އަންނަ ހުކުރު ދުވަހުން ފެށިގެން ހުކުރު ޚުތުބާ ކުރުކުރަނީ
މިއީ ކޮވިޑް 19 އާ ގުޅިގެން އަޅާ ރައްކާތެރިކަމުގެ ފިޔަވަޅެއް
މާލޭގެ މިސްކިތެއް- ކޮވިޑާ ގުޅިގެން މީގެ ކުރިން މިސްކިތްތައް ބަންދުވެސް ކުރި، ނަމަވެސް ޙާލަތަށް ބެލުމަށްފަހު ފަހުން މިސްކިތްތައް އަލުން ހުޅުވާލި
ކޮވިޑް-19 އިން ރައްކާތެރިވުމަށް އަޅަމުންދާ ފިޔަވަޅުތަކުގެ ތެރެއިން ރާއްޖޭގެ މިސްކިތްތަކުގައި ކިޔާ ހުކުރު ޚުތުބާ ކުރުކުރުމަށް ނިންމާފައިވާކަމަށް އިސްލާމިކް މިނިސްޓްރީން ހާމަ ކޮށްފިއެވެ.
އިސްލާމިކް މިނިސްޓްރީން ބުނީ، މިހިނގާ ފެބްރުއަރީ މަހުގެ 19 ވާ ހުކުރު ދުވަހުން ފެށިގެން، ރާއްޖޭގެ ހުރިހާ ރަށެއްގައި ކިޔާ ހުކުރު ޚުތުބާ ކުރިޔަށްވުރެ ކުރުވާނެ ކަމަށެވެ. މި ގޮތަށް ހުކުރު ޚުތުބާ ކުރުކުރަން ނިންމީ ކޮވިޑް 19 އާ ގުޅިގެން އަޅާ ރައްކާތެރިކަމުގެ ފިޔަވަޅެއްގެ ގޮތުގައި ކަމަށް ވެސް އެ މިނިސްޓްރީން ފާހަގަ ކޮށްފައިވެއެވެ.
ރާއްޖޭގެ ހުރިހާ ރަށެއްގައި މި ފިޔަވަޅު ތަންފީޒުކުރުމަށް ނިންމާފައިވާއިރު، މިފަހަކަށް އައިސް އަތޮޅު ތެރެއިން ފެންނަ ކޮވިޑް-19 ކޭސްތަކުގެ އަދަދު ވެސް މި ވަނީ އިތުރުވެފައެވެ. އެގޮތުން އަތޮޅު ތެރޭގެ ރަށްރަށުން ވެސް ބައެއް ކްލަސްޓަރތައް ފެނިފައިވާއިރު، ބައެއް ރަށްރަށް މިހާރު ވެސް ހުރީ މޮނިޓަރިންގގައެވެ.
ކޮވިޑް-19 އިން ރައްކާތެރިވުމުގެ ގޮތުން މީގެ ކުރިން މާލެ ސަރަޙައްދުގެ މިސްކިތްތަކުގައި ޖަމާޢަތުގައި ނަމާދުކުރުން ވެސް މެދު ކަނޑާލިއެެވެ. އެހެންނަމަވެސް ރައްކާތެރިކަމުގެ ފިޔަވަޅުތަކާއެކު މިދިޔަ އަހަރުގެ ޖޫންމަހުގެ 14 ވަނަ ދުވަހު ވަނީ އާއްމުކޮށް މިސްކިތްތައް ހުޅުވައި ނަމާދުކުރަން ފަށާފައެވެ.
