ފަތުރުވެރިކަމުގެ ދާއިރާގައި މަސައްކަތްކުރާ މުވައްޒަފުންނާއި ފަތުރުވެރިންގެ ސަލާމަތާއި ރައްކާތެރިކަމަށް އިތުރު ސަމާލުކަން ދިނުމަށް ޓުރިޒަމް މިނިސްޓްރީން އިލްތިމާސްކޮށްފިއެވެ.

ޓޫރިޒަމް މިނިސްޓްރީން ނެރުނު ބަޔާނެއްގައި ބުނީ ރާއްޖޭގެ ފަތުރުވެރިކަން ކުރިއެރުވުމަށް ކުރެވޭ މަސައްކަތްތަކުގެ ތެރެއިން ރާއްޖެއަކީ ސަލާމަތާއި ރައްކާތެރިކަން ބޮޑު ޤައުމެއްގެ ގޮތުގައި ދުނިޔެއަށް މަޝްހޫރުވެފައިވާ މިދަނޑިވަޅުގައި ފަތުރުވެރިކަމުގެ ސިނާޢަތުގެ މުވައްޒަފުންނާއި ފަތުރުވެރިންގެ ސަލާމަތާއި ރައްކާތެރިކަމަށް ސަމާލުކަން ދޭންޖެހޭ ކަމަށެވެ.

އެގޮތުން އެކަން އަންގައި އަންގާރަ ދުވަހު ޓޫރިސްޓު ހޮޓާތަކާއި އެހެނިހެން ހޯސްޓުތަކަށް ވެސް ސަރކިއުލަރއެއް ފޮނުވާފައިވާނެ ކަމަށާއި ސަމާލުކަން ދޭންވީ ވަކި ޚާއްޞަ ކަންކަން އެ ސަރކިއުލަރގައި ބަޔާންކޮށްފައިވާނެ ކަމަށް ވެސް މިނިސްޓްރީގެ ބަޔާނުގައިވެއެވެ.

އެ މިނިސްޓްރީން ބުނީ ސަފާރީ އުޅަނދުތަކާއި ހޮޓާ، ގެސްޓްހައުސް ތަކަށް ފޮނުވި ސަރކިއުލަރގައި ވަކިން ޚާއްސަކޮށް ސްނޯކަލް ކުރުމާއި، ފެނާއި އަދި އެހެނިހެން މޫދު ކުޅިވަރުތަކުގެ ތެރޭގައި ފަތުރުވެރިންނާއި މުވައްޒަފުންގެ ސަލާމަތާއި ރައްކާތެރިކަމަށް ޚާއްސަ ސަމާލުކަމެއް ދިނުމަށްގޮވައިލާފައިވާނެ ކަމަށެވެ. އަދި އެތަންތަނުގައި ސަލާމަތާއި ރައްކާތެރިކަމަށް ހެދިފައިވާ ޕްލޭންތައް ތަންފީޒު ކުރަންޖެހޭ ޙާލަތްތަކުގައި ފުރިހަމައަށް ތަންފީޒުކުރުމުގެ އިންތިޒާމުތައް ހުރިތޯ ބަލާ ކަށަވަރު ކުރުމަށް ވެސް އެދިފައިވާނެ ކަމަށް ބަޔާނުގައިވެއެވެ.

ޓޫރިޒަމް މިނިސްޓްރީން ފަތުރުވެރިންނާއި މުވައްޒަފުންގެ ރައްކާތެރިކަމަށް ސަމާލުކަން ދިނުމަށް ގޮވާލައި ސަރކިއުލަރ ނެރުނު އިރު، ދާދިފަހުން ވެސް އިންޓަރކޮންޓިނެންޓަލް މޯލްޑިވްސް މާމުނަގައު ރިސޯޓުން ސްނޯކްލިންއަށް ގޮސް އުޅުނު އަންހެން ފަތުރުވެރިއަކު ގެއްލުނު މައްސަލައެއް ވަނީ ފެންމަތިވެފައެވެ.

ކޮވިޑް-19ގެ ހާލަތުގެ ސަބަބުން ރާއްޖޭގެ ފަތުރުވެރިކަމުގެ ދާއިރާ އަނދަވަޅަކަށް ވެއްޓިފައިވާއިރު އެ ސިނާޢަތް ނަގާ ކޮޅަށް ޖަހަން ގިނަ މަސައްކަތްތަކެއް އަންނަނީ ކުރަމުންނެވެ. އެގޮތުން މި ހާލަތުގައި ރާއްޖެ އިޝްތިހާރުކުރަން މަސައްކަތްކުރަނީ މި ގައުމަކީ ހުރިހާ ގޮތަކުން ވެސް އެންމެ ރައްކާތެރި ގައުމުގެ ގޮތުގައެވެ.