އެކައުންޓިންގ ދާއިރާގައި ދިވެހިން މަދު: އިކޮނޮމިކް މިނިސްޓަރ
އެކައުންޓިންގ ދާއިރާގައި 4500 ބިދޭސީން ހަރަކާތްތެރިވޭ
އިކޮނޮމިކް މިނިސްޓަރ ފައްޔާޒް އިސްމާއިލް
އަބަދުވެސް ހީވެފައި އޮތީ އެކައުންޓިންގ ދާއިރާގައި ދިވެހިން ގިނަ ކަމަށާއި އެހެންނަމަވެސް އެކައުންޓިންގ ދާއިރާގައި ދިވެހިން މަދު ކަމަށް އިކޮނޮމިކް މިނިސްޓަރ ފައްޔާޒް އިސްމާއިލް ވިދާޅުވެއްޖެއެވެ.
އިންސްޓިޓިއުޓް އޮފް ޗާޓަރޑް އެކައުންޓެންޓްސް އޮފް ދަ މޯލްޑިވްސް (ސީއޭ) ގެ ވެބްސައިޓާއި ލޯގޯ ރަސްމީކޮށް އިފްތިތާހުކުރުމަށް ބޭއްވި ރަސްމިއްޔާތު ޝަރަފުވެރިކޮށްދެއްވާ ވާހަކަދައްކަވަމުން މިނިސްޓަރ ފައްޔާޒް ވިދާޅުވީ މި ދާއިރާއަށް ބޭނުންވާ ވަރަށް ދިވެހިން އަދިވެސް ނުލިބޭ ކަމަށެވެ.
ތަފާސްހިސާބުތަކުން ދައްކާ ގޮތުގައި އެކައުންޓިންގ ދާއިރާގައި 4500 ބިދޭސީން ހަރަކާތްތެރިވާ ކަމަށާއި ސަރުކާރަށް ވެސް މި ދާއިރާގެ ތަޖުރިބާ ހުރި ރަނގަޅު މީހުން އެބަ ބޭނުންވާ ކަމަށް މިނިސްޓަރ ވިދާޅުވިއެވެ.
އިންސްޓިޓިއުޓް އޮފް ޗާޓަރޑް އެކައުންޓެންޓްސް އޮފް ދަ މޯލްޑިވްސްގެ މެންޑޭޑްގައި ހުރި ކަންތައްތަކަކީ އިޤްތިޞާދު ރަނގަޅު މަގަށް އެޅުވުމަށް އެހީތެރިވެދޭނެ ކަންތަކެއްކަން ފާހަގަކުރައްވާ ފައްޔާޒު ވިދާޅުވީ މި ދާއިރާއަށް ކުދިން އަހުލުވެރިކުރުވުމާއި ޓްރެއިންގތައް ފޯރުކޮށްދިނުމަށް ހުރި ދަތިތައް ނައްތާލުމަށް އިކޮނޮމިކް މިނިސްޓްރީން އެހީތެރިވެދޭނެ ކަމަށެވެ.
އެގޮތުން ޗާޓަރޑް އެކައުންޓެންޓްސް އިންސްޓްޓިއުޓްއާއެކު ވަރަށް ބޮޑު ޕްރޮގްރާމެއްގެ މަސައްކަތް ކުރައްވަމުންދާ ކަމަށާއި ކުރިއަތް އޮތް ތިން އަހަރު ބޭނުންވާ މަޤްޞަދު ހާސިލްވެގެންދާނެ ކަމަށް އުންމީދުކުރައްވާ ކަމަށް މިނިސްޓަރ ފައްޔާޒު ވިދާޅުވިއެވެ.
އިންސްޓިޓިއުޓް އޮފް ޗާޓަރޑް އެކައުންޓެންޓްސް އޮފް ދަ މޯލްޑިވްސްގެ ވެބްސައިޓާއި ލޯގޯ ރަސްމީކޮށް އިފްތިތާހްކޮށްފައިވާއިރު މި އިންސްޓިޓިއުޓް ރައީސުލްޖުމްހޫރިއްޔާ އިބްރާހީމް މުހައްމަދު ޞާލިޙް އުފައްދަވާފައިވަނީ މިދިޔަ އަހަރުގެ ސެޕްޓެމްބަރު މަހުގައެވެ. އަދި ރައީސުލްޖުމްހޫރިއްޔާ އެ އިންސްޓިޓިއުޓް އުފެއްދެވުމާ ގުޅިގެން އިންސްޓްޓިއުޓްގެ ކައުންސިލް މެމްބަރުން ވަނީ ކައުންސިލްގެ ރައީސް ކަމަށް އޮޑިޓަރ ޖެނެރަލް އައްޔަން ކުރައްވާފައެވެ.
