މިޔަންމާ މުޒާހަރާ: ފުލުހުންގެ ހަމަލާއެއްގައި އިތުރު މީހަކު މަރުވެއްޖެ
27 ފެބުރުއަރީ 2021 | ހޮނިހިރު 10:51ހުކުރު ދުވަހުގެ މުޒާހަރާގައި 35 މީހަކަށް ވަނީ އަނިޔާވެފައި
މިޔަންމާގައި ކުރަމުން ގެންދާ މުޒާހަރާގެ ތެރެއިން
މިޔަންމާގެ އަސްކަރިއްޔާއާ ދެކޮޅަށް އެގައުމުގެ ރައްޔިތުން ކުރަމުން ގެންދާ މުޒާހަރާ ކޮންޓްރޯލް ކުރުމަށް ފުލުހުން ބާރުގެ ބޭނުން ކޮށްފައިވާއިރު، ފުލުހުންގެ ހަމަލާގައި އަންހެނަކު މަރުވެއްޖެއެވެ.
މިޔަންމާގެ އަސްކަރިއްޔާއާ ދެކޮޅަށް އެގައުމުގެ ރައްޔިތުން މުޒާހަރާ ކުރަމުން އަންނަތާ މިހާރު ތިން ހަފްތާއަށްވުރެ، ގިނަ ދުވަސް ވެފައިވާއިރު، އެތަށް ހާސް ރައްޔިތުންނެއް އަންނަނީ އެގައުމުގެ އަސްކަރިއްޔާއާ ދެކޮޅަށް މުޒާހަރާ ކުރަމުންނެވެ.
މިޔަންމާގެ މީޑިއާތަކުން ރިޕޯޓްކޮށްފައިވާ ގޮތުން އެގައުމުގައި ކުރަމުން ގެންދާ މުޒާހަރާތައް ހުއްޓުވުމަށް ފުލުހުން ބަޑީގެ ބޭނުން މިހާރު އަންނަނީ ކުރަމުންނެވެ. އެގޮތުން ހުކުރު ދުވަހުގެ މުޒާހަރާ ހުއްޓުވުމަށް ފުލުހުން ވަނީ އިންޒާރަކާއި ނުލާ ބަޑީގެ ބޭނުން ކޮށްފައެވެ. އެގޮތުން ފުލުހުންގެ ހަމާލާގައި އެކަކު މަރުވެ، 35 މީހަކަށް ވަނީ އަނިޔާވެފައެވެ.
މީގެ ކުރިންވެސް ފުލުހުންގެ ބަޑީގެ ހަމާލަގައި ދެ މީހަކު ވަނީ މަރުވެފައެވެ.
މިޔަންމާގެ ލީޑަރު އަސްކަރިއްޔާގެ ބަޣާވާތަކުން ހައްޔަރު ކޮށްފައިވާއިރު، އޭނާ މިހާރު ވަނީ ގޭ ބަންދަށް ބަދަލުކޮށްފައެވެ. އަދި އޭނާގެ މައްޗަށް ދެ ދައުވާއެއް ކޮށްފައިވާއިރު، އެ ދައުވާތަކަކީ، ގަވާއިދާ ހިލާފަށް ވޯކީޓޯކީތަކެއް އެތެރެ ކުރުމާއި ކޮވިޑް-19އާ ގުޅިގެން އެޅި ފިޔަވަޅުތަކާ ހިލާފުވި ކަމުގެ ދައުވާއެވެ.
މިޔަންމާގެ އަސްކަރިއްޔާއިން ބުނީ އެގައުމުގައި ބަޣާވާތެއް ކޮށްފައި ނުވާ ކަމަށާއި، ވެރިކަމާއި ހަވާލުވާން ޖެހުނީ ނޮވެމްބަރު މަހު ބޭއްވި އިންތިހާބުގެ ނަތީޖާ އޮޅުވާލުމުން ކަމަށް ބުނެފައެވެ. އަދި އަލުން އިންތިހާބު ބާއްވާނެ ކަމަށް އަސްކަރިއްޔާއިން ވަނީ ބުނެފައެވެ.
