ފްރާންސްގައި ކޮވިޑް ފެތުރުން ކޮންޓްރޯލްކުރުމަށް އަޅާފައިވާ ފިޔަވަޅުތަކަށް އޭޕްރީލް މަހުގެ މެދުތެރެއިން ފެށިގެން ލުއިދޭން ފަށަނީ

ކޮވިޑް-19 ފެތުރުން ކޮންޓްރޯލްކުރުމަށް ފްރާންސްގައި އަޅާފައިވާ ފިޔަވަޅުތަކަށް އޭޕްރީލް މަހުގެ މެދުތެރެއިން ފެށިގެން ލުއިތައް ދޭން ފަށާނެކަމަށް ފްރާންސް ސަރުކާރުގެ ސްޕޯކްސް ޕާސަން ގެބްރިއަލް އަޓަލް ވިދާޅުވެއްޖެއެވެ.

ކޮވިޑު ފެތުރުން ކޮންޓްރޯލްކުރުމަށް އަޅާފައިވާ ފިޔަވަޅުތަކަށް ލުއިދިނުމުގެ މަސައްކަތްތައް ފަށާނެކަމަށް އެގައުމުން ހާމަކޮށްފައިވަނީ ވެކްސިން ދިނުމުގެ ޕްރޮގްރާމް ހަލުވި ކަމާއެކު ކުރިޔަށްދާން ފެށުމުންނެވެ.

ކެބިނެޓް ބައްދަލުވުމަށްފަހު ނޫސްވެރިންނާ ވާހަކަދައްކަވަމުން އަޓަލް ވިދާޅުވީ ދަތިދުވަސްތައް އަދިވެސް ކުރިޔަށް އޮތީކަމަށެވެ. ނަމަވެސް އެތައް މަސްތަކަކަށްފަހު ފުރަތަމަ ފަހަރަށް އާންމު ހާލަތަށް ރުޖޫޢަވެވޭނެކަމުގެ ނިޝާންތައް ފެންނަން ފަށާފައިވާކަމަށް އަޓަލް ވިދާޅުވިއެވެ.

އަދި އޭޕްރީލް މަހުގެ މެދެއްހާ ހިސާބުގައި ހާލަތު ރަނގަޅުވާނެކަމަށް އުންމީދުކުރެވޭ ކަމަށާއި އެހެންކަމުން އެހާހިސާބަށް އަންނަންވާއިރަށް އަޅާފައިވާ ފިޔަވަޅުތަކަށް ލުއިތައް ދިނުމަށް ތައްޔާރުވަމުން އަންނަކަމަށް އަޓަލް ވިދާޅުވިއެވެ.

ކެބިނެޓް ބައްދަލުވުމުގައި ފްރާންސްގެ ރައީސް އެމަނުއަލް މެކްރޮން އެގައުމު އަލުން ހުޅުވާލުމާ ގުޅޭގޮތުން ޕްރޮޕޯސަލެއް އެކުލަވާލައި ހުށަހެޅުމަށް އެދިވަޑައިގެންނެވިކަމަށް އަޓަލް ވިދާޅުވިއެވެ.

މިހަފުތާގެ ކުރީކޮޅު ފްރާންސްގެ ހެލްތު މިނިސްޓަރ އޮލިވިއަރ ވެރަން ވިދާޅުވެފައިވަނީ ކޮވިޑް ފެތުރުން ކޮންޓްރޯލްކުރުމަށް އަޅާފައިވާ ފިޔަވަޅުތައް މަދުވެގެން ކުރިޔަށް އޮތް ހަތަރު ހަފްތާ އާއި ހަ ހަފްތާ އާ ދެމެދު އެގޮތުގައި ބާއްވާނެކަމަށެވެ.

ފްރާންސްގައި ކޮވިޑް ފެތުރުން ކޮންޓްރޯލްކުރުމަށް މިހާރު އަޅާފައިވާ ފިޔަވަޅުތަކުގެ ތެރޭގައި ހިމެނެނީ ރޭގަނޑު ގަޑީގައި ކާފިއު ހިންގުމާއި ބާރތަކާއި، ރެސްޓޯރެންޓްތައް އަދި މިޔުޒިޔަމްތަކާއި ކުޅިވަރު ކުޅޭ ތަންތަނާއި މިޔުޒިކް ކުޅޭ ތަންތަން ބަންދުކޮށްފައި ބެހެއްޓުމެވެ.

ފްރާންސްގެ ބޮޑުވަޒީރު މިދިޔަ ހަފްތާގައި ނޫސްވެރިންނާ ބައްދަލުކުރައްވާ ވާހަކަ ދައްކަވަމުން ވިދާޅުވީ ފްރާންސް އަލުން ލޮކްޑައުން ކުރުމުގެ ވިސްނުމެއް ސަރުކާރުގައި ނެތްކަމަށެވެ. އެހެންނަމަވެސް މިހަފްތާތެރޭގައި ވައިރަސްގެ ހާލަތު އެންމެ ގޯސް 20 ސަރަހައްދެއްގައި ހަފްތާ ބަންދުގައި ކުރާ ލޮކްޑައުން ކުރިޔަށް ގެންދިޔުން ނިމުމަކަށް ގެންނަންޖެހޭތޯ ބަލާނެކަމަށެވެ. ފްރާންސްގައި ކޮވިޑްގެ ހާލަތު އެންމެ ގޯސް 20 ސަރަހައްދުގެ ތެރޭގައި ވެރިރަށް ޕެރިސް އާއި ޕެރިސްގެ ވަށައިގެންވާ ސަރަހައްދުތައް ހިމެނެއެވެ.

ފްރާންސްގައި އަންގާރަ ދުވަހު ވަނީ 22،857 މީހަކަށް އަލަށް ކޮވިޑް ޖެހިގެން ރިޕޯޓްކޮށްފައެވެ. އެއީ އޭގެކުރީ ދުވަހާ އަޅާބަލާއިރު 4703 މީހުން އިތުރު އަދެދެކެވެ.

އަދަދުތައް އިތުރުވަމުން ދިޔުމާ ގުޅޭގޮތުން އަޓަލް ވިދާޅުވީ އަދަދުތައް އިތުރުވަނީ ކަންބޮޑުވާ މިންވަރަށް ކަމަށާއި ނަމަވެސް ވަކި މިންވަރެއްގައި ހިފެހިއްޓިފައިވާކަމަށެވެ.

ކޮވިޑްގެ ޕެންޑަމިކަށް އަހަރެއް ވެފައިވާއިރު ފްރާންސްގައި ކޮވިޑް ޖެހުނު މީހުންގެ އަދަދު 3.783 މިލިއަނަށް އަރައެވެ. ފްރާންސަކީ ހަވަނައަށް އެންމެ ގިނަ އަދަދެއްގެ މީހުންނަށް ކޮވިޑް ޖެހިގެން ރިޕޯޓްކުރަމުން އަންނަ ގައުމެވެ. އެގައުމުގައި މިހާތަނަށް އައިއިރު 87،220 މީހުން ވަނީ މިބަލީގައި މަރުވެފައެވެ. ފްރާންސަކީ ހަތް ވަނައަށް އެންމެ ގިނަ މީހުން މަރުވެގެން ރިޕޯޓްކުރަމުން އަންނަ ގައުމެވެ.