ގއ.އަތޮޅު ތަރައްގީ ކުރުމުގައި އެއްވެސް ރަށެއްގެ އާބާދީއަށް ނުބަލާ އެރަށެއްގެ ތަރައްގީއަށް އެންމެ ބޭނުންވާ މަޝްރޫއުތައް ކުރިއަށް ގެންދާނެކަމުގެ ޔަގީންކަން ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު ދެއްވައިފިއެވެ.

ގއ. އަތޮޅުގެ ކެންޑިޑޭޓުންނާއެކު ކެންޕެއިން ބައްދަލުވުން އާދިއްތަ ދުވަހުގެ ރޭ ވަނީ ބާއްވާފައެވެ. ސިލްސިލާކޮށް ބާއްވާ ރަށްވެހި ފަތިސް ކެންޕެއިންގައި ކޮލަމާފުށި، ވިލިނގިލި، ދާންދޫ، ދެއްވަދޫ، މާމެންދޫ، ގެމަނަފުށި، ކަނޑުހުޅުދޫ، ކޮނޑޭ އަދި ނިލަންދޫއަށް މިހާރު އެންމެ ބޭނުންވާ ތަރައްގީގެ މަޝްރޫއުތަކާއި، މިހާރު ރައްޔިތުންނަށް ދިމާވެފައިވާ އެންމެ ބޮޑެތި ދަތިތަކާއި ކަންބޮޑުވުންތައް އެރަށްތަކުގެ ކެންޑިޑޭޓުން ހިއްސާކޮށްފައިވެއެވެ.

އެގޮތުން ސިއްހީ ނިޒާމު އިތުރަށް ހަރުދަނާ ކުރުމާއި، ބިން ހިއްކުމުގެ މަޝްރޫއުތަކާއި، ތައުލީމީ ގޮތުން ދިމާވާ ދަތިތަކާއި، މަސްވެރިކަމުގެ ސިނާއަތް ކުރިއެރުމާއި، މަގުހެދުމާއި، ބޯހިޔާވަހިކަމުގެ މަޝްރޫއުތަކުގެ އިތުރުން ޒުވާނުންނަށް ޚާއްސަކޮށްގެން ރަށްރަށުގައި ގާއިމް ކުރާ ކުޅިވަރު ކުޅޭ ދަނޑުތަކާއި ޒުވާނުންގެ މަރުކަޒު ގާއިމްކުރުމަށް ހުށަހަޅާފައިވެއެވެ. ބައެއް ރަށްރަށަށް ދިމާވެފައިވާ ރަށްގިރުމުގެ މައްސަލަތައް ހުށަހަޅާފައިވާއިރު، މިހާރު ގާއިމްކޮށްފައިވާ ބަނދަރުތައް އިތުރަށް ތަރައްގީ ކުރުމަށް ހުށަހަޅާފައިވެއެވެ. މީގެ އިތުރުން ފެރީގެ ނިޒާމު މިހާރަށް ވުރެ ބޮޑަށް ހަރުދަނާ ކުރުމާއި، ފެނާއި ނަރުދަމާގެ މަޝްރޫއުތައް ވީހާވެސް އަވަހަށް ކުރިއަށް ގެންދިއުމަށް އެދިފައިވެއެވެ. އަދި ބައެއް މަޝްރޫއުތައް ކުރިއަށްދާލެއް ލަސްވުމާއެކު އެކަމުގެ ކަންބޮޑުވުން ވެސް ބައެއް ކެންޑިޑޭޓުން ފާޅުކޮށްފައިވެއެވެ.

މިހުރިހާ ރަށަކުން ވެސް ހުށަހެޅި ހުށަހެޅުންތަކަށް ރައީސް ސޯލިހު ވަނީ ވަރަށް އުންމީދީ މެސެޖްތަކެއް ދެއްވާފައެވެ. އެގޮތުން މިހާރު ކުރިއަށްދާ މަޝްރޫއުތަކުގެ އެންމެފަހުގެ މައުލޫމާތުތައް ދީފައިވާއިރު، ހުރިހާ ރަށަކަށް ވެސް ތަރައްގީ ގެނެސްދޭނެކަމުގެ ޔަގީންކަން އެމަނިކުފާނު ދެއްވާފައިވެއެވެ. ރައީސް ސޯލިހު ވިދާޅުވީ އާބާދީ ކުޑަ ރަށެއް ނަމަވެސް އެއްވެސް ރަށަކީ ބާކީ ކުރެވޭނެ ރަށެއް ނޫން ކަމަށާއި، ރަށެއްގެ އާބާދީއަށް ނުބަލާ އެރަށެއްގެ ތަރައްގީއަށް އެންމެ ބޭނުންވާ މަޝްރޫއުތައް ކުރިއަށް ގެންދާނެ ކަމަށެވެ.

ރައީސް ސޯލިހު ވިދާޅުވީ އަތޮޅުތެރޭގެ ސިއްހީ ނިޒާމަށް އަބަދުވަސް އަހައްމިއްޔަތުކަން ދޭ ކަމަށާއި، އެމްބިއުލެންސްގެ ދަތިކަން ފޯރާފައިވާ ރަށްތަކަށް އެމްބިއުލެންސް ލިބޭނެ ކަމަށެވެ. އެގޮތުން ނިލަންދޫއަށް ބޭނުންވާ އެމްބިއުލާންސް މިމަސް ނިމެންވާއިރަށް ގެންދެވޭނެކަމުގެ ޔަގީންކަން އެމަނިކުފާނު ދެއްވާފައިވެއެވެ.

ރައީސް ސޯލިހު ވިދާޅުވީ ރަށްތަކަށް ބޭނުންވާ އަސީސީ ޚިދުމަތްތައް ފޯރުކޮށްދިނުމުގައި ސަރުކާރުން ފަސް ނުޖެހޭނެ ކަމަށާއި، މިހާރު ވެސް ގިނަ މަޝްރޫއުތައް ކުރިއަށްދާ ކަމަށެވެ. އަދި ގެމަނަފުށީގެ ފެނުގެ މައްސަލައަށް ހައްލެއް ހޯދުމަށް، މިމަހުގެ 28 ވަނަ ދުވަހު ކޮންޓްރެކްޓަރާއިއެކު ސޮއިކުރެވޭނެކަން އެމަނިކުފާނު ފާހަގަކުރެއްވިއެވެ.

މީގެ އިތުރުން ރައީސް ސޯލިހު ވިދާޅުވީ 2020ގައި ކުރިއަށް ގެންދަން ނިންމާފައިވާ ތަރައްގީގެ ބައެއް މަޝްރޫއުތައް ކުރިއަށް ނުގެންދެވުނު ނަމަވެސް މިއަހަރު އެމަޝްރޫއުތަކަށް އިސްކަންދޭނެ ކަމަށެވެ. އެގޮތުން 2021 ވަނަ އަހަރުގައި އިސްކަންދޭ ރަށްރަށުގެ ތެރޭގައި ދާންދޫ ހިމަނާފައިވާ ކަމަށްވެސް ރައީސް ސޯލިހު ވިދާޅުވިއެވެ.