އިތުރު ފަސް މީހުން ޕޮޒިޓިވްވެ އައްޑޫ ސިޓީން ޕޮޒިޓިވްވި މީހުންގެ އަދަދު 58ށް

އައްޑޫ ސިޓީން އިތުރު ފަސް މީހަކު ކޮވިޑް-19ށް ޕޮޒިޓިވްވެ ޖުމްލަ އަދަދު 58ށް އަރައިފިއެވެ.

އައްޑޫ އިމަރޖެންސީ އޮޕަރޭޝަން ސެންޓަރުން ބުނީ ޕޮޒިޓިވްވި މީހުންގެ ތެރެއިން ހަތަރު މީހަކަށް ހޮސްޕިޓަލްގައި އެޑްމިޓްކޮށްގެން ފަރުވާ ދެމުން އަންނަކަމަށެވެ. އަދި ކޮންޓެކްޓްވި މީހުންގެ އަދަދު 341ށް މިހާރު އަރާފައިވާކަމަށެވެ. އަދި ކަރަންޓީނުގައި ހުރި އިމާރާތްތަކުގެ އަދަދު 182ށް އަރާފައިވާކަމަށް އައްޑޫ އިމަރޖެންސީ އޮޕަރޭޝަން ސެންޓަރުން ބުނެއެވެ.

ހެލްތު އެމަރޖެންސީ އޮޕަރޭޝަން ސެންޓަރ (އެޗްއީއޯސީ)ން ހުކުރު ދުވަހުގެ ރޭ ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން ކޮވިޑްގެ ކަންތަކުގެ ޓެކްނިކަލް އެޑްވައިޒަރީ ގްރޫޕްގެ ހެޑް ޑރ އަލީ ލަތީފު ވިދާޅުވީ ކޮންޓެކްޓުންގެ ގޮތުގައި ހިމެނޭ މީހުންގެ ތެރޭގައި 100ށް ވުރެ ގިނަ މީހުންނަކީ ހައިރިސްކް މީހުންކަމަށެވެ.

ޕޮޒިޓިވްވި ކޭސްތައް ފެނިފައިވަނީ ހިތަދޫ އިން 20 މީހުން، މަރަދޫ ފޭދޫ އިން 4 މީހުން އަދި ފޭދޫން 9 މީހުންނާއި ހުޅުމީދޫން 25 މީހުންނެވެ.

އައްޑޫ ސިޓީން ދެ ކްލަސްޓަރއެއް ފެނިފައިވެއެވެ. އެއީ ޕްރޮޖެކްޓް ސައިޓަކުން ފެނުނު ކްލަސްޓަރއަކާއި، އޭވިއޭޝަން ކްލަސްޓަރއެކެވެ. ޕްރޮޖެކްޓް ސައިޓް ކްލަސްޓަރއާ ގުޅިގެން ހުޅުދޫމީދޫއިން ނެގި ހުރިހާ ސާމްޕަލެއް ވަނީ ނެގެޓިވްވެފައެވެ. އެކްލަސްޓަރ ކޮންޓެއިންވެފައިވީ ނަމަވެސް އޭވިއޭޝަން ކްލަސްޓަރ އޮތީ އެކްޓިވްކޮށެވެ.