ކްރިކެޓް ބޯޑުގެ ސެކްރެޓަރީ ޖެނެރަލުގެ މަގާމަށް މުނާޒް
27 ފެބުރުއަރީ 2021 | ހޮނިހިރު 13:26އެކަމަކު ރައީސާއި ބޯޑުން ބޭނުންވާ މީހަކުވެސް އައްޔަންކުރެވޭ
ކްރިކެޓް ބޯޑުގެ ސެކްރެޓަރީ ޖެނެރަލް އަޙްމަދު މުނާޒް (ކ) އަދި ރައީސް މުޙައްމަދު ފައިޞަލް (ވ)
ކްރިކެޓް ބޯޑް އޮފް މޯލްޑިވްސްގެ ސެކްރެޓަރީ ޖެނެރަލުގެ މަގާމަށް އަޙްމަދު މުނާޒް ހަމަޖައްސައިފިއެވެ.
ކްރިކެޓް ބޯޑުގެ ސެކްރެޓަރީ ޖެނެރަލުގެ މަގާމަށް މުނާޒް ހަމަޖެއްސިކަން މިދިޔަ ބުރާސްފަތި ދުވަހު އެ ބޯޑުން ވަނީ ހާމަކޮށްފައެވެ. އެ ބޯޑުގެ ސެކްރެޓަރީ ޖެނެރަލުގެ މަގާމަށް މުނާޒް އަންޔަންކުރީ އެ މަގާމަށް ބޭފުޅަކު ހޯދުމަށް އިޢުލާންކޮށްގެންނެވެ. އެގޮތުން މިދިޔަ އަހަރުގެ ނޮވެމްބަރު މަހުގެ 15 ވަނަ ދުވަހު ކްރިކެޓް ބޯޑުން ވަނީ ސެކްރެޓަރީ ޖެނެރަލުގެ މަގާމަށް ކުރިމަތިލުމަށް ހުޅުވާލާފައެވެ.
ކްރިކެޓް ބޯޑުގެ ހިންގާ ގަވާއިދުގައި ބުނާ ގޮތުން ސެކްރެޓަރީ ޖެނެރަލުގެ މަގާމަށް ރައީސާއި ބޯޑުން ބޭނުންވާ މީހަކު އައްޔަންކުރެވެއެވެ. އެކަމަކު އޭގެ ބަދަލުގައި އިޢުލާންކޮށްގެން ސެކްރެޓަރީ ޖެނެރަލަކު އައްޔަންކުރީ އެ މަގާމަށް އެންމެ ރަނގަޅު ބޭފަޅު ހޯދުމަށް ކަމަށް އެ ބޯޑުން ވަނީ މައުލޫމާތުދީފައެވެ.
ކްރިކެޓް ބޯޑުގެ ރައީސަކީ މިދިޔަ ޖެނުއަރީ މަހު އޭޝިއަން ކްރިކެޓް ކައުންސިލް (އޭސީސީ) ގެ އެގްޒެކުޓިވް ބޯޑުގެ ޑައިރެކްޓަރަކަށް އިންތިޚާބުވެވަޑައިގެންނެވި މުޙައްމަދު ފައިޞަލެވެ. ފައިޞަލް ކްރިކެޓް ބޯޑުގެ ރައީސްގެ މަގާމާ ހަވާލުވެވަޑައިގަތީ މިދިޔަ އަހަރުގެ ސެޕްޓެމްބަރު މަހުގެ ތެރޭގައެވެ. މީގެ ކުރިން ރާއްޖެއިން ޗައިނާއަށް ކަނޑައެޅުއްވި ސަފީރުގެ މަގާމުވެސް އަދާކުރައްވާފައިވާ ފައިޞަލް އެ އިދާރާއާ ހަވާލުވެވަޑައިގެން އެންމެ ފުރަތަމަ ކުރެއްވި މަސައްކަތްތަކުގެ ތެރޭގައި ކްރިކެޓް ބޯޑުގެ ހިންގާ ކޮމިޓީން ކުރިއަށް އޮތް ހަތަރު އަހަރުގެ މަސައްކަތްތައް ބައްޓަންކުރާނެ ގޮތްތަކެއް ކަނޑައެޅުމަށް "ޕްލޭން 120" ގެ ނަމުގައި ކުރު މުއްދަތުގެ ޕްލޭނެއް އެކުލަވާލުން ހިމެނެއެވެ.
މިދިޔަ އަހަރު ކްރިކެޓް ބޯޑާ ފައިޞަލް ހަވާލުވެވަޑައިގެންނެވިއިރު، އޭނާ ވަނީ މީގެ ކުރިން އެ އިދާރާގެ ނައިބު ރައީސްގެ މަގާމާއި، ޖެނަރަލް ސެކްރެޓަރީގެ މަގާމުވެސް ފުރުއްވާފައެވެ.
