ބޭރު ޤައުމުތަކުން ވޯޓު ފޮށި ބެހެއްޓޭނެކަމުގެ ޔަޤީންކަން ލިބިފައިވަނީ ލަންކާއިން އެކަނި
އިންޑިއާގައި ވޯޓުލުން ކުރިއަށް ގެންދެވޭނެކަން ކަށަވަރުވެފައި ނުވޭ
އިލެކްޝަންސް ކޮމިޝަނުގެ ރައީސް އަހުމަދު ޝަރީފް
ކުރިއަށް އޮތް ލޯކަލް ކައުންސިލްތަކުގެ އިންތިޚާބާއި ކައުންސިލްތަކުގެ އަންހެނުންގެ ތަރައްޤީއަށް މަސައްކަތް ކުރާ ކޮމިޓީގެ އިންތިޚާބުގައި ބޭރު ޤައުމުތަކުގެ ތެރެއިން ވޯޓު ފޮށި ބެހެއްޓޭނެކަން މިހާތަނަށް ޔަޤީންވެފައިވަނީ ސްރިލަންކާގައި އެކަނިކަމަށް އިލެކްޝަންސް ކޮމިޝަނުން ހާމަކޮށްފިއެވެ.
އިންތިޚާބުތަކަށް ވަމުންދާ އެންމެ ފަހުގެ ތައްޔާރީތަކުގެ މަޢުލޫމާތު ހިއްސާކުރުމަށް ބޭއްވި ނޫސްވެރިންގެ ބައްދަލުވުމުގައި ރާއްޖެ ޓީވީން ކުރި ސުވާލަކަށް ޖަވާބު ދެއްވަމުން އިލެކްޝަންސް ކޮމިޝަންގެ ރައީސް އަހުމަދު ޝަރީފް ވިދާޅުވީ، މިފަހަރުގެ އިންތިޚާބަކީ ގޮންޖެހުންތައް ބޮޑު އުނދަގޫ އިބްތިޚާބެއްކަމުގައިވިޔަސް އިންތިޚާބު ބާއްވަން އޮތް ތާރީޚަށް ވާންޖެހޭ ހުރިހާ ތައްޔާރީތަކެއް ވަމުންދާ ކަމަށެވެ. އެގޮތުން ރާއްޖެއާއި ރާއްޖެއިން ބޭރުގައި ވޯޓު ފޮށި ބަހައްޓާނެ ތަންތަން ކަނޑައާޅާފައިވާކަމަށް ޝަރީފް ވިދާޅުވިއެވެ. ކޮވިޑްގެ ސަބަބުން ވޯޓުލުމަށް އެދިގެން ހުށަހަޅާ ހުރިހާ ރިސޯޓްތަކެއްގައި ވޯޓު ފޮށި ބަހައްޓަން ޖެހޭއިރު، ކޮމިއުނިޓީ ސްޕްރެޑެއް އޮތް މާލެ ސަރަހައްދުގައި ބަހައްޓާ ވޯޓު ފޮށްޓާއި ޕޯލިންގް ސްޓޭޝަންގެ އަދަދު ވަރަށް ބޮޑަށް އިތުރުވެފައިވާކަމަށް ޝަރީފް ވިދާޅުވިއެވެ.
މިއާއެކު މިހާރު ވޯޓުލުމަށް 735 މަރުކަޒު ހަމަޖައްސައި 8 ހާހާއި ގާތްކުރާ އަދަދަކަށް އޮފިޝަލުން ހޯދުމަކީ ދަތިކަކަމަކަށް ވާނެކަމަށް ޝަރީފް ވިދާޅުވިއެވެ. ކޮވިޑްގެ ސަބަބުން ގިނަ ރިސޯޓްތަކެއް ބަންދުކޮށް އޮޕަރޭޝަނަށް ބަދަލު ގެނައުމުން ރިސޯޓްތަކުން ވޯޓުލާ ފަމީހުން މިފަަހަރު އަލުން ރީ ރަޖިސްޓަރީ ވާންޖެހޭގޮތަށް ބަދަލު ގެނެސްފައިވާކަމަށްވެސް ޝަރީފް ވިދާޅުވިއެވެ.
ރާއްޖޭގެ އިތުރުން މިފަހަރު ރާއްޖެއިން ބޭރުގައިވެސް ވޯޓުލުމުގެ އިންތިޒާމު ހަމަޖެއްސުމަށް މަސައްކަތްކުރަމުންދާކަމަށް ޝަރީފް ވިދާޅުވިއެވެ. އެގޮތުން ކުރީ ފަހަރުތަކަކޭވެސް އެއްގޮތަށް އިންޑިއާ، ސްރިލަންކާ، މެލޭޝިިއާ އަދި އިނގިރޭސިވިލާތުގައި ވޯޓު ފޮށި ބެހެއްޓުމަށް މަސައްކަތް ކުރިކަމަށް ޝަރީފް ވިދާޅުވިއެވެ. އެހެންނަމަވެސް، ކޮވިޑްގެ މިހާރުގެ ޙާލަތު ހުރިގޮތުން މެލޭޝިއާއާއި އިނގިރޭސިވިލާތުގައި ވޯޓު ފޮށި ނުބެހެއްޓޭނެކަން އެޤައުމުތަކުގެ ސަރުކާރުން ފޮރިން މިނިސްޓްރީ މެދުވެރިކޮށް އަންގާފައިވުމުން މި ދެ ޤައުމުގައި މިފަހަރު ވޯޓު ނުލެވޭނެކަމަށް ވިދާޅުވިއެވެ.
މި ފޮށިތަކަށް ރީ ރަޖިސްޓަރީ ވެެފައިވާ މީހުން އަލުން ޑީފޯލްޓް ފޮށްޓަށް ރަޖިސްޓްރީވެފައިވާނެކަމަށް ޝަރީފް ވިދާޅުވުއެވެ. މިހާތަނަށް ކުރި މަސައްކަތުން އިންޑިއާގައި ވޯޓުލުން ކުރިއަށް ގެންދެވޭނެކަން ކަށަވަރުވެފައި ނުވާއިރު، ބޭރު ޤައުމުތަކުގެ ތެރެއިން ވޯޓު ފޮށި ބެހެއްޓޭނެކަން ޔަޤީންވެފައިވަނީ ސްރިލަންކާގައި އެކަނިކަމަށްވެސް ޝަރީފް ވިދާޅުވިއެވެ. މިކަމުގައި އަދިވެސް ގިނަ ގޮންޖެހުންތަކެއް ހުރިކަން ފާހަގަކުރައްވަމުން މިކަންކަން ހައްލުކުރުމަށް ހުރިހާ މުއައްސަސާތަކުގެ އެއްބާރުލުމަށް ޝަރީފް އެދިވަޑައިގެންނެވިއެވެ.
