ބަލި ހާލަތެއް މެދުވެރިވިޔަސް، ރާއްޖެއިން ބޭރަށް ދާކަށް ނޭދޭނެ ކަމަށް ރައްޔިތުންގެ މަޖިލީހުގެ ވިލިމާލެ ދާއިރާގެ ކުރީގެ މެމްބަރު އަހުމަދު ނިހާނު ހުސައިންމަނިކު ވިދާޅުވެއްޖެއެވެ.

މިހެން ނިހާނު ވިދާޅުވީ، އޭނާގެ މައްޗަށް ދައުލަތުން އުފުލާފައިވާ ހަ ދައުވާގެ އަޑުއެހުންތައް ފެށުމަށްޓައި ބުރާސްފަތި ދުވަހު ބޭއްވި ފުރަތަމަ އަޑުއެހުމުގައެވެ. މި އަޑުއެހުމުގައި ދައުލަތުގެ ވަކީލު ވަނީ، ނިހާނުގެ ޕާސްޕޯޓް ހިފެހެއްޓުމަށް ކޯޓުން ނެރެފައިވާ އަމުރު ބުރާސްފަތި ދުވަހުގެ ނިޔަލަށް ހަމަވާތީ، ޝަރީޢަތް ނިމެންދެން ނިހާނުގެ ޕާސްޕޯޓް ހިފެހެއްޓުމުގެ އަމުރަކަށް ކޯޓުގައި އެދިފައިވާނެ ކަމަށެވެ.

އެކަމާ ގުޅިގެން، ނިހާނަށް ވާހަކަ ދެއްކުމުގެ ފުރުސަތު، މައްސަލަ ބައްލަވާ ގާޒީ ޢަލީ އާދަމް ދެއްވުމުން ނިހާނު ވިދާޅުވީ، މިދިޔަ އަހަރުން ފެށިގެން ރާއްޖޭގެ އަދި ރާއްޖޭން ބޭރުގެ އެއްވެސް ތަނަކަށް ވަޑައިގެންނެވުމުގެ ހިޔާލެއް ނެތްކަމަށާއި، އަދި ކައިރި މުސްތަގުބަލެއްގައި ވެސް، ﷲ އިރާދަ ކުރެއްވިއްޔާ ބަލި ހާލަތެއް މެދުވެރިވިޔަސް، ރާއްޖެއިން ބޭރަށް ވަޑައިގެންނެވުމަށް އެދިވަޑައި ނުގަންނަވާނެ ކަމަށެވެ. އަދި ދައުލަތުން ބޭނުންވާ ގޮތަށް ޕާސްޕޯޓް ހިފެހެއްޓުމުގައި އެއްވެސް އިއުތިރާޒެއް ނެތްކަމަށް ވެސް ނިހާނު ވިދާޅުވިއެވެ.

ގާޒީ ވިދާޅުވީ މި މައްސަލަ ވަރަށް އަވަހަށް ނިންމުމަށް މަސައްކަތް ކުރައްވާނެ ކަމަށާއި، އެހެންކަމުން މި މައްސަލަތައް ޝަރީއަތުން ވަކި ގޮތެއް ކަނޑައަޅަންދެން ނިހާނުގެ ޕާސްޕޯޓް ހިފެހެއްޓުމަށް އަމުރެއް ނެރެއްވާ ކަމަށެވެ.

ބުރާސްފަތި ދުވަހުގެ އަޑުއެހުމުގައި ނިހާނު ވަޑައިގެންނެވީ ގާނޫނީ ވަކީލަކާ ނުލައެވެ. ނިހާނު ވިދާޅުވީ މި މައްސަލަތަކުގެ ކުރިއަށްދާން ބޭނުންވަނީ ގާނޫނީ ވަކީލަކާއެކު ކަމަށާއި، ކޮވިޑް-19ގެ މިހާރުގެ ހާލަތު ގޯސްވަމުންދާތީ، ގާނޫނީ ވަކީލެއް ޢައްޔަން ކުރެއްވުމަށް 15 ދުވަހުގެ ފުރުސަތެއް ދެއްވުން އެދޭކަމަށެވެ.

ނަމަވެސް ގާޒީ ވިދާޅުވީ ގާނޫނުގައި ބަޔާންކޮށްފައިވާ ގޮތަށް ގާނޫނީ ވަކީލެއް ޢައްޔަން ކުރެއްވުމަށް 10 ދުވަހުގެ ފުރުސަތެއް ދެއްވާ ކަމަށާއި އަދި އެ މުއްދަތުގައި ގާނޫނީ ވަކީލެއް ޢައްޔަން ނުކުރެވިއްޖެނަމަ، ސަބަބު ބަޔާންކޮށް ކޯޓަށް ހުށަހެޅުމުން، އެއަށް ބެލުމަށްފަހު، އިތުރު ފުރުސަތެއް ދޭން ފެންނަނަމަ ކޯޓުން އަންގާނެ ކަމަށެވެ.

ގާޒީ ވިދާޅުވީ ދެން މި މައްސަލަތުގެ އަޑުއެހުމެއް ބޭއްވޭނީ، ގާނޫނީ ވަކީލެއް އައްޔަން ކުރުމަށް ދިން 10 ދުވަހުގެ މުއްދަތަށްފަހު، ގާނޫނީ ވަކީލާއެކުގައި ކަމަށެވެ.

ކުރީގެ ރައީސް އަބްދުﷲ ޔާމީންގެ ވެރިކަމުގައި ސަރުކާރު ހިންގި ކޯލިޝަނުގެ މައިޕާޓީ ޕީޕީއެމްގެ ޕާލަމެންޓްރީ ލީޑަރު އަދި ރައްޔިތުންގެ މަޖިލީހުގެ މެޖޯރިޓީ ލީޑަރު ނިހާނުގެ މައްޗަށް ހަ ދައުވާއެއް އުފުލާފައިވަނީ އެމްއެމްޕީއާރުސީގެ ޚިޔާނާތުގެ މައްސަލާއާ ގުޅިގެންނެވެ.

މި މައްސަލައަކީ މޯލްޑިވްސް ޕޮލިސް ސަރވިސްއާއި، އެންޓި-ކޮރަޕްޝަން ކޮމިޝަނާއި، ޕްރެޒިޑެންޝަލް ކޮމިޝަން އޮން ކޮރަޕްޝަން އެންޑް އެސެޓް ރިކަވަރީ ގުޅިގެން ތަޙުޤީޤުކުރުމަށްފަހު ޕީޖީ އޮފީހަށް ފޮނުވި މައްސަލައެކެވެ. މި މައްސަލައިގެ ތަފްސީލު ހިއްސާ ކުރަމުން މިދިޔަ ޑިސެމްބަރު މަހުގެ 29 ވަނަ ދުވަހު ޕީޖީ އޮފީހުން ނެރުނު ބަޔާނެއްގައި ބުނެފައިވަނީ، ނިހާން މަޖިލީހުގެ ވިލިމާލެ ދާއިރާގެ މެންބަރު ކަމުގައި އަދި މާލިއްޔަތު ކޮމެޓީގެ މުޤައްރިރުގެ މަޤާމުގައި ހުރިއިރު، މަޤާމުގެ ޙައިޞިއްޔަތުން އަދާ ކުރަންޖެހޭ މަސްޢޫލިއްޔަތުތައް ވަކިގޮތަކަށް ކުރުމަށް ނުވަތަ ނުކޮށް ދޫކޮށްލުމުގެ މުޤާބިލުގައި، ހ. ސާމަރާ، އަޙްމަދު އަދީބު ޢަބްދުލްޣަފޫރުގެ ގާތު ރިޝްވަތަށް އެދިފައިވާ ކަމަށެވެ. އަދި އަދީބު ދީފައިވާ ރިޝްވަތު ހިފައި، ކުށް ކޮށްގެން ހޯދާފައިވާ ފައިސާ އަތުގައި ބަހައްޓައި، އެ ފައިސާ ބޭނުން ކޮށްފައިވާކަން ތަޙުޤީޤަށް ހޯދިފައިވާކަމަށް ބަޔާނުގައި ބުނެފައިވެއެވެ.

އޭގެ އިތުރުން، ނިހާނަށް ލިބިފައިވާ މި ފަދަ އެއްވެސް ފައިސާއެއް ލިބުނުކަން އޭނާ 2014 އިން ފެށިގެން 2019 އާ ދެމެދު ހުށަހަޅާފައިވާ މާލީ ބަޔާންތަކުގައި ހިމަނާފައި ނުވާކަން ފާހަގަކޮށް ޕީޖީ އޮފީހުން ބުނީ، މި މައްސަލާގައި އުފުލާފައިވާ ދަޢުވާތަކާ ގުޅިގެން އޭނާ ކުށް ކޮށްގެން ހޯދާފައިވާ ފައިސާ އަދި އެއާ އެއްކޮށްފައިވާ މުދާ އަދި ފައިސާ ދައުލަތަށް ނަގައިދިނުމަށް ކޯޓުގައި އެދިފައިވާނެ ކަމަށެވެ.

ނިހާނުގެ މައްޗަށް އުފުލާފައިވާ ދައުވާތަކުގެ ތަފްސީލުތައް:

1. މަޖިލީހުގެ މެންބަރެއްގެ ޙައިޞިއްޔަތުން އަދާކުރަންޖެހޭ ވާޖިބަށް ނުފޫޒު ފޯރުވުމުގެ ގޮތުން އޭރުގެ ޓޫރިޒަމް މިނިސްޓަރު އަޙްމަދު އަދީބު ޢަބްދުލްޣަފޫރު މެދުވެރިވެގެން އެސް.އޯ.އެފް ޕްރައިވެޓް ލިމިޓެޑުގެ -/150،000 (އެއްސަތޭކަ ފަންސާސްހާސް) އެމެރިކާ ޑޮލަރުގެ ޗެކެއް ލިބިގަނެފައިވާތީ ރިޝްވަތު ހިފުމުގެ ކުށުގެ ދައުވާއެއް

2. އަދީބު ދޭ ފައިސާއަކީ ކުށްކޮށްގެން ހޯދާފައިވާ ފައިސާއެއްކަން ޝައްކު ކުރެވެންޖެހޭ ޙާލަތުގައި، އަދީބު މެދުވެރިވެގެން -/150،000 (އެއްލައްކަ ފަންސާސް ހާސް) އެމެރިކާ ޑޮލަރުގެ ޗެކެއް ލިބިގަނެ، މި ފައިސާއާއި އެހެން ފައިސާ އެއްކުރުމަށްފަހު ޕްލެޓިނަމް ރެޒިޑަންސްއިން ފްލެޓެއް ގަނެފައިވާތީ މަނީ ލޯންޑަރިންގ ގެ ކުށުގެ ދައުވާ

3. 2014 ވަނަ އަހަރު ޕްރޮސިކިއުޓަރ ޖެނެރަލްގެ މަޤާމަށް މީހަކު އައްޔަން ކުރުމަށާއި، ހަމަ އެ އަހަރު ރައްޔިތުންގެ މަޖިލީހުގެ މެންބަރުންގެ ތެރެއިން ޖުޑީޝަލް ސަރވިސް ކޮމިޝަނަށް އައްޔަންކުރާ މެންބަރު ހޮވުމަށްޓަކައި ރައްޔިތުންގެ މަޖިލީހުން ނެގި ވޯޓާ ގުޅިގެން، ރިޝްވަތުގެ ގޮތުގައި ރޮލެކްސް (ސަބްމެރީނާ) ބްރޭންޑްގެ ގަޑިއެއް ދިނުމަށް އަދީބު ގާތު އެދިފައިވާތީ ރިޝްވަތު ލިބިދިނުމަށް އެދުމުގެ ކުށުގެ ދަޢުވާ.

4. އަޙްމަދު އަދީބު ޢަބްދުލްޣަފޫރު ދިން ރޮލެކްސް ބްރޭންޑްގެ ގަޑި ބަލައިގަނެފައިވާތީ ރިޝްވަތު ހިފުމުގެ ކުށުގެ ދަޢުވާ.

5. މެންބަރުކަމުގެ ހައިސިއްޔަތުން އަދާ ކުރި މަސްޢޫލިއްޔަތުތައް އޭރުގެ ޓޫރިޒަމް މިނިސްޓަރ ހ.ސާމަރާ، އަޙްމަދު އަދީބު ޢަބްދުލްޣަފޫރު އަންގާ ގޮތަށް އަދާކުރުމުގެ މުޤާބިލުގައި -/650،000 (ހަލައްކަ ފަންސާސް ހާސް) ރުފިޔާ ދިނުމަށް އަޙްމަދު އަދީބު ގާތު އެދިފައިވާތީ ރިޝްވަތު ލިބިދިނުމަށް އެދުމުގެ ކުށުގެ ދަޢުވާ.

6. އަޙްމަދު އަދީބު ޢަބްދުލްޣަފޫރު އެ ޢަދަދަށް ފައިސާ ދިނުމުން އެ ފައިސާ ހިފާފައިވާތީ ރިޝްވަތު ހިފުމުގެ ކުށުގެ ދަޢުވާ އެކެވެ.