މަލީހުގެ އިތުބާރު ނެތްކަމަށް އެމްޑީޕީން ތްރީލައިން ވިޕެއް ނެރެފި
މިދިއަ އަހަރުވެސް މިނިސްޓަރު މަލީހުގެ އިތުބާރު ނެތްކަމުގެ މައްސަލައެއް މަޖިލީހަށް ހުށަހެޅި، އެމައްސަލާގައި އެމްޑީޕީން ނިންމާފައިވަނީ އެކަމުގައި ރައީސުލްޖުމްހޫރިއްޔާގެ ލަފަޔަކަށް އެދެން
ކޮމިއުނިކޭޝަންސް، ސައިންސް އެންޑް ޓެކްނޮލިޖީ މިނިސްޓަރު މުހައްމަދު މަލީހު ޖަމާލު: މަގާމުގެ ޒިންމާ އަދާ ނުކުރައްވާކަމަށް މަޖިލީހުގެ ގިނަ މެމްބަރުން ފާހަގަ ކުރައްވާ
ކޮމިއުނިކޭޝަންސް، ސައިންސް އެންޑް ޓެކްނޮލިޖީ މިނިސްޓަރު މުހައްމަދު މަލީހު ޖަމާލުގެ އިތުބާރު ނެތް ކަމުގެ މައްސަލަ މަޖިލީހުން ފާސްކުރުމަށް އެމްޑީޕީގެ ޕާލަމަންޓްރީ ގްރޫޕުން ތްރީލައިން ވިޕެއް ނެރެފިއެވެ.
މަލީހުގެ އިތުބާރު ނެތްކަމުގެ މައްސަލަ ރައްޔިތުންގެ މަޖިލީހަށް ހުށަހެޅުއްވީ މެދު ހެންވޭރު ދާއިރާގެ މެމްބަރު އަދި އެމްޑީޕީގެ ޕާލަމެންޓްރީ ގްރޫޕްގެ ލީޑަރު އަލީ އާޒިމްއެވެ.
ދިވެހިރާއްޖޭގެ ޖުމްހޫރިއްޔާގެ ޤާނޫނުއަސާސީގެ 101 ވަނަ މާއްދާގެ (ހ) ގެ ދަށުން، މިނިސްޓަރ އޮފް ކޮމިއުނިކޭޝަން، ސައިންސް އެންޑް ޓެކްނޮލޮޖީ މުހައްމަދު މަލީޙް ޖަމާލްގެ އިތުބާރުނެތްކަމުގެ މައްސަލަ ވަނީ ހޯމަ ދުވަހު ބާއްވާ ރައްޔިތުންގެ މަޖިލީހުގެ ޖަލްސާއަށް، މަޖިލީހުގެ ރައީސްގެ މޭޒުން ހުށަހަޅާކަންކަމުގެ އެޖެންޑާގެ ދަށުން އެޖެންޑާ ވެސް ކޮށްފައެވެ.
މީގެކުރިން މަލީހުގެ އިތުބާރު ނެތްކަމުގެ މައްސަލަ 10 މެންބަރުންގެ ސޮޔާއެކު އެމްޑީޕީ ޕީޖީ ގްރޫޕަށް ގަލޮޅު ދެކުނު ދާއިރާގެ މެމްބަރު މީކާއިލް ނަސީމް ވެސް ވަނީ ހުށަހަޅުއްވާފައެވެ. އެކަމާއި ގުޅިގެން މިނިސްޓަރު މަލީހު ޖަމާލުގެ އިތުބާރު ނެތް ކަމަށް ރައީސް އިބްރާހިމް މުހައްމަދު ސޯލިހުއަށް ދަންނަވަން އެމްޑީޕީ ޕަރލިމެންޓަރީ ގްރޫޕުން ވަނީ މިދިޔަ އަހަރުގެ ނޮވެމްބަރު މަހުގެ 22 ވަނަ ދުވަހު ފާސް ވެސް ކޮށްފައެވެ.
އޭރު އެމްޑީޕީ ޕީޖީ ގްރޫޕަށް ހުށައެޅި މައްސަލާގައި ބުނެފައިވަނީ، ކޮމިއުނިކޭޝަންސް އޮތޯރިޓީއިން ހަދަން ޖެހޭ އެއްވެސް ގަވާއިދެއް މަގާމުގައި ހުންނަވާތާ ދެ އަހަރު ވީއިރު ވެސް މިނިސްޓަރ މަލީހު ހަދާފައިނުވާ ކަމަށެވެ. އަދި ވުޒާރާއެއްގެ ވަޒީރުގެ ޒިންމާއެއް އަދާ ނުކުރެވި ހޭދަވާ ކޮންމެ ދުވަހަކީ ދައުލަތަށާއި، ރައްޔިތުންނަށް އެތަކެއް ގެއްލުންތަކެއް ކުރިމަތިކުރުވާ ކަމެއްކަން ކަށަވަރުވާ ހިނދު މިނިސްޓަރުގެ ފަރާތުން އެއްވެސް އެއްބާރުލުމެއް ދެއްވާފައި ނުވާ ކަމަށާއި އަދި އެކަމަށް ހުރަސް އަޅުއްވާފައިވާކަން ސާފުވާ ކަމަށެވެ. އެހެންކަމުން މަލީހު އިތުރަށް ބެހެއްޓުމަކީ އެމްޑީޕީ އަށް އިތުބާރު އޮތް ކަމަކަށް ނުވާތީ އާއި، ގިނަ ރައްޔިތުންތަކެއް އޭނާ މަގާމުން ވަކިކުރުމަށް ކެނޑިނޭޅި އެދުމުންދާތީ މަލީހު މަގާމުން ވަކިކުރަން ހުށައަޅާ ކަމަށެވެ.
ނަމަވެސް އެމައްސަލަ މަޖިލީހަށް މިދިޔަ އަހަރުގެ ޖަލްސާތައް ނިންމާލާ ޗުއްޓީއަށް ދިޔައިރު ވެސް ހުށަހަޅާފައެއް ނުވެއެވެ. އޭރު އެކަމާއި ގުޅިގެން މަޖިލީހުގެ ޖަލްސާއެއްގައި ވާހަކަދައްކަވަމުން އާޒިމް ވިދާޅުވެފައިވަނީ މަލީހު ޖަމާލުގެ އިތުބާރު ނެތްކަމުގެ މައްސަލައިގައި ރައީސް އިބްރާހިމް މުހައްމަދު ޞާލިހުގެ ލަފައެއް ހޯދަން އެދިވަޑައިގެންފައިވާނެ ކަމަށެވެ. ކެބިނެޓުގައި ހުންނަވާ ބޭފުޅަކު މަގާމުން ދުރުކުރެއްވުމަކީ އެމްޑީޕީން ކުރާ ކަމެއްގެ ގޮތުގައި ވާން ބޭނުން ނުވާތީ ރައީސްގެ ލަފައެއް އެކަމުގައި ހޯއްދެވުމަށް ހުށަހަޅާފައިވާނެ ކަމަށް އާޒިމް ވިދާޅުވެފައިވެއެވެ.
މަލީހުގެ އިތުބާރުނެތްކަމުގެ މައްސަލަ އެމްޑީޕީން މަޖިލީހަށް މިހުށަހެޅީ ދިވެހިރާއްޖޭގެ މުއާޞަލާތީ ޚިދުމަތްތައް ބެލެހެއްޓުމުގެ ޒިންމާއާ ޙަވާލުކުރެވިފައިވާ ފަރާތުން، ނުހަނު ދިގު މުއްދަތަކަށް، ދިވެހިރާއްޖޭގައި ހަދާފައިވާ ޤާނޫނުތަކަށް ބެލުމެއްނެތި، ޓެލެކޮމް އޮޕަރޭޓަރުންގެ މަންފާއަށް ފަހިވާގޮތަށް، ރައްޔިތުންނަށް ނުހަނު ގެއްލުންވަމުންދާ މަގުން، ގިނަގުނަ ކަންތައްތަކެއް ތަރުތީބުކޮށްފައިވާތީ، އެ ކަންކަން ނިމުމަކަށް ގެނައުމަށް ގޮވާލައި މާފަންނު މެދު ދާއިރާގެ އެމްޑީޕީ މެމްބަރު އިބްރާހީމް ރަޝީދު (ބޮންޑާ) މަޖިލީހަށް ގަރާރެއް ހުށަހަޅާ ބަހުސްކުރަމުން ދަނިކޮށެވެ.
މަލީހުގެ އިތުބާރު ނެތްކަމުގެ މައްސަލަ އެމްޑީޕީން މަޖިލީހަށް ހުށަހެޅުމާއި ގުޅިގެން މަލީހު ކުރެއްވި ޓްވީޓެއްގައި ވިދާޅުވެފައިވަނީ އަސާސެއްނެތް ކަމެއްގައި އިލްޒާމު އަޅުވާ އަދަބުދޭން އުޅުމަކީ ދުސްތޫރާ ޚިލާފުކަމެއް ކަމަށެވެ.
މިބަހުސްގައި އެމްޑީޕީގެ ގިނަ މެމްބަރުން ވަނީ މަލީހުގެ އިތުބާރުނެތްކަމުގެ މައްސަލަ މަޖިލީހަށް ނުވައްދާ ގިނަދުވަސްތަކެއްވާތީ އެކަމުގެ ކަންބޮޑުވުންފާޅުކޮށް ވާހަކަދައްކަވާފައެވެ. ވަޒީރެއްގެ އިތުބާރު ނެތްކަމުގެ މައްސަލައެއް މަޖިލިހަށް ވައްދަން ބޭނުންވަނީ 10 މެމްބަރުންގެ ސޮއެވެ. އަދި ސަރުކާރުގެ ވަޒީރެއްގެ އިތުބާރު ނެތްކަމަށް ފާސްކުރަން ބޭނުންވަނީ މަޖިލިހުގައި ތިއްބަވާ މެމްބަރުންގެ ތެރެއިން ދެބައިކުޅައެއްބައި މެމްބަރުން ނުވަތަ 43 މެމްބަރުންގެ ވޯޓެވެ.
މީގެކުރިން އެމްޑީޕީން ވަނީ ހެލްތު މިނިސްޓަރ ކަމުގައި ހުންނެވި އަބްދުﷲ އަމީންގެ އިތުބާރު ނެތްކަމުގެ މައްސަލަ މަޖިލީހަށް ވައްދާފައެވެ. ނަމަވެސް އެމައްސަލަ މަޖިލީހުގައި ކުރިޔަށް ނުގެންދެވިއުޅެނިކޮށް އަމީން ވަނީ އިސްތިއުފާ ދެއްވާފައެވެ.
