ކ. މާލެ
|
17 ފެބްރުއަރީ 2021 | ބުދަ 16:14
ރާއްޖެޓީވީގެ \"ކުޅިވަރު ފައިލް\" ޕްރޮގްރާމުގައި ކޮމިޝަނާ އޮފް ސްޕޯޓްސް ހީނާ އަޙްމަދު ސަލީމް (ބޮޑުހީނާ)
ރާއްޖެޓީވީގެ "ކުޅިވަރު ފައިލް" ޕްރޮގްރާމުގައި ކޮމިޝަނާ އޮފް ސްޕޯޓްސް ހީނާ އަޙްމަދު ސަލީމް (ބޮޑުހީނާ)
ރާއްޖެ އެމްވީ
ޤައުމީ ކުޅުންތެރިންގެ ދިފާޢުގައި ހީނާ
ޤައުމީ ކުޅުންތެރިންނަކީ ޓެރަރިސްޓުން ނޫންކަން ސަރުކާރުން ޔަގީންކޮށްދޭން ޖެހޭ: ހީނާ
 
ކުޅުންތެރިންގެ ދިފާއުގައި ދައްކަން ޖެހޭ ކޮންމެ ވާހަކައެއް ދައްކާނެ
 
ބައިނަލްއަގުވާމީ ގޮތުން ބޮޑު މައްސަލައެއް ނުކުމެދާނެ ކަމަށް ވިދާޅުވި

ޤައުމީ ކުޅުންތެރިންނަކީ ޓެރަރިސްޓުން ނޫންކަން ސަރުކާރުން ޔަގީންކޮށްދޭން ޖެހޭ ކަމަށް ކޮމިޝަނާ އޮފް ސްޕޯޓްސް ހީނާ އަޙްމަދު ސަލީމް (ބޮޑުހީނާ) ވިދާޅުވެއްޖެއެވެ.

ދާދި ފަހުން ސޯޝަލް މީޑިއާގައި ވަނީ ރާއްޖޭގައި އުފެދުނު އެންމެ މޮޅު ފުޓްބޯޅަ ކުޅުންތެރިޔާ އަލީ އަޝްފާގު (ދަގަނޑޭ) އަދި ޤައުމީ ފުޓްބޯޅަ ޓީމުގެ ކެޕްޓަން އަކުރަމް އަބްދުލް ޣަނީ (އަކޫ) އާ ގުޅުވައިގެން ވާހަކަތަކެއް ފަތުރާފައެވެ. އެގޮތުން އެ ކުޅުންތެރިންނަކީ ސީރިއާއަށް ޖިހާދުވާން ދިޔުމަށް ތައްޔާރުވެފައިވާ ބައެއް ކަމަށާއި، ޓީމު ބަލިވެއްޖެނަމަ ދަނޑުވެސް ގޮއްވާލާނެ ކަމަށް ބުނެ ސޯޝަލް މީޑިއާގައި ވާހަކަތަކެއް ފެތުރުނެވެ.

އެއާއެކު އެކަން ގިނަ ދިވެހިން ވަރަށް ހަރުކަށި އިބާރާތުން ކުށްވެރިކުރިއިރު، ޤައުމީ ކުޅުންތެރިންގެ ދިފާއުގައި ކުޅިވަރާ ބެހޭ ވަޒީރު އަޙްމަދު މަޙްލޫފާއި، ސްޕޯޓްސް ކޯޕަރޭޝަންގެ ޗެއާމަން ހުސެއިން މުޙައްމަދު އަދި ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) ގެ ރައީސް ބައްސާމް އަދީލް ޖަލީލުވެސް ވަނީ ވާހަކަދައްކަވާފައެވެ.

ރާއްޖެޓީވީގެ "ކުޅިވަރު ފައިލް" ޕްރޮގްރާމުގައި ވާހަކަދައްކަވަމުން ހީނާ ވިދާޅުވީ ދާދި ފަހުން ފެތުރުނު ވާހަކަތަކުގެ ސަބަބުން ބައިނަލްއަގުވާމީ ގޮތުން ބޮޑު މައްސަލައެއް ނުކުމެދާނެ ކަމަށެވެ. އެގޮތުން ސޯޝަލް މީޑިއާގައި އެ ކުޅުންތެރިންނާ ދިމާލަށް ޓެރަރިސްޓުންނޭ ބުނެފައިވާއިރު، ބައިނަލްއަގުވާމީ މައިދާނުގައި ކުޅުންތެރިންނަށް ދަތިތަކާ ކުރިމަތިލާން ޖެހުމުގެ ފުރުސަތު އެބައޮތް ކަމަށްވެސް ބުންޏެވެ. އެހެންކަމުން އެކަމާ ދެކޮޅަށް ސަރުކާރުންވެސް ނުކުންނަން ޖެހޭ ކަމަށްވެސް ހީނާ ވިދާޅުވިއެވެ.

ހަގީގަތުގައި ސޯޝަލް މީޑިއާގައި ބުނެފައި އޭނީ ޓެރަރިސްޓެއްގެ ގޮތުގައި. މާދަމާ އަޅުގަނޑުމެން ދާންވީ އިންޓަނޭޝަނަލް މެޗެއް ކުޅެން ގައުމަކަށް. ދާއިރު އެ މައްސަލަތައް އަންނަން ފަށާނެ. ހަގީގަތުގައި އެއިން ތަނަކަށްދާއިރުގައި ޓެރަރިސްޓެއް އެތެރެވިޔަކަ ނުދޭނެ ކުޅޭކަށްވެސް. ދެން އަޅުގަނޑުމެންނަށް ކުރެވޭނެ އެއްވެސް ކަމެއް ނޯންނާނެ. އަޅުގަނޑުމެން ސަރުކާރުންވެސް އަޅުގަނޑުމެން އެބަޖެހޭ ވަރަށް ބޮޑަށް އެއާ އިދިކޮޅަށް ނުކުންނަން.
ކޮމިޝަނާ އޮފް ސްޕޯޓްސް ހީނާ އަޙްމަދު ސަލީމް (ބޮޑުހީނާ)

ހީނާ އިތުރަށް ވިދާޅުވީ ޤައުމީ ކުޅުންތެރިންނާ ދިމާލަށް ޓެރަރިސްޓުންނޭ ބުނުމުގެ ހައްގެއް އެއްވެސް މީހަކަށް ނޯންނާނެ ކަމަށާއި، އެއީ ޤާނޫނީ ގޮތުންވެސް ކުށްވެރިވާން ޖެހޭ ކަމެއް ކަމަށެވެ. އެގޮތުން އެއްވެސް މީހަކު ކުޅިވަރު ކުޅުނަސް ނުވަތަ ނުކުޅުނަސް، އެ މީހެއްގެ އަބުރާބެހި، އެ މީހެއްގެ ހަގީގަތް ނޭނގި އެ މީހެއް ބަދުނާމުކުރާ ވާހަކަ ދައްކައިގެންނުވާނެ ކަމަށާއި، އެއީ ވަކި ކުޅިވަރު ކުޅޭ މަޝްހޫރު މީހެއް ކަމުގައި ވެގެން އޮންނަން ވަކި އުސޫލެއް ނޫން ކަމަށްވެސް ވިދާޅުވިއެވެ.

އަދި ރާއްޖޭގެ ކުޅިވަރުގައި އޮތީ ވަރަށް ބަދަހި އާއިލާއެއް ކަމަށާއި، އެ ކުޅުންތެރިންގެ ދިފާއުގައި ދައްކަން ޖެހޭ ކޮންމެ ވާހަކައެއް ކުޅިވަރުގެ އާއިލާއިން ދައްކާނެ ކަމަށްވެސް ހީނާ ވިދާޅުވިއެވެ.

އެންމެ މީހަކު މަރުވާއިރަށް އަހަރެމެން އެންމެން ދާނެ. އެންމެން އެއްކޮށް ފެތޭނީވެސް. އެހެންވީމަ އެންމެ މީހެއް ފެތޭކަށް ދޫނުކުރާނެ. އެހެން އަދި މީހެއް އެއްޗެއް ބުނެލީމަ އަޅުގަނޑުމެން ބިރެއްވެސް ނުގަންނާނެ. އަޅުގަނޑުމެން އެ ކުޅުންތެރިންގެ ދިފާއުގައި ދައްކަން ޖެހޭ ކޮންމެ ވާހަކައެއް ދައްކާނަން. އެއީ ކޮންމެހެން ވަކި ކުޅިވަރެއް ވެގެނެއް ނޫން.
ކޮމިޝަނާ އޮފް ސްޕޯޓްސް ހީނާ އަޙްމަދު ސަލީމް (ބޮޑުހީނާ)

ޤައުމީ ކުޅުންތެރިންގެ ދިފާޢުގައި ހީނާ ވާހަކަދެއްކެވިއިރު، މީގެ ކުރިން އެފްއޭއެމުންވެސް ވަނީ ޤައުމީ ކުޅުންތެރިންނާ ގުޅުވައިގެން ސޯޝަލް މީޑިއާގައި ވާހަކަތެއް ފެތުރި ވާހަކަތަކުގެ މައްސަލަ ފުރިހަމައަށް ތަޙުޤީޤު ކުރުމަށް ގޮވާލާފައެވެ.

އެންމެ ފަހުން އަޕްޑޭޓް ކުރީ: 3 މަސް ކުރިން
ރިވިއު ކުރީ: ހުސައިން ފަރިޔާޒް
75%
25%
0%
0%
0%
0%
ކޮމެންޓް