ޓުއާ އޮޕަރޭޓަރުންގެ ގާނޫނުން ކުންފުނިތަކަށް ރައްކާތެރިކަން ލިބޭނެ: މިނިސްޓަރ މައުސޫމް
25 ފެބުރުއަރީ 2021 | ބުރާސްފަތި 11:30ޓްރެވެލް އެޖެންޓުންނަށް އެންމެ ބޮޑު ދައްޗަކަށް ދިމާވަނީ ދުނިޔޭގެ ވާދަވެރިކަމުގެ ތެރޭގައި އެކަށީގެންވާ ސަލާމަތާއި ރައްކާތެރިކަން ނުލިބުން
ޓޫރިޒަމް މިނިސްޓަރ ޑރ. އަބްދުﷲ މައުސޫމް
ޓުއަރ އޮޕަރޭޓަރުންނާއި ޓުއަރ އެޖެންސީތަކަށް ޙާއްސަ ޤާނޫނެއް އެކުލަވާލުމުން މުޅި ދުނިޔޭގައި މި ދާއިރާގައި މަސައްކަތްކުރާ ކުންފުނިތަކުގެ ވާދަވެރިކަމުގެ ތެރޭގައި ދިވެހި ކުންފުނިތަކަށް އެކަށީގެންވާ ރައްކާތެރިކަން ލިބޭނެ ކަމަށް ޓޫރިޒަމް މިނިސްޓަރ ޑރ. އަބްދުﷲ މައުސޫމް ވިދާޅުވެއްޖެއެވެ.
ޓުއާ އޮޕަރޭޓަރުންނާއި ޓްރެވަލް އެޖެންޓުންގެ ޤާނޫނާ ގުޅޭ ގޮތުން ރައްޔިތުންގެ މަޖިލިހުގެ އިސްނެގުމަށް މިއަދު ބާއްވަން ފެށި، މަސައްކަތު ބައްދަލުވުން ފެށުމުގެ ރަސްމިއްޔާތުގައި ވާހަކަދައްކަވަމުން މިނިސްޓަރ މައުސޫމް ވިދާޅުވީ މިއަދު ރާއްޖޭގެ ޓްރެވެލް އެޖެންޓުންނަށް އެންމެ ބޮޑު ދައްޗަކަށް ދިމާވަނީ ދުނިޔޭގެ ވާދަވެރިކަމުގެ ތެރޭގައި އެކަށީގެންވާ ސަލާމަތާއި ރައްކާތެރިކަން ނުލިބުން ކަމަށެވެ.
މިނިސްޓަރ ވިދާޅުވީ ބައިނަލްއަގުވާމީ ވިޔަފާރީގެ ދުނިޔޭގައި އެ ޤައުމެއްގެ ވިޔަފާރިތަކަށް ރައްކާތެރިކަން ކަށަވަރުކުރުމަކީ އެ ގައުމެއްގެ ޒިންމާއެއް ކަމަށެވެ. އެއީ ގައުމުގެ ކުރިއެރުމާއި އިގްތިސޯދަށް އެންމެ ރަނގަޅު ގޮތް ކަމަށާއި އެކަމަށް ވަރަށް ބޮޑު އިސްކަމެއް ދޭން ޖެހޭނެ ކަމަށް ވެސް މިނިސްޓަރ ވިދާޅުވެފައިވެއެވެ.
ރައްޔިތުންގެ މަޖިލީހުން އިސް ނަގައިގެން ބާއްވާ ބައްދަލުވުމުގެ ބައިވެރިންނަށް އިޝާރާތްކުރައްވާ މިނިސްޓަރ މައުސޫމް ވިދާޅުވީ ބައްދަލުވުމުގައި ބައިވެރިވާ ގިނަ ޓުއަރ އޮޕަރޭޓަރުން، ޓެރެވެލް އެޖެންޓުންނަކީ ވަރަށް ބޮޑެތި ޓުއަރ އޮޕަރޭޓަރުންނާއި ޓްރެވެލް އެޖެންޓުންކަމަށެވެ. އެ ބޭފުޅުން އެ ބައްދަލުވުމަށް ވަޑައިގަތީ އެ ބޭފުޅުންނަށް ކަމެއް ނުލިބިގެން ނޫން ކަމަށާއި، ބޭރުގެ ޓުއާ އޮޕަރޭޓަރުންނާ ވާހަކަދެއްކުމުގައި އެ އޮޕަރޭޓަރުންނަށް ފަސޭހަ މަގު އޮތުމުން އެ ބޭފުޅުން އެތަނަށް ވަޑައިގަތީ ކުދި ޓްރެވެލް އެޖެންޓުންނާއި ޓުއާ އޮޕަރޭޓަރުންނަށް ފުރުޞަތު ހޯއްދަވައިދެއްވުމަށް ކަމަށް ވެސް މިނިސްޓަރ ވިދާޅުވިއެވެ.
މީގެ އިތުރަށް ޤާނޫނު ހެދުމުން ރާއްޖެއަށް ލިބޭ ޑޮލަރުވެސް ރާއްޖޭގައި ބެހެއްޓުމަށް މަގުފަހިވެގެންދާނެކަމަށް މިނިސްޓަރ ވިދާޅުވިއެވެ.
