ކުރިއަށްއޮތް ތަނުގައި އެމްޕީއެލް ސަރަހައްދަށް މަސައްކަތަށް ވަދެވޭނީ ސޭފްޓީ ޕްރޮގްރާމް ފުރިހަމަ ކޮށްފައިވާ ފަރާތްތަކަށް އެކަނި

ކުރިއަށް އޮތްތަނުގައި މޯލްޑިވްސް ޕޯޓްސް ލިމިޓެޑް (އެމްޕީއެލް)ގެ ސަރަހައްދަށް ވަދެވޭނީ އެ ކުންފުނިން ހިންގާ "ޕޯޓް ވޯކަރ އިންޑަކްޝަން ޕްރޮގްރާމް" ފުރިހަމަކޮށްފައިވަ ފަރާތްތަކަށް އެކަނި ކަމަށް އެކުންފުނިން ބުނެފިއެވެ.

ބުދަ ދުވަހު އެމްޕީއެލުން ވަނީ، "ޕޯޓް ވޯކަރ އިންޑަކްޝަން ޕްރޮގްރާމް" ހިންގަން ފަށާފައެވެ. މި ޕްރޮގްރާމް ފައްޓަވައި ދެއްވީ އެމްޕީއެލްގެ ސީއީއޯ ޝާހިދު އަލީ އެވެ. ޝާހިދު އަލީ ވިދާޅުވީ ގޮތުގައި "ޕޯޓް ވޯކަރ އިންޑަކްޝަން ޕްރޮގްރާމް"އަކީ މުދާ ކްލިއަރ ކުރުމަށް އެމްޕީއެލްގެ ސަރަހައްދަށް ވަންނަ ފަރާތްތަކުގެ ސަލާމަތާއި ރައްކާތެރިކަން ކަށަވަރު ކުރުމާއި، އެފަރާތްތައް ޓްރެއިން ކުރުމަށް ހިންގާ ޕްރޮގްރާމެއް ކަމަށެވެ.

ނޫސްވެރިންނަށް މައުލޫމާތު ދެއްވަމުން ޝާހިދު ވިދާޅުވީ، މީގެކުރިން އެމްޕީއެލުން ސަލާމަތާއި ރައްކާތެރިކަމުގެ ޓްރެއިން ހިންގަމުންދިޔައީ ހަމައެކަނި، އެމްޕީއެލްގެ މުވައްޒަފުންނަށް އެކަނި ކަމަށެވެ. ނަމަވެސް އެމްޕީއެލް ސަރަހައްދު ބޭނުންކުރަނީ ހަމައެކަނި އެމްޕީއެލް މުވައްޒަފުން ނޫންކަމަށާއި މުދާ ކުލިއަރ ކުރުމަށް އެކިއެކި ކުންފުނިތަކުންނާއި މުދާ ކުލިއަރ ކުރާ ގްރޫޕްތަކުގެ ގިނަ ބަޔަކު ވަންނަމުންދާ ކަމަށެވެ. އަދި އެހެން ޕޯޓްތަކާއި ހިލާފަށް އެމްޕީއެލްގައި ޖާގައިގެ ދަތިކަމާހުރެ، ބޯޓު ފަހަރުތަކަށް މުދާ ލޯޑުކުރުމާއި އަންލޯޑު ކުރުމާއި، އަދި މުދާ ކުލިއަރ ކުރަމުން ގެންދަނީ އެމްޕީއެލްގެ ސަރަހައްދުން ކަމަށްވާތީ، ހާދިސާތައް ހިނގުމަކީ ވެދާނެ ކަމެއް ކަމަށާއި ނަމަވެސް އެފަދަ ހިތާމަވެރި ހާދިސާތައް ހިނގުން ވީހާވެސް މަދުކޮށް، އެފަދަ ހާދިސާތައް ނުހިނގާނެގޮތަށް ކަންކަން ބައްޓަން ކުރެވިފައިވާނެ ކަމަށެވެ.

ޝާހިދު ވިދާޅުވީ، ޕޯޓް ފަދަ ތަންތަނަކީ ވަރަށް ގިނަ ހިތާމަވެރި ހާދިސާތައް ހިނގާ ތަންތަނަށްވާތީ އަދި ހާއްސަކޮށް، އެމްޕީއެލްގައި މީގެ ކުރިންނާއި އަދި ފާއިތުވެދިޔަ ދެ މަސްދުވަހުގެ ތެރޭގައި ވަރަށް ހިތާމަވެރި ދެ ހާދިސާއެއް ހިނގައި ދެ މީހަކު ނިޔާވެފައިވާތީ، އެމްޕީއެލް ސަރަހައްދަށް މުދާ ކުލިއަރ ކުރަން ވަންނަ ފަރާތްތަކުގެ ސަލާމާތާއި ރައްކާތެރިކަމަށް ވަރަށް ބޮޑު އިސްކަމެއްދޭ ކަމަށެވެ. އެގޮތުން، ބުދަ ދުވަހު މި ފެށި ޓްރެއިނިންގ ޕްރޮގްރާމްގައި ބައިވެރި ނުވާ ފަރާތްތަކަށް މުދާ ކުލިއަރ ކުރުމަށް ނުވަތަ އެފަދަ އެއްވެސް މަސައްކަތެއް ކުރުމަށް ނުވަދެވޭނެ ކަމަށެވެ.

ޝާހިދު ވިދާޅުވީ، ކުރިއަށް އޮތް ހަ މަސް ދުވަހުގެ ތެރޭގައި މިހާރު ހިންގަމުން މިދާ ސޭފްޓީ އިންޑަކްޝަން ޕްރޮގްރާމް ނިމޭއިރު، އެމްޕީއެލް ސަރަހައްދަށް މުދާ ކުލިއަރ ކުރުމަށް ވަންނަމުންދާ އެންމެހާ ފަރާތްތަކަކީ އެ ޕްރޮގްރާމް ނިންމައި ސެޓްފިކެޓް ހާސިލްކޮށްފައިވާ ފަރާތްތަކެއް ކަމަށް ވާނެ ކަމަށެވެ. ޝާހީދު ވިދާޅުވީ، އެ ޓްރެއިން ޕްރޮގްރާމްގައި ބައިވެރި ނުވާ ފަރާތްތަކަށް އެމްޕީއެލް ސަރަހައްދަށް ވަނުމުގެ ފާސް ދޫނުކުރާނެ ކަމަށެވެ.

"ޕޯޓް ވޯކަރ އިންޑަކްޝަން ޕްރޮގްރާމް"އަކީ ހަ ގަޑިއިރުގެ ޕްރޮގްރާމެއް ކަމަށާއި އެ ޕްރޮގްރާމުގައި، މަސައްކަތްތެރިންގެ ސަލާމަތައި ރައްކާތެރިކަމާ ގުޅުންހުރި ފޮޓޯއާއި ވީޑިއޯ ކްލިޕްތައް ބޭނުންކޮށް، އެކަންކަމުން ރައްކާތެރިވުމަށް އަޅަންޖެހޭ ފިޔަވަޅުތަކަކީ ކޮބައިތޯ ދެނެގަނެ، މަސައްކަތްތެރިން އެކަންކަމަށް އަހުލުވެރި ކުރެވޭނެ ކަމަށް ވެސް ޝާހިދު ވިދާޅުވިއެވެ.

ޝާހިދު ވިދާޅުވީ، ކުރިއަށް އޮތްތަނުގައި އެމްޕީއެލް ސަރަހައްދަށް ވަންނަން ފާސް ދޫކުރެވޭނީ، އެމްޕީއެލަށް މުވައްޒަފުން ވަންނަންއެދޭ ޝަރުތުތަކުގެ ތެރޭގައި ހިމެނޭ ކުށުގެ ރެކޯޑް ފޯމް ވެސް ހުށަހެޅުމުން ކަމަށެވެ. މިހާރު ޕޮލިސް ރެކޯޑް ފޯމް ހުށަހެޅުމުން، އެމްޕީއެލް ސަރަހައްދަށް ވަންނަ ފާސް ދޫކުރިނަމަވެސް، ދެން ފާސް ދޫކުރަމުންދާނީ، ޕޮލިސް ކުށުގެ ރެކޯޑް ފޯމުގެ އިތުރުން، ޝަރުއީ ކޯޓުތަކާއި ޕްރޮސެކިއުޓަރ ޖެނެރަލް އޮފީހުން ކުށުގެ ރެކޯޑް ސާފުކުރުމަށްފަހުގައި ކަމަށެވެ.

މައުލޫމާތު ލިބިފައިވާ ގޮތުގައި އެމްޕީއެލް ސަރަހައްދަށް މުދާ ކުލިއަރ ކުރުމަށް 1500އަށްވުރެ ގިނަ ފަރާތްތަކަށް ފާސް ދޫކޮށްފައިވެއެވެ.