ހަތަރެއް ގުނަ 100 މީޓަރ މިޑްލޭ ރިލޭގެ ޤައުމީ ރެކޯރޑް އާކޮށްފި

ހަންގޭރީގެ ބުޑަޕެސްޓްގައި މިހާރު ކުރިއަށްދާ 17 ވަނަ ފީނާ ވޯލްޑް ޗެމްޕިއަންޝިޕްގައި، ރާއްޖެ ތަމްސީލްކުރާ ފެތުންތެރިން، 4 ގުނަ 100 މީޓަރު މެޑްލޭ ރިލޭ އިވެންޓުގެ ޤައުމީ ރެކޯޑް އާ ކޮށްފިއެވެ.

މި އިވެންޓުން ގައުމީ ރެކޯޑް އާކުރި ޓީމުގައި ހިމެނޭ ފެތުންތެރިންނަކީ، އިސްމާޢީލް މުޢުތަސިމް އަދުނާން އާއި އައިމިނަތު ޝަޖަން އަދި އައިޝަތު ސާޖިނާ އެވެ. މިއިވެންޓުގެ ޤައުމީ ރެކޯޑް އައުކޮށްފައިވަނީ 05:07.35 އިން ރޭސްފުރިހަމަކޮށްގެންނެވެ.

މިއިވެންޓްގެ ޤައުމީ ރެކޯރޑް އެންމެފަހުން އައުކޮށްފައިވަނީ 2016 ވަނަ އަހަރު ބޭއްވުނު ސައުތު އޭޝިއަން އެކުއަޓިކް ޗެމްޕިއަންޝިޕްސް ގައެވެ. އެފަހަރު 4 ގުނަ 100 މީޓަރު މެޑްލޭ ރިލޭ އިވެންޓުގެ ޤައުމީ ރެކޯރޑް އައުކޮށްފައިވަނީ 05:26.02 އިން ރޭސް ފުރިހަމަކޮށްގެންނެވެ.

މި މުބާރާތަށް ރާއްޖެ ޓީމުން ބުޑަޕެސްޓަށް ގޮސްފައިވަނީ އަވަށްޓެރި ސްރީލަންކާގައި ޓްރެއިނިންގް ކޭމްޕެއް ފުރިހަމަ ކުރުމަށް ފަހުގައެވެ. ދިވެހި ޓީމް އެނބުރި ރާއްޖެ އައުމަށް ހަމަޖެހިފައިވަނީ މިމަހުގެ 30 ވަނަ ދުވަހުއެވެ.