އަލަށް ލައިސަންސް ނަގާ މީހުންނަށް ޓެސްޓު ހެދޭނެ އިންތިޒާމު ހަމަޖައްސަން މަސައްކަތް އެބަކުރަން: ޓްރާންސްޕޯޓް
އެގޮތަށް ކަންތައްކުރީ ކޮވިޑް-19ން ރައްކާތެރިވާން
އިރުއޮއްސެމުން ދިޔަ ވަގުތު މާލެތެރޭގެ މަންޒަރެއް
ރާއްޖޭގައި އެކި އުޅަނދުފަހަރު ދުއްވުމަށް ޓްރާންސްޕޯޓް އޮތޯރިޓީން ޑްރައިވިންއާ ގުޅޭ ޓެސްޓުތައް ހެދުން ހުއްޓާލީ ކޮވިޑް-19ން ރައްކާތެރިވުމަށް އެޅި ފިޔަވަޅެއްގެ ގޮތުން ކަމަށް މޯލްޑިވްސް ޓްރާންސްޕޯޓް އޮތޯރިޓީން ބުނެފިއެެވެ.
ލައިސަންސު ދޫކުރުން މެދުކަނޑާލާފައިވާއިރު، ލައިސަންސު ނެތި ޖޫރިމަނާކުރަމުންދާތީ އެކަމާ ގުޅިގެން ހިންހަމަނުޖެހުން ފާޅުކޮށް އާންމުންގެ ބަޔަކު ވަނީ މިއަދު ޓްރާންސްޕޯޓް އޮތޯރިޓީ ސަރަހައްދަށް އެއްވެފައެވެ. އެކަމާ ގުޅިގެން އެ އޮތޯރިޓީން ނެރުނު ބަޔާނެއްގައި ބުނީ، ލައިސަންސް ޓެސްޓު ހެދުމާއި، ލައިސަންސް ދުކުރުން ވަގުތީގޮތުން މެދުކަނޑާލީ މި ދުވަސްވަރު ހަލުވިކަމާއެކު ކޮވިޑް-19 ފެތުރެމުންދާތީ، އެ އޮތޯރިޓީއަށް ވަކި އަދަދަކަށް ވުރެ ގިނަ މީހުން އެއް ގަޑިއެއްގައި ގޮސް އެއްވުމަކީ އެޗްޕީއޭއިން ކަނޑައަޅާފައިވާ އުސޫލާ ހިލާފު ކަމަކަށް ވާތީ ކަމަށެވެ.
އެކަމުގެ ސަބަބުން އާންމުންނަށް ދިމާވެފައިވާ ދަތިތައް ހައްލުކުރުމަށް އެޗްޕީއޭއާ މަޝްވަރާކޮށްގެން ހިދުމަތް ދެވޭނެ ގޮތެއް އިންތިޒާމުކޮށް އަލަށް ލައިސަންސު ނަގާ މީހުންނަށް ޓެސްޓު ހެދޭނެ އިންތިޒާމު ހަމަޖެއްސުމަށް މަސައްކަތްކުރަމުން އަންނަ ކަމަށްވެސް އެ އޮތޯރިޓީން ބުންޏެވެ.
ލައިސަންސް ނުނަގާ ދުއްްވާ ކޮންމެ ފަހަރަކު 1،000ރ އިން ޖޫރިމަނާކުރާއިރު، އަތުގައި ލައިސަންސް ނެތްނަމަ 750ރ އިން ޖޫރިމަނާކުރެއެވެ. ލައިސަންސް ޓެސްޓު ހެދުމާއި، ދޫކުރުން ވަގުތީގޮތުން މެދުކަނޑާލާފައިވާތާ ގިނަ ދުވަސްތަކެއް ވެފައިވާއިރު ކޮވިޑް-19އާ ގުޅިގެން އަޅާފައިވާ ފިޔަވަޅުތަކުގެ ސަބަބުން މާލެ ސަރަހައްދުގައި ޓްރެފިކް ފުލުހުން ހަރަކާތްތެރިވެ އާންމުން ޖޫރިމަނާކުރާ ވަރުވަނީ ކުރިއާ އަޅާބަލައި ވަރަށް ބޮޑުތަން އިތުރުވެފައެވެ.
އާދިއްތަ ދުވަހު އެ އޮތޯރިޓީ ކައިރިއަށް އެއްވެ ހިންހަމަނުޖެހުން ފާޅުކުރި މީހުންގެ ތެރޭގައި ލައިސަންސަށް އެދި ހުށަހަޅާފައިވާތާ ދެ މަސް ތިން މަސް ވެފައިވީއިރު އަދިވެސް ލައިސަންސް ނުލިބި ތިބި މީހުން ހިމެނެއެވެ. އެއްވުމުގެ ބައިވެރިން ވަނީ މަޖިލިސް ކައިރިއަށް ގޮސް މަޖިލީހުގެ ރައީސް މުހައްމަދު ނަޝީދާވެސް އެ ކަންބޮޑުވުންތައް ހިއްސާކޮށްފައެވެ. އެގޮތުން މައްސަލަ މަޖިލީހާއި ހަމައަށް ގެންނަން ޖެހުނީ އެތައް ފަހަރެއްގެ މަތިން އެ މައްސަލަތަކަށް ހައްލު ހޯދައިދިނުމަށް އެދި ޓްރާންސްޕޯޓު މިނިސްޓްރީއާއި ހިއްސާ ކުރެވި އެދެވޭ ޖަވާބެއް ނުލިބުމުން ކަމަށް އެމީހުން ވަނީ ބުނެފައެވެ. އަދި ޓްރާންސްޕޯޓު މިނިސްޓްރީއަށް ވަރަށް ގިނަ ފަހަރު ގުޅިއްޖެ ކަމަށާއި ނަމަވެސް ފޯނު ނުނަގާ ކަމަށެވެ. އަދި ކޮންމެ ފަހަރަކު ވެސް ހުރި ކަންބޮޑުންތައް ފާޅު ކުރުމަށް އިހުތިޖާޖެއް ކުރަން ޖެހޭކަން ވެސް އެމީހުން ފާހަގަކުރިއެވެ.
