ އިތުރުން ރާއްޖޭގައި ކްރިމިނަލް ޖަސްޓިސް ނުވަތަ ޖިނާޢީ އަދުލުގެ ކަންކަން ހަރުދަނާކުރުމަށް ޔޫއެންއޯޑީސީ ފޯރުކޮށްދެވިދާނެ އެހީތަކާ ގުޅޭގޮތުންވެސް ވަނީ މަޝްވަރާކޮށްފައެވެ.

މި ބައްދަލުވުމުގައި ވާހަކަފުޅުދައްކަވަމުން ރާއްޖޭގެ ހޯމް މިނިސްޓަރ ޝެއިޚް އިމްރާން އަބްދުﷲ ވަނީ ޔޫއެންއޯޑީސީން މިހާތަނަށް ފޯރުކޮށްދިން އެހީއަށް ޝުކުރުއަދާކުރައްވާފައެވެ. އެގޮތުން ހޯމް މިނިސްޓްރީއާއި ޔޫއެންއޯޑީސީ ގުޅިގެން ރާއްޖޭގެ ޖަލުތަކުގެ ޙާލަތު ރަނގަޅުކޮށް އިންތިޒާމުތައް ހަރުދަނާކުރުމާއި، މެރިޓައިމް ސެކިއުރިޓީ އަދި ޓެރަރިޒަމްއާއި ދެކޮޅަށް ގިނަ މަސައްކަތްތަކެއް ކޮށްފައިވާކަމަށް މިނިސްޓަރ އިމްރާން ފާހަގަކުރެއްވިއެވެ.

14 ވަނަ ޔުނައިޓެޑް ނޭޝަންސް ކޮންގްރެސް އޮން ކްރައިމް ޕްރިވެންޝަން އެންޑް ކްރިމިނަލް ޖަސްޓިސްގެ ހަވާސާގައި ޔޫއެންއޯޑީސީގެ އެކްޒެކެޓިވް ޑިރެކްޓަރގެ އިތުރުން ރާއްޖޭގެ ވަފުދުން ވަނީ، ޖަޕާނުގެ ޖަސްޓިސް މިނިސްޓަރ ޔޯކޯ ކަމި ކަވާއާއި، ސިންގަޕޫރުގެ މިނިސްޓަރ އޮފް މެއިން ޕަވަރ އެންޑް ސެކަންޑް މިނިސްޓަރ ފޯރ ހޯމް އެފެއާޒްސް ޖޯސެފީން ޓިއޯއާއި ބައްދަލުކުރައްވާފައެވެ.

14 ވަނަ ޔުނައިޓެޑް ނޭޝަންސް ކޮންގްރެސް އޮން ކްރައިމް ޕްރިވެންޝަން އެންޑް ކްރިމިނަލް ޖަސްޓިސްގައި ބައިވެރިވުމަށް ޖަޕާނުގެ ކްޔޯޓޯއަށް ރާއްޖޭގެ ވަފުދު ފުރާފައިވަނީ 5 މާރޗް ވީ ހުކުރު ދުވަހުއެވެ. މި ވަފުދުގައި މިނިސްޓަރ އޮފް ހޯމް އެފެއަޒް ޝެއިޚް އިމްރާން އަބްދުﷲ އިސްވެ ހުންނެވިއިރު، ކޮމިޝަނަރ އޮފް ޕޮލިސް މުޙައްމަދު ޙަމީދާއި، ހޯމް މިނިސްޓްރީގެ ސްޓޭޓް މިނިސްޓަރުންކަމުގައިވާ އަލީ ނަޒީރުގެ އިތުރުން މުހައްމަދު މާހިރު އީސާ ބައިވެރިވެވަޑައިގެންނެވިއެވެ.

14 ވަނަ ޔުނައިޓެޑް ނޭޝަންސް ކޮންގްރެސް އޮން ކްރައިމް ޕްރިވެންޝަން އެންޑް ކްރިމިނަލް ޖަސްޓިސްގައި މެމްބަރު ހުރިހާ ޤައުމަކުން ޑިކްލެރޭޝަން އޮން ކްރައިމް ޕްރިވެންޝަންއަށް އަމަލުކުރުމަށް އެއްބަސްވެފައެވެ. ކުށް މަދު އަމާން މާޙައުލެއް ކޮންމެ ޤައުމެއްގައިވެސް ޤާއިމުކުރުމަށް ކްރައިމް ކޮންގްރެސުން އެކުލަވާލި ކްޔޯޓޯ ޑިކްލެރޭޝަން ނުވަތަ ޑިކްލެރޭޝަން އޮން ކްރައިމް ޕްރިވެންޝަންއަށް ރާއްޖެއިން ވަނީ މަރުހަބާ ކިޔާފައެވެ.