މުވާސަލާތީ ޚިދުމަތްތަކުން ރައްޔިތުންނަށް ލިބޭ ގެއްލުން ނިމުމަކަށް ގެނައުމަށް ހުށަހެޅި ގަރާރު ދިރާސާކުރުމަށް ކޮމިޓީއަށް
ގަރާރު ދިރާސާކުރުމަށް ފޮނުވީ ޤައުމީ ތަރައްޤީ އާއި ތަރިކައިގެ ކޮމިޓީއަށް
މާފަންނު މެދު ދާއިރާގެ މެންބަރު އިބްރާހީމް ރަޝީދު
މުވާސަލާތީ ޚިދުމަތްތަކުން ރައްޔިތުންނަށް ލިބޭ ގެއްލުން ނިމުމަކަށް ގެނައުމަށް ހުށަހަޅާފައިވާ ގަރާރު މަޖިލީހަށް ބަލައިގަނެ އިތުރަށް ދިރާސާކުރުމަށް ޤައުމީ ތަރައްޤީ އާއި ތަރިކައިގެ ކޮމިޓީއަށް ފޮނުވައިފިއެވެ.
ގަރާރު މަޖިލީހަށް ބަލައިގަނެފައިވަނީ ގަރާރު ބަލައިގަތުމަށް ނެގުނު ވޯޓުގައި ބައިވެރިވެވަޑައިގެންނެވި 40 މެމްބަރުންގެ އިއްތިފާގުންނެވެ.
ދިވެހިރާއްޖޭގެ މުއާޞަލާތީ ޚިދުމަތްތައް ބެލެހެއްޓުމުގެ ޒިންމާއާ ޙަވާލުކުރެވިފައިވާ ފަރާތުން، ނުހަނު ދިގު މުއްދަތަކަށް، ދިވެހިރާއްޖޭގައި ހަދާފައިވާ ޤާނޫނުތަކަށް ބެލުމެއްނެތި، ޓެލެކޮމް އޮޕަރޭޓަރުންގެ މަންފާއަށް ފަހިވާގޮތަށް، ރައްޔިތުންނަށް ނުހަނު ގެއްލުންވަމުންދާ މަގުން، ގިނަގުނަ ކަންތައްތަކެއް ތަރުތީބުކޮށްފައިވާތީ، އެ ކަންކަން ނިމުމަކަށް ގެނައުމަށް ގޮވާލައި ގަރާރު ހުށަހަޅުއްވާފައި ވަނީ މާފަންނު މެދު ދާއިރާގެ މެންބަރު އިބްރާހީމް ރަޝީދު (ބޮންޑާ)އެވެ.
މި ގަރާރުގައި ވަނީ އިންޓަރނެޓްގެ މައްސަލައަކީ ހަމައެކަނި ޚިދުމަތްދޭ ފަރާތްތަކާ ގުޅިފައިވާ ކަމެއް ނޫން ކަމަށެވެ. މި ގަރާގުގައި މި މައްސަލައާ ގުޅުންހުރި އެހެން ބައެއް މައްސަލަތަކެއް ވެސް ވަނީ ފާހަގަ ކޮށްފައެވެ.
ގަރާރުގައި ފާހަގަ ކޮށްފައިވާ މައްސަލަތައް
1. ދިވެހިރާއްޖޭގެ ޓެލެކޮމިއުނިކޭޝަންގެ ޤާނޫނު 43/215ގައި އެއްވެސް ގަވައިދެއް ހަދާފައި ނުވުން
2. ޤާނޫނު 43/2015ށް އަމަލު ކުރާ މިންވަރު ބެލެވިފައި ނުވުމާއި، ޤާނޫނާއި ޚިލާފު ވެއްޖެނަމަ އެބަޔަކާ މެދު ފިޔަވަޅެއް ނޭޅުން
3. ދިވެހިރާއްޖޭގެ ޓެލެކޮމިއުނިކޭޝަން ޤާނޫނު 43/215ގެ ތިންވަނަ ބައިގައި ބަޔާންކޮށްފައިވާ ގޮތަށް އަގުތަކާއި ޚިދުމަތުގެ ފެންވަރު ކޮންޓްރޯލްކޮށް ބެލެހެއްޓިފައި ނުވުން
4. ކޮމިއުނިކޭޝަންސް އޮތޯރިޓީ އޮފް މޯލްޑިވްސްއަށް އެއްވެސް ވަރަަކަށް އިންޑަސްޓްރީ ރެގިއުލޭޓް ކުރެވިފައި ނުވުން
5. ރާއްޖޭގައި ޒަމާނީ ފެންވަރެއްގެ ޓެލެކޮމިއުނިކޭޝަން އިންފްރާސްޓްރަކްޗަރއެއް ގާއިމުކުރެވިފައި ނެތުން
6. ރާއްޖޭގައި އޯޕަންއެކްސެސް ނެޓްވޯކްގެ ޚިދުމަތް ނެތުމުގެ ސަބަބުން ގިނަ އަދި އެހެނިހެން ދާއިރާތައް ކުރިއެރުމުގައި ގޮންޖެހުންތައް ގިނަވުން
7. ގައުމުގެ އެންމެ ބޮޑު އެއް އެސެޓްކަމަށްވާ ފްރީކުއެންސީ ސްޕެކްޓްރަމް، ޒިންމާދާރު ކުޑަގޮތަކަށް ފްރީކުއެންސީތައް ހިލޭ ދިރާގު އަދި އުރީދޫއަށް ބަހާލައި ބޮޑު އަދަދެއް ހުސްކޮށްފައިވުން
8. ދިވެހި ގައުމީ ތަރިކައެއް ކަމުގައިވާ ޑޮޓް އެމްވީ ޑޮމެއިންގެ ބެލެނިވެރިކަމާއި ބެލެހެއްޓެނިވެރިކަން އަދި ނަފާ، އެއްކޮށް އިންޑަސްޓްރީއަށް ދޫކޮށްލާފައި ބޭއްވުން
އިބްރާހީމް ރަޝީދު (ބޮންޑާ) މި ގަރާރު ހުށަހަޅުއްވަމުން ވިދާޅުވީ މި މައްސަލަތައް މިހެން ހުރުމުގެ ސަބަބުން އިތުރު ޚިދުމަތްދޭ ފަރާތްތަކަށް ލައިސެންސް ދީގެން ވެސް މުވާސަލާތީ ޚިދުމަތްތަކަށް އެދެވޭ ބަދަލެއް އަންނާނެކަމާ މެދު ސުވާލު އުފެދޭ ކަމަށެވެ.
