ރަޝިއާގެ އިސް ސެކިއުރިޓީ އޮފިޝަލް ސަރގޭ ޝޮއިގޫ އީރާނަށް ވަޑައިގެންފި

ރަޝިއާގެ ސެކިއުރިޓީގެ ކައުންސިލްގެ ސެކްރެޓަރީ ސަރގޭ ޝޮއިގޫ ތެހެރާން އަށް ވަޑައިގެންފިއެވެ.

މެދުއިރުމަތީގައި ހަނގުރާމަ އެއް ފެށިދާނެ ކަމުގެ ނުތަނަވަސްކަން ބޮޑުވެފައިވާ މި ދަނޑިވަޅުގައި ރަޝިއާގެ ސެކިއުރިޓީ ކައުންސިލްގެ ސެކްރެޓަރީ ހޯމަ ދުވަހު އީރާނަށް މި ކުރައްވާ އެއް ދުވަހުގެ ދަތުރުފުޅުގައި އީރާނުގެ އިސް އޮފިޝަލުންނާ އެކު މަޝްވަރާތައް ކުރައްވާނެ ކަމަށް އީރާނުގެ ދައުލަތުގެ މީޑިއާ އިން ބުނެފައިވެއެވެ.

ހަމާސްގެ ވެރިޔާ އިސްމާއީލް ހަނިއްޔާ މިދިޔަ ބުދަ ދުވަހު އަވަހާރަ ކޮށްލުމާ ގުޅިގެން މެދުއިރުމަތީގެ މަސްރަހް ނުތަނަވަސް ވަމުން ދާއިރު، އިޒްރޭލާ ދެކޮޅަށް ވަރުގަދަ ހަނގުރާމަ އެއް އީރާނުން އިސްވެ އޮވެ ކޮންމެ ވަގުތެއްގައިވެސް ފަށާފާނެ ކަމަށް ވަނީ ބެލެވިފައެވެ.

އީރާނުގައި ހުންނަވަނިކޮށް ހަނިއްޔާ އަވަހާރަކޮށްލިއިރު އޭގެ ގަޑީއިރު ތަކެއް ކުރިން ލުބުނާނަށް ހަމަލާދީ ހިޒްބުﷲ ގެ އިސް ކޮމާންޑަރެއް ކަމަށްވާ ފުއާދް ޝުކޫރު އިޒްރޭލުން ވަނީ އަވަހާރަކޮށްލާފައެވެ.

ގާތްގާތުގައި ދިން މި ދެހަމަލާގެ ބަދަލު ހިފާނެ ކަމުގެ އިންޒާރު އީރާނުންނާއި ހިޒްބުﷲ އިން އިޒްރޭލަށް ވަނީ ދީފައެވެ.

ޝޮއިގޫ ތެހެރާންގައި ބައްދަލު ކުރައްވަން ހަމަޖެހިފައިވާ އިސް އޮފިޝަލުންގެ ތެރޭގައި ރައީސް މަސްއޫދު ޕެޒެޝްކިއާން އާއި ސްޕްރީމް ނެޝަނަލް ސެކިއުރިޓީ ކައުންސިލް ގެ ސެކްރެޓަރީ އަލީ އަކްބަރު އަހްމަދިއާން އީރާންގެ އާމްޑް ފޯސަސްގެ ޗީފް އޮފް ސްޓާފް މޭޖަރ ޖެނެރަލް މުހައްމަދު ބަޤޭރީ ހިމެނިވަޑައިގަންނަވައެވެ.

ރަޝިއާގެ ސެކިއުރިޓީ ކައުންސިލް އާ ހަވާލާދީ އީރާނުގެ މީޑީއާ އިން ބުނެފައިވަނީ ޝޮއިގޫ ގެ ދަތުރުފުޅުގައި ސަލާމަތީ ރޮނގުންނާއި، ވިޔަފާރީގެ ރޮނގުންނާއި، ސަރަހައްދީ އަދި ބައިނަލް އަގްވާމީ ސެކިއުރިޓީ މައްސަލަ ތަކާ ބެހޭ ގޮތުން މަޝްވަރާ ކުރެވި އެ ދާއިރާތަކުން ދެގައުމުގެ ގުޅުން ބަދަހި ކުރުމަށް ހަމަޖެހިފައިވާ ކަމުގައެވެ.

އީރާނުން މިދިޔަ ހޯމަ ދުވަހު ބުނެފައިވަނީ އިސްމާއީލް ހަނިއްޔާ އަވަހަރާ ކޮށްލުމަކީ ބައިނަލް އަގްވާމީ ގާނޫނުތަކާ މުޅިން ޚިލާފަށް ހިންގާފައިވާ ޖަރީމާއެއް ކަމަށާއި އެ ޖަރީމާ ހިންގި ފަރާތާ ދެކޮޅަށް ބަދަލު ހިފުމަކީ އީރާނަށް ލިބިގެންވާ ހައްގެއް ކަމުގައެވެ.

އީރާނުން ބުނެފައިވަނީ ހަނިއްޔާ އަވަހާރަ ކޮށްލީ އިޒްރޭލުން ކަމަށާއި އަދި އެ ޖަރީމާ އިޒްރޭލުން ހިންގީ އެމެރިކާގެ ރުހުން ލިބިގެން ކަމުގައެވެ.