އަސްކަރީ ބަޣާވާތާއެކު މިޔަންމާގެ ރައީސްކަމުގައި ހުންނަވަނިކޮށް ހައްޔަރުކުރި ވިން މިންޓްގެ މައްޗަށް އިތުރު ދެ ދައުވާއެއް ކޮށްފައިވާކަމަށް އޭނާގެ ވަކީލު ވިދާޅުވެއްޖެއެވެ.
ވިން މިންޓްގެ ވަކީލު ވިދާޅުވީ ކޮށްފައިވާ ދައުވާތަކުގެ ތެރޭގައި އެގައުމުގެ ގާނޫނާ ހިލާފުވުން ހިމެނޭ ކަމަށާއި އޭގެ ސަބަބުން ތިން އަހަރު ދުވަހުގެ ޖަލު ހުކުމެއް އައުމަކީ އެކަށީގެންވާ ކަމެއް ކަމަށެވެ.
މިޔަންމާގައި އަސްކަރިއްޔާއިން ބަޣާވާތްކޮށް އޭގެ ކުޑަ ވަގުތުކޮޅެއް ކުރިން ރައީސް ކަމުގެ މަގާމުގައި ހުންނެވި ވިންގެ އިތުރުން އެގައުމުގެ ލީޑަރު އަން ސަން ސޫކީ ވެސް ވަނީ ހައްޔަރު ކޮށްފައެވެ. މިޔަމަންމާގެ އަސްކަރިއްޔާއިން ބަޣާވާތްކޮށް ސޫކީއާއި ސަރުކާރުގެ އިސްވެރިން ބަންދުކުރީ މިޔަންމާގެ ޤާނޫނު ހަދާ މަޖިލީހުގެ އިންތިޚާބުގެ ސޫކީ ނިސްބަތްވާ މިޔަންމާގެ ވެރިކަން ކުރާ ނެޝަނަލް ލީގް ފޯ ޑިމޮކްރަސީ (އެންއެލްޑީ) ޕާޓީން ބޮޑު އަޣްލަބިއްޔަތަކުން ކާމިޔާބު ކޮށްފައިވާކަން އިއުލާން ކޮށްފައިވަނިކޮށެވެ.
އެޤައުމުގެ ދައުލަތުގެ މީޑިއާ ވެސް ވަނީ އަސްކަރިއްޔާ އިން ހިސާރުކޮށްފައި ކަމަށް ރިޕޯޓުތައް ބުނެއެވެ. އަދި އިންޓަރނެޓްގެ ޚިދުމަތާއި ފޯނުގެ ޚިދުމަތަށް ބުރޫ އަރާފައިވާ ކަމަށް ވެސް ރިޕޯޓުތައް ބުނެއެވެ. ޚަބަރުތައް ބުނާގޮތުން މިހާރުވަނީ ރައްޔިތުންގެ މެދުގައި ޚިޔާލު ތަފާތުވެ މުޒާހަރާތައް ފެށުމުން އެ ޤައުމުގައި ސޯޝަލް މީޑިއާ އެޕްތައް ބޭނުންކުރުން މަނާކޮށްފައެވެ. އެގޮތުން މިޔަންމާގައި ވަނީ ފޭސްބުކް، ޓްވިޓަރ އިންސްޓަގްރާމް އަދި ވަޓްސްއެޕް ބޭނުންކުރުން މަނާކޮށްފައެވެ.
މިޔަންމާގެ ޑިމޮކްރަޓިކް ލީޑަރު އަން ސަން ސޫޗީގެ ސަރުކާރު ވައްޓާލައި އެ ޤައުމުގެ ސިފައިން ގެނައި ބަޣާވާތާ ދެކޮޅަށް ކުރާ މުޒާހަރާތަކުގެ ސަބަބުން އެޤައުމުގައި ކޯވިޑް ޓެސްޓްކުރާ މިންވަރު ވަނީ ވަރަށް ބޮޑަށް ދަށަށް ގޮސްފައެވެ. އަސްކަރިއްޔާގެ ބަޣާވާތާ ދެކޮޅު ހެދުމުގެ ގޮތުން އެ ގައުމުގެ މުވައްޒަފުން މަސައްކަތް ހުއްޓާލުމަށްފަހު ގިނަ އަދަދެއްގެ ބަޔަކު ވަނީ މަގުމައްޗަށް ނުކުމެ އަސްކަރިއްޔާއާ ދެކޮޅަށް މުޒާހަރާކުރަން ފަށާފައެވެ. އޭގެތެރޭގައި ގިނަ ޢަދަދެއްގެ ޑޮކްޓަރުންނާއި ނަރުހުން ވެސް ހިމެނެއެވެ. މި މީހުންނާ ދެކޮޅަށް ފުލުހުންގެ ވެހިކަލްތައް ނުކުމެ ބާރު ސްޕީޑްގައި އަންނަނީ ފެން ވެސް ޖަހަމުންނެވެ. މުޒާހަރާއަށް ނުކުންނަ މީހުންނަށް ފިޔަވަޅު އަޅާނެކަމުގެ އިންޒާރު ސިފައިން ދިން ނަމަވެސް މުޒާހަރާގައި ބައިވެރިވާ މީހުން އަންނަނީ ގިނަވަމުންނެވެ.
