ގުރުއާނުގައިވާ ސޫރަތެއްގެ ނަން މޮސްޓާއަށް އޮޅިއްޖެ، ބޭނުންގޮތަކަށް ގުރުއާން ބޭނުންނުކުރުމަށް ނަޝީދުގެ އިލްތިމާސް
ގުރުއާނުގެ އާޔަތްތައް ނުކިޔުމަށް އިލްތިމާސްކުރައްވަނީ ގޯސްކޮށް ކިޔުއްވާތީކަމަށް ރައީސް ނަޝީދު ވިދާޅުވި
ނޮޅިވަރަމް ދާއިރާގެ މެމްބަރ މުހައްމަދު ނަޝީދު އަދި ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދު
ކީރިތި ގުރުއާނުގައިވާ ސޫރަތެއްގެ ނަން ނޮޅިވަރަމް ދާއިރާގެ މެމްބަރ މުހައްމަދު ނަޝީދު އަބްދުﷲ އަށް އޮޅިވަޑައިގަތުމުން ގުރުއާން ބޭނުންގޮތަކަށް ބޭނުންނުކުރުމަށް ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދު އިލްތިމާސްކުރައްވައިފިއެވެ.
ރައްޔިތުންގެ މަޖިލީހުގެ ހޯމަ ދުވަހުގެ ޖަލްސާގައި ފަރެސްމާތޮޑާ ދާއިރާގެ މެމްބަރ ހުސައިން މުހައްމަދު ލަތީފު ހުށަހެޅުއްވި މައްސަލައަށް ބަހުސްކުރައްވަމުން ރައްޔިތުންގެ މަޖިލީހުގެ ރައީސްއަށް މުޚާތަބުކުރައްވައި އިއްޒަތްތެރި ރައީސް ވިދާޅުނުވުމުން މެމްބަރަކު ނިޒާމީ މައްސަލަ ނަންގަވައި އެކަން ވަނީ ރިޔާސަތުގެ ސަމާލުކަމަށް ގެނެސްފައެވެ. އެއީ މަޖިލީހުގެ ގަވާއިދާ ޚިލާފުކަމެއްކަމަށް ވިދާޅުވެ ރިޔާސަތުން އެކަން އިސްލާހުކުރަން ޖެހޭކަމަށް މެމްބަރު ވިދާޅުވުމުން ރައީސް ނަޝީދު ވަނީ ރައީސާ މުޚާތަބުކުރައްވާއިރު މެމްބަރުން އިއްޒަތްތެރި ރައީސް ބޭނުންކުރަންޖެހޭނެ ކަމަށް ވިދާޅުވެފައެވެ.
މިއާއެކު ނޮޅިވަރަމް ދާއިރާގެ މެމްބަރ ނަޝީދު ވަނީ ގުރުއާނުގެ އާޔަތެއްގެ މާނަ ވިދާޅުވެފައެވެ.
މިއާއެކު ރައީސް ނަޝީދު ވަނީ ނަޝީދުގެ ވާހަކަފުޅު ހުއްޓުވައި ގުރުއާނުގެ އާޔަތްތައް ބޭނުންނުކުރުމަށް އިލްތިމާސްކުރައްވާފައެވެ. އަދި އެގޮތަށް އިލްތިމާސްކުރައްވަނީ ގޯސްކޮށް ކިޔުއްވާތީކަމަށް ނަޝީދު ވިދާޅުވިއެވެ.
ރައީސް ނަޝީދު މިމޭރުމުން ވާހަކަދެއްކެވުމުން ނަޝީދު ވަނީ ގުރުއާނުގެ އަޑު ޖެހުނީމާ ޝައިޠާނާއަށް ވަރަށް ބޮޑަށް އުނދަގޫވާނެކަމަށް ވިދާޅުވެފައެވެ.
"އަޑުއަހަންވެސް އުނދަގޫވާނެ. ގުރުއާނުގެ ވާހަކަ ދެއްކީމާ ބޮލަށް އެނބުރުން އަރާގޮތް ޝައިޠާނާއަށް ވާނެ، އެހެންވީމާ އެކަން ހަޖަމުނުވެގެން ތިއުޅެނީ. އެހެންވީމާ އަދިވެސް އެއްފަހަރު މަޖިލީހުގެ ރައީސަށް". މެމްބަރު ނަޝީދު ވިދާޅުވިއެވެ.
މެމްބަރު މި މޭރުމުން ވާހަކަދެއްކެވުމުން މެމްބަރަކު ވަނީ ނިޒާމީ މައްސަލައެއް ނަންގަވައި ބޭއަދަބީކޮށް ވާހަކަދައްކަނީ ކަމަށް ވިދާޅުވެފައެވެ.
އަނެއްކާވެސް މެމްބަރު ނަޝީދަށް ވާހަކަދެއްކެވުމުގެ ފުރުސަތު ލިބިވަޑައިގެންނެވުމުން ނަޝީދު ވަނީ އަނެއްކާވެސް އާޔަތް ގޫގުލްކޮށްގެން ބަލައިލެވޭނެ ކަމަށް ވިދާޅުވެ ސޫރަތުގެ ނަން ދެވަނަ ފަހަރަށް ވެސް ގޯސްކޮށް ވިދާޅުވެފައެވެ.
މިއާއެކު އަނެއްކާވެސް ރިޔާސަތުގައި އިންނެވި މަޖިލީހުގެ ރައީސް، މެމްބަރު ނަޝީދުގެ ވާހަކަފުޅު ހުއްޓުވާލައްވައި ދައްކަވާ ވާހަކަ ރަނގަޅުކޮށްދޭންޖެހޭ ކަމަށް ވިދާޅުވިއެވެ.
އެއަށްފަހު މެމްބަރު ވާހަކަދެއްކެވުމަށް ފުރުސަތު ދެއްވުމުން ނަޝީދު ވަނީ އެއާޔަތް މަޖިލީހުގައި ޖެއްސެވުމަށް މަސައްކަތްކުރައްވާފައެވެ. ނަމަވެސް އެކަން ނުކުރެއްވި އުޅެނިކޮށް މެމްބަރަށް ކަނޑައެޅިފައިވާ ވަގުތު ހަމަވުމުގެ ސަބަބުން އިށީންދެ ވަޑައިގަންނަވަން ޖެހިވަޑައިގަތީއެވެ.
އެއަށްފަހު އެދަންފަޅިއަށް މަޖިލިސް މެދުކަނޑާލައްވާކަން ހާމަކުރައްވާ ވާހަކަދައްކަވަމުން ރައީސް ނަޝީދު ވަނީ މެމްބަރު ގޯސްކޮށް ކިޔުއްވި ސޫރަތް ރަނގަޅުކޮށްދެއްވާފައެވެ. އެގޮތުން އެސޫރަތަށް ކިޔަނީ މުނާފިގް ސޫރަތް ނޫންކަމަށާއި މުނާފިގޫން ސޫރަތްކަމަށް ރައީސް ނަޝީދު ވިދާޅުވިއެވެ.
ރައީސް ނަޝީދު ވަނީ މީގެކުރިން ވެސް މަޖިލީހުގައި ގުރުއާނުގެ އާޔަތްތައް ނުކިޔުމަށް އެދިވަޑައިގަންނަވާފައެވެ. އެކަމާ ގުޅޭގޮތުން މިދިޔަ އަހަރުގެ ޖަލްސާތައް ނިންމާލުމަށްފަހު ބޭއްވި "އާސްކް ސްޕީކަރ" ޕްރޮގްރާމްގައި މީހަކު ކުރި ސުވާލަށް ޖަވާބު ދެއްވަމުން ރައީސް ނަޝީދު ވިދާޅުވީ ރައްޔިތުންގެ މަޖިލީހުގައި ކީރިތި ގުރުއާނުގެ އާޔަތްތައް ވިދާޅުވާން ފުރުސަތު ނުދެނީ، ގުރުއާނުގެ އާޔަތްތައް ސިޔާސީ ހަތިޔާރަކަށް ހެދުމުގެ ފުރުސަތު އެއްވެސް ގޮތަކުން ދޭން ބޭނުންފުޅު ނުވާތީކަމަށެވެ.
