ދިވެހިރާއްޖޭގައި ޤައުމީ ފެންވަރެއްގައި ފުރަތަމަ ފަހަރަށް ޑޮޖްބޯލް ތަޢާރަފް ކުރުމަށް ތަމްރީންތަކެއް ބޭއްވުމަށް ނިންމާފައިވާ ކަމަށް މޯލްޑިވްސް ސްޕޯޓްސް ކޯޕަރޭޝަން ލިމިޓެޑުން ބުނެފި އެވެ.

ސްޕޯޓްސް ކޯޕަރޭޝަނުން ބުނީ، ޤައުމީ ފެންވަރުގައި ޑޮޖްބޯލް ތައާރަފް ކުރުމަށް އެކޯޕަރޭޝަނާއި، މެލޭޝިއާގެ ޑޮޖްބޯލް ފެޑެރޭޝަނާއި ގުޅިގެން ބާއްވާ ތަމްރީންތައް މިމަހުގެ 29 އަދި 30 ގައި ބޭއްވުމަށް ތާވަލް ކޮށްފައިވާ ކަމަށެވެ.

ސޯޝަލް ސެންޓަރުގެ އިންޑޯރ ހޯލްގައި ބޭއްވުމަށް ނިންމާފައިވާ މި ތަމްރީންތަކުގެ މަޤްޞަދަކީ ކުންފުނިތަކުގެ މެދުގައި ވާދަވެރި ޓީމްތަކެއް އުފައްދައިގެން، އެޓީމްތައް ބައިނަލްއަޤްވާމީ މުބާރާތްތަކުގައި ބައިވެރިވެ ރާއްޖެ ތަމްސީލް ކުރުމުގެ ފުރުޞަތު ހޯދައިދިނުން ކަމަށް ސްޕޯޓްސް ކޯޕަރޭޝަނުން ބުނެ އެވެ.

ޑޮޖްބޯލް އަކީ ޒަމާނުއްސުރެ ދިވެހިންގެ މެދުގައި މުނިފޫހިފިލުވުމަށާއި މަޖަލަށް ކުޅެ އުޅޭ ކުޅިވަރެކެވެ. އެހެންނަމަވެސް "ފައިގެ ތަޅާ"ގެ ނަމުގައި ރާއްޖޭގައި ކުޅޭ މިކުޅިވަރު، ޤައުމީ ފެންވަރެއްގައި މީގެ ކުރިން ކުޅެފައިވާކަން އެނގިފައެއްނުވެއެވެ.

މިކުޅިވަރަށް ހާއްސަ ބައިނަލްއަޤްވާމީ ދެ ޖަމިއްޔާ އެއް މިހާރުވެސް އޮވެއެވެ. އެގޮތުން ވޯލްޑް ޑޮޖްބޯލް ފެޑެރޭޝަން (ޑަބްލިއުޑީބީއެފް) އިން މިކުޅިވަރު ކުޅުމަށް ފޯމް އިން ހަދާފައިވާ ބޯޅައެއް ބޭނުން ކުރާއިރު، ވޯލްޑް ޑޮޖްބޯލް އެސޯސިއޭޝަން (ޑަބްލިއުޑީއޭ) އިން މިކުޅިވަރު ކުޅުމަށް ބޭނުން ކުރަނީ ފޮތިން ހަދާފައިވާ ބޯޅައެކެވެ.

ދުނިޔޭގައި ފުރަތަމަ ޑޮޖްބޯލް ޗެމްޕިއަންޝިޕެއް ބާއްވާފައިވަނީ، ވޯލްޑް ޑޮޖްބޯލް ފެޑެރޭޝަނާއި މެލޭޝިއާގެ ޑޮޖްބޯލް އެސޯސިއޭޝަނާއި ގުޅިގެން 2012 ވަނަ އަހަރު މެލޭޝިއާގައެވެ. އޭގެ ފަހުން ކޮންމެ އަހަރަކު އެމުބާރާތް ބާއްވަމުންދާއިރު، އެންމެ ފަހުން މިމުބާރާތް ބާއްވާފައިވަނީ މިމަހުގެ 18 އިން 21 އަށް ކެނަޑާގެ ޓޮރޮންޓޯގައެވެ.

މީގެ އިތުރުން ވޯލްޑް ޑޮޖްބޯލް އެސޯސިއޭޝަނުން ކޮންމެ ދެއަހަރަކުން އެއް އަހަރު ޑޮޖްބޯލް ވޯލްޑް ކަޕް ބާއްވައެވެ.