ޤައުމީ ކުޅުންތެރިންނަކީ ޓެރަރިސްޓުން ނޫންކަން ސަރުކާރުން ޔަގީންކޮށްދޭން ޖެހޭ: ހީނާ

ޤައުމީ ކުޅުންތެރިންނަކީ ޓެރަރިސްޓުން ނޫންކަން ސަރުކާރުން ޔަގީންކޮށްދޭން ޖެހޭ ކަމަށް ކޮމިޝަނާ އޮފް ސްޕޯޓްސް ހީނާ އަޙްމަދު ސަލީމް (ބޮޑުހީނާ) ވިދާޅުވެއްޖެއެވެ.

ދާދި ފަހުން ސޯޝަލް މީޑިއާގައި ވަނީ ރާއްޖޭގައި އުފެދުނު އެންމެ މޮޅު ފުޓްބޯޅަ ކުޅުންތެރިޔާ އަލީ އަޝްފާގު (ދަގަނޑޭ) އަދި ޤައުމީ ފުޓްބޯޅަ ޓީމުގެ ކެޕްޓަން އަކުރަމް އަބްދުލް ޣަނީ (އަކޫ) އާ ގުޅުވައިގެން ވާހަކަތަކެއް ފަތުރާފައެވެ. އެގޮތުން އެ ކުޅުންތެރިންނަކީ ސީރިއާއަށް ޖިހާދުވާން ދިޔުމަށް ތައްޔާރުވެފައިވާ ބައެއް ކަމަށާއި، ޓީމު ބަލިވެއްޖެނަމަ ދަނޑުވެސް ގޮއްވާލާނެ ކަމަށް ބުނެ ސޯޝަލް މީޑިއާގައި ވާހަކަތަކެއް ފެތުރުނެވެ.

އެއާއެކު އެކަން ގިނަ ދިވެހިން ވަރަށް ހަރުކަށި އިބާރާތުން ކުށްވެރިކުރިއިރު، ޤައުމީ ކުޅުންތެރިންގެ ދިފާއުގައި ކުޅިވަރާ ބެހޭ ވަޒީރު އަޙްމަދު މަޙްލޫފާއި، ސްޕޯޓްސް ކޯޕަރޭޝަންގެ ޗެއާމަން ހުސެއިން މުޙައްމަދު އަދި ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) ގެ ރައީސް ބައްސާމް އަދީލް ޖަލީލުވެސް ވަނީ ވާހަކަދައްކަވާފައެވެ.

ރާއްޖެޓީވީގެ "ކުޅިވަރު ފައިލް" ޕްރޮގްރާމުގައި ވާހަކަދައްކަވަމުން ހީނާ ވިދާޅުވީ ދާދި ފަހުން ފެތުރުނު ވާހަކަތަކުގެ ސަބަބުން ބައިނަލްއަގުވާމީ ގޮތުން ބޮޑު މައްސަލައެއް ނުކުމެދާނެ ކަމަށެވެ. އެގޮތުން ސޯޝަލް މީޑިއާގައި އެ ކުޅުންތެރިންނާ ދިމާލަށް ޓެރަރިސްޓުންނޭ ބުނެފައިވާއިރު، ބައިނަލްއަގުވާމީ މައިދާނުގައި ކުޅުންތެރިންނަށް ދަތިތަކާ ކުރިމަތިލާން ޖެހުމުގެ ފުރުސަތު އެބައޮތް ކަމަށްވެސް ބުންޏެވެ. އެހެންކަމުން އެކަމާ ދެކޮޅަށް ސަރުކާރުންވެސް ނުކުންނަން ޖެހޭ ކަމަށްވެސް ހީނާ ވިދާޅުވިއެވެ.

ހީނާ އިތުރަށް ވިދާޅުވީ ޤައުމީ ކުޅުންތެރިންނާ ދިމާލަށް ޓެރަރިސްޓުންނޭ ބުނުމުގެ ހައްގެއް އެއްވެސް މީހަކަށް ނޯންނާނެ ކަމަށާއި، އެއީ ޤާނޫނީ ގޮތުންވެސް ކުށްވެރިވާން ޖެހޭ ކަމެއް ކަމަށެވެ. އެގޮތުން އެއްވެސް މީހަކު ކުޅިވަރު ކުޅުނަސް ނުވަތަ ނުކުޅުނަސް، އެ މީހެއްގެ އަބުރާބެހި، އެ މީހެއްގެ ހަގީގަތް ނޭނގި އެ މީހެއް ބަދުނާމުކުރާ ވާހަކަ ދައްކައިގެންނުވާނެ ކަމަށާއި، އެއީ ވަކި ކުޅިވަރު ކުޅޭ މަޝްހޫރު މީހެއް ކަމުގައި ވެގެން އޮންނަން ވަކި އުސޫލެއް ނޫން ކަމަށްވެސް ވިދާޅުވިއެވެ.

އަދި ރާއްޖޭގެ ކުޅިވަރުގައި އޮތީ ވަރަށް ބަދަހި އާއިލާއެއް ކަމަށާއި، އެ ކުޅުންތެރިންގެ ދިފާއުގައި ދައްކަން ޖެހޭ ކޮންމެ ވާހަކައެއް ކުޅިވަރުގެ އާއިލާއިން ދައްކާނެ ކަމަށްވެސް ހީނާ ވިދާޅުވިއެވެ.

ޤައުމީ ކުޅުންތެރިންގެ ދިފާޢުގައި ހީނާ ވާހަކަދެއްކެވިއިރު، މީގެ ކުރިން އެފްއޭއެމުންވެސް ވަނީ ޤައުމީ ކުޅުންތެރިންނާ ގުޅުވައިގެން ސޯޝަލް މީޑިއާގައި ވާހަކަތެއް ފެތުރި ވާހަކަތަކުގެ މައްސަލަ ފުރިހަމައަށް ތަޙުޤީޤު ކުރުމަށް ގޮވާލާފައެވެ.