އެމްޑީޕީ ޤައުމީ މަޖިލިސް ބައްދަލުވުމެއް މިރޭ، އެސްޖީ އައްޔަނުކުރުން ވެސް އޮންނާނެ

މޯލްޑިވިއަން ޑިމޮކްރަޓިކް ޕާޓީ (އެމްޑީޕީ) ގެ ޤައުމީ މަޖިލީހުގެ ބައްދަލުވުމެއް އާދިއްތަ ދުވަހުގެރެއަށް ތާވަލުކޮށްފިއެވެ.

މި ބައްދަލުވުން ތާވަލު ކޮށްފައިވަނީ އާދިއްތަ ދުވަހުގެރޭ 20:30ން ފެށިގެން 22:30ށް ކަމަށް އެމްޑީޕީން މައުލޫމާތު ދެއެވެ. އެމްޑީޕީ އޮފީހުގައި ޒޫމް މެދުވެރިކޮށް ކުރިއަށްގެންދާ މި ބައްދަލުވުމުގައި ރައީސުލްޖުމްހޫރިއްޔާ އިބްރާޙިމް މުޙައްމަދު ޞާލިޙާއި، ރައްޔިތުންގެ މަޖިލީހުގެ ރައީސް މުޙައްމަދު ނަޝީދު ވާހަކަފުޅުދެއްކެވުމަށް ވަނީ ހަމަޖެހިފައެވެ.

އޭގެ އިތުރުން، ލޯކަލް ކައުންސިލް އިންތިޚާބާއި އަންހެނުންގެ ތަރައްޤީއަށް މަސައްކަތް ކުރާ ކޮމިޓީގެ އިންތިޚާބާ ގުޅޭގޮތުން މައުލޫމާތު ދިނުމަށް ހަމަޖެހިފައިވާއިރު، މި ބައްދަލުވުމުގައި އެމްޑީޕީގެ ސެކެޓަރީ ޖެނެރަލް އައްޔަނުކުރުމަށް ވެސް ވަނީ ނިންމާފައެވެ.

މިއީ އެމްޑީޕީ ޤައުމީ މަޖިލީހުގެ 172 ވަނަ ބައްދަލުވުމެވެ.

ކުރިއަށް އޮތް ލޯކަލް ކައުންސިލް އިންތިޚާބަށް އެމްޑީޕީން ތައްޔާރުވަމުންދާއިރު، އެ ޕާޓީން ވަނީ ހެލްތް ޕްރޮޓެކްޝަން އޭޖެންސީ (އެޗްޕީއޭ) ގެ އުސޫލުތަކާ އެއްގޮތަށް ކެމްޕެއިން ޙަރަކާތްތައް ކުރިއަށް ގެންދާނެ ގޮތް ދައްކުވައިދޭނެ ކަމުގެ ޔަޤީންކަން ދީފައެވެ. އެގޮތުން "ރަށްވެހިފަތިސް" ކެމްޕެއިން ލޯންޗުކޮށް، ވަރޗުއަލްކޮށް އެ ޕާޓީން ގެންދަނީ ކެމްޕެއިން ޙަރަކާތްތައް ހިންގަމުންނެވެ.

ދިވެހިރާއްޖެއިން ކޯވިޑް-19 ފެނިފައިވާތީ ބައްޔަށް މަގުފަހިވާ ބާވަތުގެ ކެންޕޭނުގެ އެއްވެސް ޙަރަކާތެއް ނުހިންގުމަށާއި، ސޯޝަލް މީޑިއާ އަދި މުއާޞަލާތީ ވަޞީލަތްތައް މެދުވެރިކޮށް ކުރިއަށް އޮތް ލޯކަލް ކައުންސިލް އިންތިޚާބުގެ ކެމްޕޭނު ޙަރަކާތްތައް ކުރިއަށްގެންދިއުމަށް އެމްޑީޕީން މީގެ ކުރިންވެސް އޮތީ ނިންމާފައެވެ.