ބޫޓް ކޭމްޕް ކޮންސެޕްޓް ބަދަލުކޮށް ފިޓް ޒޯނުން އިންޑޯ ގްރޫޕް ޕީޓީ ސެޝަންއެއް ބާއްވަނީ
މި ޝެޝަންތައް ބޮޑަށް ޓާގެޓް ކުރަނީ 25 އަހަރާއި 35 އަހަރާ ދެމެދު އުމުރުފުރާގެ މީހުނަށް
އީއައިއެފް މާސްޓަރ ޓްރެއިނަރ މަރީ (ފިޓް ޒޯން)
ބޫޓް ކޭމްޕް ކޮންސެޕްޓް ބަދަލުކޮށް ފިޓް ޒޯނުން އިންޑޯ ގްރޫޕް ޕީޓީ ސެޝަންތަކެއް ބާއްވަން ނިންމައިފިއެވެ.
ރާއްޖެ.އެމްވީއާ ވާހަކަދައްކަމުން ފިޓް ޒޯނުގެ ސީނިއަރ ޓްރެއިނަރ ރިފާޝް ރިޔާޒް ބުނީ ފިޓް ޒޯނުން މުޅިން އަލަށް އިންޑޯ ގްރޫޕް ޕީޓީ ސެޝަންތަކެއް ކުރިޔަށް ގެންދަން ނިންމާފައިވާ ކަމަށާއި މި ޝެޝަންތައް ނަގައިދޭނީ އީއައިއެފް މާސްޓަރ ޓްރެއިނަރ މަރީ ކަމަށެވެ.
ރިފާޝް ބުނީ މި ޝެޝަންތައް ބޮޑަށް ޓާގެޓް ކުރަނީ 25 އަހަރާއި 35 އަހަރާއި ދެމެދު އުމުރުފުރާގެ މީހުނަށް ކަމަށާއި، މި ޕީޓީ ސެޝަންތައް ގެންދަނީ ދެ ޕެކޭޖަކަށް ބަހައިލައިގެން ކަމަށެވެ. އެއީ ހަފްތާއަކު ތިން ދުވަހުގެ ޕެކޭޖަކާއި ފަސް ދުވަހުގެ ޕެކޭޖެއް ކަމަށެވެ. ތިން ދުވަހުގެ ޕެކޭޖުގެ އަގަކީ 999 ރުފިޔާ ކަމަށާއި، ފަސް ދުވަހުގެ ޕެކޭޖުގެ އަގަކީ 1499 ރުފިޔާ ކަމަށް ރިފާޝް ފާހަގަކުރިއެވެ.
ރިފާޝް ބުނީ މި ޝެޝަންތަކުގައި ކެޓް ލޮގް އަދި ވެއިޓް މެނޭޖްމަންޓްގެ ކްލާސްތަކާއި، ކާޑިއޯއާ ބޮކްސިންގެ އިތުރުން ބަނޑުގެ ކަސްރަތުތައް ހިމެނޭ ކަމަށެވެ. ރިފާޝް ބުނީ ފިޓް ޒޯންގެ މި ޝެޝަންތަކުގައި ބައިވެރިވާ ފަރާތްތައް ކިރުމަށްފަހު އެ ފަރާތަކާ އެންމެ ގުޅޭނެ ޑައިޓެއް ކިޔައިދޭނެ ކަމަށެވެ. އަދި ކޮންމެ ހަފްތާއަކު އެ ފަރާތަކަށް އަންނަ ބަދަލުތައް މޮނިޓަރ ކުރެވިގެން ދާނެ ކަމަށް ރިފާޝް ބުންޏެވެ.
ރިފާޝް ބުނީ މި ޝެޝަންތަކަކީ ބޫޓް ކޭމްޕްގެ ކޮންސެޕްޓް ބަދަލުކޮށްގެން ކުރިޔަށް ގެންދާ ސެޝަންތަކެއް ކަމަށާއި، ބޫޓް ކޭމްޕް ކޮންސެޕްޓް ބަދަލުކުރުމުގެ ބޭނުމަކީ ސާވިސް ރަނގަޅު، އަގާއި ގުޅޭ ފެންވަރު ރަނގަޅު ހިދުމަތް ދިނުން ކަމަށެވެ.
މި ސެޝަންތައް ފެށުމަށް ހަމަޖެހިފައިވަނީ މާރޗް 1ގައެވެ. އެކަމަކު ސެޝަންތައް ފެށުމަށްފަހު ވެސް ބައިވެރިވުމުގެ ފުރުސަތު އޮންނާނެ ކަމަށް ފިޓް ޒޯނުން ބުނެއެވެ.
ފިޓް ޒޯނުގެ ޖިމަކީ ޒަމާނީ ޓެކްނޮލޮޖީއާއިއެކު އާންމުންނަށް ފިޓްނަސްގެ ޕްރޮގްރާމްތައް ހިންގުމަށް ތަރައްގީކޮށްފައިވާ ޖިމެކެވެ. މި ޖިމްގައި އެއް ފަހަރާ 20 މީހުނަށް ހިދުމަތް ދެމުން ގެންދާއިރު، ކޮވިޑް-19ގެ މިހާލަތުގައި ހިދުމަތް ދެމުން ގެންދަނީ 10 މީހުނަށެވެ.
ހުޅުމާލޭގައި ހުޅުވިގެން ދިޔަ ފުރަތަމަ ޔުނިސެކްސް ޖިމް ކަމުގައިވާ ފިޓް ޒޯނަކީ ގިނަ އަދަދެއްގެ ޓްރެއިނިން ޕްރޮގްރާމްތަކާއި ފިޓްނަސް ޕްރޮގްރާމްތަކެއް ހިންގަމުން އަންނަ ޖިމްއެކެވެ. އޭގެ ތެރޭގައި އަންހެން ކަނބަލުންނަށް ހާއްސަ ކްލާސްތަކާއި ފިރިހެނުންނަށް ހާއްސަ ފިޓްނަސް ޕްރޮގްރާމްތަކުގެ އިތުރުން ޔޯގާ އަދި ޕަރސަނަލް ޓްރެއިނިން ޕްރޮގްރާމްތައް ވެސް ހިމެނެއެވެ.
