ރާއްޖޭގެ ޚާރިޖީ ސިޔާސަތަކީ އިންޑިއާ ފަރސްޓް: ރައީސް ނަޝީދު
20 ފެބުރުއަރީ 2021 | ހޮނިހިރު 13:06ރާއްޖެއާއި އިންޑިއާއާ ދެމެދު އިތުރު އެއްބަސްވުންތަކުގައި ސޮއި ކުރެވިގެން ދާނެ
ހޮނިހިރު ދުވަހު އެކުވެނި ސިންތެޓިކް ޓްރެކްގައި އޮތް ޚާއްސަ ރަސްމިއްޔާތުގެ ތެރެއިން- މި ރަސްމިއްޔާތު ޝަރަފުވެރިކޮށްދެއްވީ އިންޑިއާގެ ޚާރިޖީ ވަޒީރު ޑރ ޖައިޝަންކަރު
ރާއްޖޭގެ ޚާރިޖީ ސިޔާސަތަކީ "އިންޑިއާ ފަރސްޓް" ކަމަށް ރައްޔިތުންގެ މަޖިލީހުގެ ރައީސް، ރައީސް މުޙައްމަދު ނަޝީދު ވިދާޅުވެއްޖެއެވެ.
ހޮނިހިރު ދުވަހު އެކުވެނި ސިންތެޓިކް ޓްރެކްގައި އޮތް ޚާއްސަ ރަސްމިއްޔާތުގައި ވާހަކަ ދައްކަވަމުން ރައީސް ނަޝީދު ވިދާޅުވީ، އިންޑިއާއަކީ ރާއްޖެއަށް ދިމާވި ކޮންމެ ކަމެއްގައި އެންމެ ކުރީ ބައިގައި އެހީތެރިކަން ފޯރުކޮށްދޭ ޤައުމުކަމަށެވެ. އެގޮތުން ބަޢާވާތެއް ނަމަވެސް، ފެނުގެ ކާރިސާއެއް ނަމަވެސް، ނުވަތަ ސުނާމީ ކާރިސާއާއި ބަލިމަޑުކަމެއް ނަމަވެސް، އެންމެ ކުރިން ރާއްޖެއަށް އެހީތެރިކަން ފޯރުކޮށްދެނީ އިންޑިއާކަން ރައީސް ނަޝީދު ފާހަގަ ކުރެއްވިއެވެ.
އަދި ރާއްޖޭގެ ޚާރިޖީ ސިޔާސަތަކީ "އިންޑިއާ ފުރަތަމަ" ކަމަށް ވިދާޅުވަނީ އެ ސަބަބުތަކާހުރެ ކަމަށް ރައީސް ނަޝީދު ވިދާޅުވިއެވެ. ރައީސް ނަޝީދު ވިދާޅުވީ، ކުރިއަށް އޮތް ތަނުގައި ރާއްޖެއާއި އިންޑިއާއާ ދެމެދު އިތުރު އެއްބަސްވުންތަކުގައި ސޮއި ކުރެވިގެން ދާނެ ކަމަށެވެ.
މި ރަސްމިއްޔާތުގައި ވާހަކަ ދައްކަވަމުން އިންޑިއާގެ ޚާރިޖީ ވަޒީރު ޑރ. ސުބުރަމަންޔަން ޖައިޝަންކަރު ވިދާޅުވީ، ރާއްޖެ ފާހަގަ ކުރެވެނީ ހަމައެކަނި ރާއްޖޭގެ ޤުދުރަތީ ރީތިކަމުގެ ސަބަބުން ނޫން ކަމަށެވެ. އެގޮތުން ރާއްޖޭގެ ރައްޔިތުންނާއި، ހުނަރުވެރި ޒުވާނުންނަކީ ވެސް ރާއްޖެ އެތައް ގޮތަކުން ފާހަގަކުރެވިގެންދާ ސަބަބެއްކަން ޖައިޝަންކަރު ފާހަގަ ކުރެއްވިއެވެ.
އެގޮތުން 2019 ވަނަ އަހަރުގެ އައިއޯއައިޖީގައި ރާއްޖެއިން ހޯދި ކާމިޔާބީއާއި، ދެކުނު އޭޝިއާގައި އެންމެ ބާރު ދުވުންތެރިއެއްގެ ގޮތުގައި ފާހަގަވި ހަސަން ސާއިދުގެ ވާހަކައިން ޖައިޝަންކަރު ވަނީ މިސާލު ޖައްސަވާފައެވެ. އަދި 2025 ވަނަ އަހަރު ރާއްޖޭގައި ބޭއްވުމަށް މަޝްވަރާ ކުރަމުންދާ އައިއޯއައިޖީގައި ވެސް ރާއްޖެއިން އިތުރު ކާމިޔާބީތަކެއް ހޯދާނެކަމުގެ އުުއްމީދު އެބައޮތްކަމަށް ވިދާޅުވިއެވެ.
ޑރ ޖައިޝަންކަރުގެ ދަތުރުފުޅުގައި ވަނީ މުހިއްމު އެއްބަސްވުންތަކެއްގައި ދެ ޤައުމުން ސޮއި ކޮށްފައެވެ.
