އިންތިޚާބުގެ ކެމްޕޭނަށް ނާޖާއިޒު ފައިސާ ހޯއްދެވި ކަމަށް ސާބިތުވެ ޖަލު ބަންދުގައި ހުންނެވި ފަރަންސޭސި ކުރީގެ ރައީސް ނިކޮލަސް ސާކޯޒީ ގެ އިސްތިއުނާފް މައްސަލަ ހުށަހެޅުމާއެކު އޭނާ ޖަލުން ދޫކޮށްލުމަށް ޕްރޮސެކިއުޓަރުން ކޯޓުގައި އެދިއްޖެ އެވެ.

ސެޕްޓެމްބަރު މަހު ދަށު ކޯޓުން، 2007 އިން 2012 އަށް ފަރަންސޭސި ވިލާތުގެ ވެރިކަން ކުރެއްވި ސާކޯޒީ، ލީބިޔާގެ ކުރީގެ ލީޑަރު މުއައްމަރު ގައްޒާފީގެ އަތްޕުޅުން ކެމްޕޭނަށް ފައިސާ ހޯއްދެވި ކަމަށް ދައުވާކޮށް ފަސް އަހަރުގެ ޖަލު ހުކުމެއް ކުރިއެވެ.

އުމުރުން 70 އަހަރުގެ ސާކޯޒީ ޖަލުގައި އޮކްޓޯބަރު 21 ވަނަ ދުވަހު ބަންދު ކުރުމާ އެކު، އޭނާގެ ވަކީލުން އަވަހަށް އޭނާ މިނިވަން ކުރުމުގެ މަސައްކަތް ވަނީ ފަށާފައެވެ.

ޕެރިސް އިސްތިއުނާފު ކޯޓުން ހޯމަ ދުވަހު އަޑުއެހުން ފަށައި، ބެލެވިފައި ވަނީ ހޯމަ ދުވަހު ގޮތެއް ނިންމާނެ ކަމަށެވެ. އަދި އޭނާ ޖަލުން ދޫކޮށްލާނެ ކަމަށް ބެލޭ ކަމުގައި ރިޕޯޓުތައް ބުނެއެވެ.

ކުރީގެ ލީޑަރު އަޑުއެހުމުގައި ބައިވެރިވީ ވީޑިއޯ ކޯލް މެދުވެރިކޮށެވެ. އޭނާ ހުންނެވީ ޖަލު ހެދުމުގައެވެ. އަޑުއެހުމުގައި ވާހަކަ ދައްވަމުން އޭނާ ވަނީ ޖަލުގައި ހުންނެވުމަކީ ބިރުވެރި ހުވަފެނެއް ފަދަ ކަމެއްގެ ގޮތުގައި ސިފަ ކުރައްވާފައެވެ.

ކޯޓު ރޫމުގައި ސާކޯޒީ އަށް ހިތްވަރު ދެއްވުމަށް އޭނާގެ އަނބިކަނބަލުން، ލަވަކިޔުންތެރިއާއި މޮޑެލް ކާލާ ބްރޫނީ-ސާކޯޒީ، އަދި ދެ ދަރިކަލުން ތިއްބެވި އެވެ.

ސެޕްޓެމްބަރު މަހުގެ ފަހުކޮޅު ދަށު ކޯޓުން ސާކޯޒީ ޖަލަށް ލުމަށް އަމުރު ކުރީ، އޭނާ އިސްތިއުނާފު ކުރިޔަސް، ކުށުގެ "އިސްތިސްނާއީ ސީރިއަސްކަން" ހުރުމުން ކަމަށް ބުނެއެވެ.

ނަމަވެސް އިސްތިއުނާފު ޝަރީއަތް ފެށުމުގެ މާނަ އަކީ ސާކޯޒީ މިހާރު އަނެއްކާވެސް މައުސޫމް ކަމަށް ބެލުން ކަމަށް ވުމާއެކު ކޯޓުން އޭނާ ޝަރީއަތުގެ ކުރިން ބަންދުގައި ބެހެއްޓުމުގެ ބޭނުން ވަޒަން ކުރާނެ އެވެ.

އިސްތިއުނާފު ޝަރީއަތް މާޗް މަހު ބާއްވަން ހަމަޖެހިފައިވެއެވެ.

ކުރީގެ ރައީސް ދެ ހަފްތާ އަށް ވުރެ ގިނަ ދުވަސް ޖަލުގައި ހޭދަކުރައްވައިފައިވާއިރު، އާންމު ބަންދުގައި ތިބި މީހުންނާ ޚިލާފަށް، އޭނާގެ ސަލާމަތާ ރައްކާތެރިކަން ކަށަވަރުކުރުމަށް ދެ ބޮޑީގާޑުން ކައިރީގައި ހުރި ސެލެއްގައި ތިބެވެ.

ޖަލުގެ ސެކިއުރިޓީ އޮފިޝަލުން ބުނެފައި ވަނީ މި ފިޔަވަޅަކީ އެމީހުންގެ މަސްއޫލިއްޔަތައް ކުރާ މަލާމާތެއް ކަމަށެވެ. ނަމަވެސް އިންޓީރިއާ މިނިސްޓަރު ލޯރެންޓް ނޫނޭޒް ވިދާޅުވެފައި ވަނީ ސާކޯޒީ ގެ "ސްޓޭޓަސް" އާއި "އޭނާ އަށް އޮތް ނުރައްކަލުގެ" ސަބަބުން މިއީ ބޭނުންތެރި ކަމެއް ކަމަށެވެ.

ޖަސްޓިސް މިނިސްޓަރު ޖެރަލްޑް ޑާމަނިން ސާކޯޒީ އަށް ފާއިތުވި މަހުގެ ފަހުކޮޅު ވަނީ ޒިޔާރަތް ކުރައްވާފައެވެ.

ދެވަނަ ބޮޑު ހަނގުރާމަ އަށް ފަހު ޖަލަށް ލެވުނު ނާޒީންނަށް ވާގިވެރިވި ފަރަންސޭސި ވެރިޔާ ފިލިޕް ޕެޓެއިން ގެ ފަހުން ޖަލަށް ލެވުނު ފުރަތަމަ ފްރާންސްގެ ލީޑަރަކީ ސާކޯޒީ އެވެ.

އޭނާގެ ސޯޝަލް މީޑިއާ އެކައުންޓުން ފާއިތުވި ހަފްތާގައި ޕޯސްޓް ކުރި ވީޑިއޯއެއްގައި އޭނާ އަށް ހެޔޮ އެދޭ ފަރާތްތަކުން ފޮނުވި ސިޓީ ތަކާއި، ޕޯސްޓްކާޑުތަކާއި، ޕެކޭޖުތައް ދައްކާލައިފައި ވާއިރު، އެ ތަކެތީގެ ތެރޭގައި، ޗޮކްލެޓް އާއި ފޮތް ހިމެނޭ ކަމަށް ބުނެފައިވެ އެވެ.