ޔުނައިޓެޑުގެ އެއްބަސްވުން ގްރީންވުޑް އާކޮށްފި

މެންޗެސްޓާ ޔުނައިޓެޑާއެކު ހަދާފައި އޮތް އެއްބަސްވުން އިތުރު ދެ އަހަރަށް އިންގްލެންޑުގެ ފޯވާޑް މޭސަން ގްރީންވުޑް އާކޮށްފިއެވެ.

އުމުރުން 19 އަހަރުގެ ފޯވާޑް މީގެ ކުރިން ޔުނައިޓެޑާއެކު ހަދާފައި އޮތް އެއްބަސްވުން ހަމަވަން އޮތީ 2023 ވަނަ އަހަރުގެ ޖޫން މަހުގެ ނިޔަލަށެވެ. އެކަމަކު އިތުރު ދެ އަހަރަށް އެއްބަސްވުން އާކުރުމާއެކު، 2025 ވަނަ އަހަރުގެ ޖޫން މަހުގެ ނިޔަލަށް ގްރީންވުޑް ޔުނައިޓެޑުގައި މަޑުކުރާނެއެވެ.

އުމުރުން އެންމެ ހަ އަހަރުގައި ޔުނައިޓެޑުގެ ޔޫތު އެކެޑަމީއާ ގުޅުނު ގްރީންވުޑް ޔުނައިޓެޑުގެ ސީނިއާ ޓީމުން ފުރުސަތު ހޯދާފައިވަނީ 2019 ވަނަ އަހަރުގެ މާޗު މަހުގެ ތެރޭގައެވެ. އޭގެ ފަހުން ގްރީންވުޑް ވަނީ މިހާތަނަށް ޔުނައިޓެޑަށް 82 މެޗު ކުޅެދީ 21 ލަނޑު ޖަހާފައެވެ.

އަދި މިދިޔަ އަހަރުގެ އޯގަސްޓް މަހުގެ ތެރޭގައި އިންގްލެންޑުގެ ގައުމީ ފުޓްބޯޅަ ޓީމުން އޭނާ ޖާގަ ހޯދި ނަމަވެސް، ގައުމީ ޓީމަށް ގްރީންވުޑް ކުޅެދީފައިވަނީ މިހާތަނަށް އެންމެ މެޗެކެވެ. އެއީ ޔުއެފާ ނޭޝަންސް ލީގުގައި އައިސްލެންޑް އަތުން އިންގްލެންޑް މޮޅުވި މެޗެވެ. އެކަމަކު އެ މެޗުގެ ފަހުން ކޮވިޑް-19 ގެ އުސޫލުތަކާ ޚިލާފުވުމުން ގްރީންވުޑް ވަނީ ގައުމީ ޓީމުން ބާކީކޮށްފައެވެ.