ވޭމަންޑޫއަށް ކަރަންޓު ލިބޭވަރު ވާނީ މާދަމާ: ފެނަކަ

ވޭމަންޑޫގެ އިންޖީނުގޭގައި ހިނގި އަލިފާނުގެ ހާދިސާގެ ސަބަބުން އެރަށަށް ދެން އެންމެ އަވަހަށް ކަރަންޓު ލިބޭނީ މާދަމާގެ ވަގުތެއްގައިކަމަށް އެރަށުގެ އިންޖީނުގެ ހިންގާ ފެނަކަ ކޯޕަރޭޝަނުން ބުނެފިއެވެ.

ވޭމަންޑޫ އިންޖީނުގޭގައި ބުދަ ދުވަހު ހިނގި އަލިފާނުގެ ހާދިސާ ރިޕޯޓުކޮށްފައި ވަނީ ގާތްގަނޑަކަށް މެންދުރު 2:30 ހާއިރުއެވެ. ފެނަކައިގެ މެނޭޖިން ޑިރެކްޓަރ އަހުމަދު ސައީދު މުހައްމަދު ރާއްޖެ އެމްވީއަށް ވިދާޅުވީ އަލިފާން ރޯވާން މެދުވެރިވި ވަކި ސަބަބެއް އަދި ދެނެގަނެވިފައި ނުވާ ކަމަށާއި، އެމްއެންޑީއެފްއިން މިހާރު ވެސް އެކަން ބަލަމުން އަންނަ ކަމަށެވެ. އަދި ދެގަޑިއިރެއްހާއިރު ފަހުން އަލިފާން ނިއްވާލާފައިވާ ކަމަށާއި އެއްވެސް މީހަކަށް ގެއްލުމެއް ވެފައި ނުވާ ކަމަށްވެސް ވިދާޅުވިއެވެ.

އޭނާ ވިދާޅުވީ އަލިފާންގަނޑު ނިއްވާލެވުނުއިރު ތަނުގައި ހުރި އިންޖީނުތައް ބޭނުން ނުކުރެވޭ ވަރަށް އަނދާފައިވާ ކަމަށެވެ. އަދި ރަށުގެ ރައްޔިތުންނަށް ދިމާވާ ދަތިތައް ހައްލުކުރުމަށް ވަރަށް އަވަސް ފިޔަވަޅުތަކެއް އަޅަމުން އަންނަ ކަމަށް ވިދާޅުވިއެވެ. އެގޮތުން ބުދަ ދުވަހުގެ ރޭ ބެކަޕް ޖަނަރޭޓަރެއް އެރަށަށް ފޮނުވާނެ ކަމަށާއި، ބުރާސްފަތި ދުވަހު ރަށަށް ކަރަންޓު ލިބޭނެ ކަމަށް އޭނާ ވިދާޅުވެފައިވެއެވެ.

އޭނާ ވިދާޅުވީ މި ދަނޑިވަޅުގައި އާންމުންގެ ފަރާތުން ކެތްތެރިކަމާއި އެއްބާރުލުމަށް އެދޭ ކަމަށެވެ.

ވޭމަންޑޫ އިންޖީނުގޭގައި ހިނގި ހާދިސާއާއި ގުޅިގެން އެންވަޔަރަމަންޓް މިނިސްޓްރީން ބުނީ ތ. ވޭމަންޑޫ އިންޖީނުގޭގައި ކުއްލިގޮތަކަށް އަލިފާނުގެ ހާދިސާއެއް ހިނގައި، ޚިދުމަތް ވަނީ މެދުކެނޑިފައި. ކަރަންޓު އިޢާދަކުރުމުގެ މަސައްކަތް ކުރިއަށްދާގޮތް ބެއްލެވުމަށް އެންވަޔަރަމަންޓް މިނިސްޓަރ ޑރ. ހުސައިން ރަޝީދު ހަސަން އަދި ފެނަކަ ކޯޕަރޭޝަންގެ މެނޭޖިންގ ޑިރެކްޓަރ އަހުމަދު ސައީދު ބުދަ ދުވަހު އެރަށަށް ވަޑައިގަންނަވާނެ ކަމަށެވެ. އަދި މި ދަތުރުގައި ޔުޓިލިޓީ ރެގިއުލޭޓަރީ އޮތޯރިޓީގެ އިންޖިނިއަރެއްވެސް ބައިވެރިވާނެ ކަމަށް އެންވަޔަަރަމަންޓް މިނިސްޓްރީން ބުނެއެވެ.

ތިމަރަފުށީ ދާއިރާގެ މެންބަރު އަބްދުﷲ ރިޔާޒް ވިދާޅުވީ ވޭމަންޑޫ އިންޖީނުގޭގައި ހިިގި އަލިފާނުގެ ހާދިސާ އާއި ގުޅިގެން ރައީސް އިބްރާހިމް މުހައްމަދު ސޯލިހު ފޯނުން ގުޅުއްވާ މައުލޫމާތު ހޯއްދެވި ކަމަށެވެ. އަދި ރައްޔިތުންނަށް އަވަހަށް ކަރަންޓު ލިބޭނެގޮތް ސަރުކާރުން ހަމަޖައްސަވާނެ ކަމަށެވެ. އަދި ސަރުކާރުގެ ހުރިހާ އިދާރާއެއް ގުޅިގެން ކުރައްވާ މަސައްކަތައް ރިޔާޒު ވަނީ ޝުކުރު އަދާކުރައްވާފައެވެ.