ކައިރި ދެ ރިސޯޓެއްގެ މުވައްޒަފުންނާ އެކު ވަން އެންޑް އޮންލީ ރީތިރަށް ރިސޯޓުގައި ވެކްސިން ޖަހަން ފަށައިފި
އެ ރިސޯޓުގައި 700ށް ވުރެ ގިނަ މުވައްޒަފުން ތިބޭ
ވަން އެންޑް އޮންލީ ރީތި ރަށް ރިސޯޓުގައި ވެކްސިންޖަހަން ފެށުން
ކައިރި ދެ ރިސޯޓެއްގެ މުވައްޒަފުންނާ އެކު ވަން އެންޑް އޮންލީ ރީތިރަށް ރިސޯޓުގައި ވެކްސިންޖަހަން ފަށައިފިއެވެ.
ރީތި ރަށް ރިސޯޓުގެ އެޗްއާރް މެނޭޖަރ މުހައްމަދު ޝަރަފް ރާއްޖެ އެމްވީ އަށް ވިދާޅުވީ އެ ރިސޯޓުގައި ވެކްސިން ޖަހަން ފެށީ ހުކުރު ދުވަހުގެ މެންދުރު 2 ޖެހި އިރު ކަމަށެވެ. ރިސޯޓުގައި ޖުމްލަ 700ށް ވުރެ ގިނަ މުވައްޒަފުން ތިބޭއިރު، މިއަދު އެކަނި 100 މުވައްޒަފުންނަށް ވެކްސިން ޖަހަން ހަމަޖައްސާފައިވާނެ ކަމަށް އޭނާ ވިދާޅުވިއެވެ.
ޝަރަފް ވިދާޅުވީ ރިސޯޓުގައި ވެކްސިން ޖަހަނީ އެ ރިސޯޓުން ތައްޔާރުކޮށްފައިވާ ލިސްޓަކަށް ކަމަށެވެ. އެގޮތުން އެންމެ އިސްކަން ދީފައި ވާނީ ފަތުރުވެރިންނާ އެންމެ ގާތުން މަސައްކަތްކުރާ މީހުންނަށް ކަމަށް ވެސް އޭނާ ވިދާޅުވިއެވެ. އަދި އެޗްޕީއޭއިން އަންގާފައިވާ ގޮތަށް ހައި ރިސްކު މީހުންނަށް ވެސް އިސްކަން ދީފައިވާނެ ކަމަށް ވިދާޅުވިއެވެ.
ޝަރަފް ވިދާޅުވީ އެ ރިސޯޓުގައި ވެކްސިން ޖަހަނީ ކައިރި ދެ ރިސޯޓެއްގެ މުވައްޒަފުންނާ އެކުގައި ކަމަށެވެ. އެގޮތުން، ސަމާ އައިލެންޑް ރިސޯޓާއި ވާރު ރިސޯޓުގެ މުވައްޒަފުންނަށް ވެސް ވެކްސިން ޖަހާނީ ރީތި ރަށް ރިސޯޓުގައި ކަމަށް އޭނާ ވިދާޅުވިއެވެ. އޭނާ ވިދާޅުވީ ދެ ރިސޯޓުގައި ވެސް ވެކްސިން ޖަހަނީ ރިސޯޓުތަކުން ފޮނުވާފައިވާ ލިސްޓަކަށް ކަމަށެވެ.
ރާއްޖޭގައި މި މަހު އެކެއްގައި ވެކްސިން ޖަހަން ފަށާފައިވާއިރު ޓޫރިޒަމް ދާއިރާގައި މަސައްކަތްކުރާ މީހުންނާއި ރިސޯޓު މުވައްޒަފުންނަށް ވެކްސިން ޖަހަން ފެށީ މި މަހު 15ގައެވެ. ފުރަތަމަ ދުވަހު އެކަނި ވެސް އެ ދާއިރާގައި މަސައްކަތްކުރާ 99 މީހުން ވެކްސިން ޖަހާފައިވެއެވެ. އޭގެ ފަހުން އެކި ރިސޯޓުތަކުން ވެކްސިން ޖަހަން ފަށައި އެކަން މިހާރު ދަނީ ކުރިއަށެވެެ.
ކޮވިޑްގެ ވެކްސިން އެންމެ ފުރަތަމަ ޖަހަން ފެށީ ސިއްހީ ޚިދުމަތްތެރިންނާއި ފްރޮންޓްލައިން މަސައްކަތްތެރީންނަށެވެ. އެއަށްފަހު މިހާރު ވެކްސިން ޖަހަމުންދަނީ އުމުރުން 18 އަހަރާއި 50 އަހަރާ ދެމެދު އުމުރުފުރައިގެ މީހުންގެ ތެރެއިން ދިގު މުއްދަތަކަށް ބޭސް ބޭނުންކުރާ މީހުންނާއި އުމުރުން 65 އަހަރުން މަތީގެ މީހުންނަށެވެ.
