ފާއިތުވި އަހަރު ނިމުނު އިރު ގްރީން ފަންޑުގައި ޖުމްލަ 809.6 މިލިއަން ރުފިޔާ ހުރި ކަމަށް ފިނޭންސް މިނިސްޓްރީން ހާމަކޮށްފިއެވެ.

ފިނޭންސް މިނިސްޓްރީން އާންމުކޮށްފައިވާ އެންމެފަހުގެ މައުލޫމާތުތައް ދައްކާގޮތުން 2020 ވަނަ އަހަރު ފެށުނު އިރު ގްރީން ފަންޑުގައި ހުރީ 782.6 މިލިއަން ރުފިޔާއެވެ. ފާއިތުވި އަހަރުގެ ޖެނުއަރީ މަހު ގްރީން ފަންޑުން 584,873 ރުފިޔާ ހަރަދުކޮށްފައިވާއިރު، 85 މިލިއަން ރުފިޔާ ވަނީ ގްރީން ފަންޑަށް އިތުރުވެފައެވެ. ފެބްރުއަރީ މަހު 77 މިލިއަން ރުފިޔާ ފަންޑަށް އިތުރުވެފައިވާ އިރު، ފަންޑުން ހަރަދުކޮށްފައި ވަނީ 25.8 މިލިއަން ރުފިޔާއެވެ. އަދި މަރޗް މަހު ފަންޑަށް 74 މިލިއަން ރުފިޔާ އިތުރުވެފައިވާއިރު، 47.6 މިލިއަން ރުފިޔާ ވަނީ ފަންޑުން ހަރަދުކޮށްފައެވެ.

ފާއިތުވި އަހަރުވެ އޭޕްރިލް މަހު ބެލެންސްގެ ގޮތުގައި 27.9 މިލިއަން ރުފިޔާ ގްރީން ފަންޑުގައި ހުރި އިރު، 35.8 މިލިއަން ރުފިޔާ ވަނީ ފަންޑަށް އިތުރުވެފައެވެ. އަދި އެމަހު ގްރީން ފަންޑުން ހަރަދުކޮށްފައި ވަނީ 7.9 މިލިއަން ރުފިޔާއެވެ. މެއި މަހު 8 މިލިއަން ރުފިޔާ ފަންޑަށް އިތުރުވެފައިވާއިރު، 25 މިލިއަން ރުފިޔާ ވަނީ ފަންޑުން ހަރަދުކޮށްފައެވެ. އަދި ޖޫން މަހު ގްރީން ފަންޑުން 41 މިލިއަން ރުފިޔާ ހަރަދުކޮށްފައިވާއިރު، ފަންޑަށް އިތުރުވެފައި ވަނީ 4 މިލިއަން ރުފިޔާއެވެ. ޖުލައި މަހު 5.5 މިލިއަން ރުފިޔާ ފަންޑަށް އިތުރުވި އިރު، 14.8 މިލިއަން ރުފިޔާ ވަނީ ފަންޑުން ހަރަދުކޮށްފައެވެ.

މީގެ އިތުރުން އޮގަސްޓް މަހު ފަންޑަށް އިތުރުވެފައި ވަނީ 5.3 މިލިއަން ރުފިޔާއެވެ. އަދި ހަރަދުކޮށްފައި ވަނީ 6.3 މިލިއަން ރުފިޔާއެވެ. ސެޕްޓެމްބަރު މަހު ގްރީން ފަންޑަށް 7 މިލިއަން ރުފިޔާ އިތުރުވެފައިވާއިރު، ސެޕްޓެމްބަރު މަހަކީ ގްރީން ފަންޑުން އެންމެ ބޮޑު އަދަދެއް ހަރަދުކުރި މަހެވެ. އެމަހު 52.4 މިލިއަން ރުފިޔާ ވަނީ ފަންޑުން ހަރަދުކޮށްފައިވެއެވެ. އޮކްޓޫބަރު މަހު ގްރީން ފަންޑަށް 8.7 މިލިއަން ރުފިޔާ އިތުރުވެފައިވާއިރު، 21.9 މިލިއަން ރުފިޔާ ވަނީ ހަރަދުކޮށްފައެވެ. އަދި ނޮވެމްބަރު މަހު 16.5 މިލިއަން ރުފިޔާ ފަންޑަށް އިތުރުވި އިރު، ހަރަދުކޮށްފައި ވަނީ 20 މިލިއަން ރުފިޔާއެވެ.

އަހަރުގެ ފަހު މަހު ގްރީން ފަންޑަށް 25 މިލިއަން ރުފިޔާ އިތުރުވި އިރު، އެމަހު ގްރީން ފަންޑުން 43.3 މިލިއަން ރުފިޔާ ވަނީ ހަރަދުކޮށްފައެވެ. ޑިސެމްބަރު މަހު ގްރީން ފަންޑުގެ ބެލެންސްގެ ގޮތުގައި ހުރީ 18.23 މިލިއަން ރުފިޔާއެވެ.

ފިނޭންސްގެ ތަފާސްހިސާބުތައް ދައްކާގޮތުން 2020 ވަނަ އަހަރު ގްރީން ފަންޑަށް މުޅި ޖުމްލަ 378 މިލިއަން ރުފިޔާ އިތުރުވެފައިވާއިރު، ފަންޑުން ޖުމްލަ 349.10 މިލިއަން ރުފިޔާ ވަނީ ހަރަދުކޮށްފައެވެ.

ގްރީން ފަންޑަކީ ކުރީގެ ރައީސް ޑރ. ވަހީދުގެ ވެރިކަމުގައި ފެނާއި، ނަރުދަމާ އާއި، އިއާދަކުރަނިވި ހަކަތައާއި، ކުނި މެނޭޖް ކުރުމުގެ ދާއިރާއިން އެކިއެކި މަޝްރޫޢުތައް ހިންގުމަށާއި، މިދާއިރާއިން މީހުން ބިނާކުރުމަށް ބޭނުންވާ ފައިސާ ހޯދުމަށް ދަތިވެފައިވާތީ، މިކަންކަމަށް ބޭނުންވާ ފައިސާ ހޯދާނެ ހަރުދަނާ ނިޒާމެއް ޤާއިމް ކުރުމަށާއި، މިދާއިރާތަކަށް ބޭރުގެ ފަރާތްތަކުން ލިބޭ އެހީ އިތުރުކުރުމަށް އުފެއްދި ފަންޑެކެވެ. މި ފަންޑަށް ފައިސާ ޖަމާކުރަނީ ގްރީން ޓެކުހުގެ ގޮތުގައި ފަތުރުވެރިކަމުގެ ސިނާޢަތުގައި ހަރަކާތްތެރިވާ ފަރާތްތަކުގެ އަތުން ކޮންމެ ފަތުރުވެރިއެއްގެ ބޮލަކަށް ނެގޭ ޑޮލަރުންނެވެ.

ރިސޯޓްތަކާއި ސަފާރީތައް އަދި ހޮޓާ ތަކަށް ޗުއްޓީ ހޭދަކޮށްލަން އަންނަ ފަތުރުވެރިންގެ އަތުން ގްރީން ޓެކުހުގެ ގޮތުގައި ނަގަނީ ހަ ޑޮލަރެވެ. އަދި ގެސްޓްހައުސް ތަކުގައި ޗުއްޓީ ހޭދަޮށްލަން އަންނަ ފަތުރުވެރިންގެ އަތުން ގްރީން ޓެކުހުގެ ގޮތުގައި ނަގަނީ ތިން ޑޮލަރެވެ. 

ކޮވިޑުގެ ހާލަތާ ގުޅިގެން ރާއްޖޭގެ ފަތުރުވެރިކަން ހުއްޓުމަކަށް އައުމާ ގުޅިގެން ގްރީން ޓެކްސްގެ ގޮތުގައި ދައުލަތަށް ލިބެމުން ދިޔަ އާމްދަނީ ދެވަނަ ކުއާޓަރުގައި އެއްކޮށް ހުއްޓުނެވެ. 2020 ވަނަ އަހަރުގެ ޖުލައި 15 ގައި އަލުން ބޯޑަރުތައް ހުޅުވާލި ނަމަވެސް، މި ހާލަތުގެ ކުރިން އޮތް އަދަދާ އެއްވަރަށް ރާއްޖެއަށް ފަތުރުވެރިން އަންނަން ފަށާފައެއް ނުވެއެވެ.