ބޭއަދަބީ ބަސް ބޭނުންކުރެއްވުމުން މޮސްޓާއަށް ލިޔުމުން ނަސޭހަތްތެރިވެއްޖެ
ރައްޔިތުންގެ މަޖިލީހުގެ ރަސްމީ ވަޓްސް އެޕް ގްރޫޕްގައި މަޖިލީހުގެ ރައީސް އަށާއި މަޖިލީހުގެ ބައެއް މެމްބަރުންނަށް އަމާޒުކޮށް މެމްބަރު ނަޝީދު ބޭއަދަބީ ބަހުން މުޚާތަބުކުރައްވާފައިވޭ
ނޮޅިވަރަމް ދާއިރާގެ މެމްބަރ މުހައްމަދު ނަޝީދު އަބްދުﷲ
ރައްޔިތުންގެ މަޖިލީހުގެ ރަސްމީ ވަޓްސްއެޕް ގްރޫޕްގައި ރައްޔިތުންގެ މަޖިލީހުގެ ރައީސް އާއި ބައެއް މެމްބަރުންނަށް އަމާޒުކުރައްވައި ނޮޅިވަރަމް ދާއިރާގެ މެމްބަރ މުހައްމަދު ނަޝީދު އަބްދުﷲ ބޭއަދަބީ ބަހުން މުޚާތަބުކުރެއްވި މައްސަލައިގައި ނަޝީދަށް ލިޔުމުން ނަސޭހަތްތެރިވެއްޖެއެވެ.
ރައްޔިތުންގެ މަޖިލީހުގެ ހޯމަ ދުވަހުގެ ޖަލްސާގައި މިކަމާ ގުޅިގެން ވާހަކަދައްކަވަމުން، މަޖިލީހުގެ ރައީސް، ރައީސް މުހައްމަދު ނަޝީދު ވިދާޅުވީ ރައްޔިތުންގެ މަޖިލީހުގެ ރަސްމީ ވަޓްސް އެޕް ގްރޫޕްގައި މަޖިލީހުގެ ރައީސްއަށާއި މަޖިލީހުގެ ބައެއް މެމްބަރުންނަށް އަމާޒުކޮށް ނޮޅިވަރަމް ދާއިރާގެ މެމްބަރ މުހައްމަދު ނަޝީދު އަބްދުﷲ ބޭއަދަބީ ބަހުން މުޚާތަބުކުރައްވާފައިވާ މައްސަލައިގައި ރައްޔިތުންގެ މަޖިލީހުގެ ގަވާއިދުގެ 110 ވަނަ މާއްދާގެ ކ. ގައިވާ ގޮތުގެ މަތިން މަޖިލީހުގެ އިމްތިޔާޒް އަދި ސުލޫކީ ކޮމިޓީން ލަފާއަރުވާފައިވާކަމަށެވެ.
ރައްޔިތުންގެ މަޖިލީހުގެ ގަވާއިދުގެ 110 ވަނަ މާއްދާގެ ކ. ގައި ބުނަނީ މެމްބަރުން އަމަލުކުރަންޖެހޭ ސުލޫކީ މިންގަނޑާއި ޚިލާފަށް، ނުވަތަ ޤާނޫނާއި ޤަވާއިދާ ޚިލާފަށް މެމްބަރަކު ކަމެއް ކޮށްފިކަމުގެ ތުހުމަތު ކުރެވިއްޖެ ހިނދެއްގައި، އެކަމެއް ބަލައި ތަހުގީގުކޮށް ގަވާއިދާ ޚިލާފުވި މެމްބަރަކު ނުވަތަ މެމްބަރުންނާމެދު އަޅަންވީ އިސްލާހީ ފިޔަވަޅުތަކުގެ ލަފާ މަޖިލީހުގެ ރައީސަށް އަރުވަންވާނެކަމަށެވެ.
މަޖިލީހުގެ ގަވާއިދުގެ 66 ވަނަ މާއްދާގައިވަނީ މެމްބަރުންގެ ސުލޫކީ ހަމަތަކެވެ. އެމާއްދާގެ ހ ގައި ބުނެފައިވަނީ މެމްބަރުންގެ އަމަލުތައް އަބަދުވެސް ބަހައްޓަންވާނީ މަޖިލީހުގެ ގަދަރާއި ޝަރަފާއި ކަރާމާތާއި އަބުރު ދެމެހެއްޓޭނެ ގޮތުގެ މަތިންނެވެ. މަޖިލީހުގެ ގަވާއިދުގެ ރޫހަށް މަޖިލީހުގެ މެމްބަރުން އަބަދުވެސް އިހުތިރާމްކުރަންވާނެކަމަށް އެމާއްދާގައި ބުނެފައިވެއެވެ.
