އިންޑިއާއަކީ ވިހަ ގޭސް މަދުކުރުމަށް އެންމެ ބޮޑެތި މަސައްކަތް ކުރާ ޤައުމު: މަޖިލިސް ދިރާސާ

އިންޑިއާއަކީ ވިހަ ގޭސް މަދުކުރުމަށް އެންމެ ބޮޑެތި މަސައްކަތް ކުރާ ޤައުމުކަމަށް ރައްޔިތުންގެ މަޖިލީހުގެ ރައީސް އަދި ކުރީގެ ރައީސް މުހައްމަދު ނަޝީދު ވިދާޅުވެއްޖެއެވެ.

ފެބްރުއަރީ މަހުގެ 10 ވަނަ ދުވަހު އޮންލައިންކޮށް ބޭއްވި ވޯލްޑް ސަސްޓެއިނަބަލް ޑިވަލޮޕްމަންޓް ސަމިޓް 2021ގައި ރާއްޖޭގެ ފަރާތުން ވާހަކަދައްކަވަމުން ރައީސް ނަޝީދު ވިދާޅުވީ، އިންސާނުންގެ އަމަލުތަކުގެ ސަބަބުން މޫސުމަށް އަންނަ ބަދަލުތަކަކީ މިއަދު ދުނިޔެއަށް ކުރިމަތިވެފައިވާ އެންމެ ބޮޑު އެއް ނުރައްކާކަމަށެވެ. މި ނުރައްކަލުން ސަލާމަތްވުމަށްޓަކައި ވަގުތު ކުޑަވަމުންދާއިރު، މި މަސައްކަތުގައި ހުރިހާ ޤައުމެއްއެކުގައި ގުޅިގެން މަސައްކަތްކުރަންޖެހޭކަން ފާހަގަކުރައްވާ ރައީސް ނަޝީދުވަނީ ތަރައްޤީ ގެނައުމުގައި ތިމާވެއްޓާއި ރައްޓެހި އުކުޅުތައް ބޭނުންކުރުމަށް ގޮވާލައްވާފައެވެ. އެގޮތުން ފަރުތައް ހަލާކުނުވާނެފަދައިން ތަރައްޤީ ގެނައުމާއި، ކަނޑޫފާތައް ނުހިއްކާ ތަރައްޤީގެނައުމަށް ރައީސް ނަޝީދު ގޮވާލެއްވިއެވެ. މީގެ އިތުރުން ހަލާކުވެފައިވާ ފަރުތައް އަލުން ހެއްދުމުގެ މަސައްކަތުގައި ހޫނުގައި އަދި އެސިޑިކް ކަނޑެއްގައި ހެދޭނެފަދަ މުރަކަ އުފެއްދުންކަހަލަ ޒަމާނީ އީޖާދީ ވިސްނުންތައް ގެންގުޅުމަށް ރައީސް ނަޝީދު ގޮވާލެއްވިއެވެ.

Advertisement

ތިމާވެއްޓަށް ކުރާ އަސަރުކުޑަކުރުމަށް ކުރެވޭނެ އެންމެ ބޮޑު މަސައްކަތަކީ ޖައްވަށް ބޭރުކުރާ ވިހަ ގޭސް މަދުކުރުންކަން ފާހަގަކުރައްވާ ރައީސް ނަޝީދު ވިދާޅުވީ، މި މަސައްކަތުގައި މިފަދަ ގޭސްތައް އެންމެ ގިނައިން ބޭރުކުރާ ވިލާތުގެ ޤައުމުތަކާއި، އެމެރިކާ، ޖަޕާން ކެނެޑާ ދެކުނު ކޮރެއާ އަދި ދެކުނު އެފްރިކާފަދަ ޤައުމުތައް ގުޅުމަކީ ޒީރޯ އެމިޝަންގެ ޓާގެޓްދަށުން ޕެރިސް އެގްރިމެންޓްގައި ކަނޑައަޅާފައިވާ ލަނޑުދަނޑި ޙާސިލުކުރުމަށް ލިބޭ އުންމީދެއްކަމަށެވެ.

މިހާރު ދުނިޔޭގެ އާބާދީގެ 63 އިންސައްތަ ޒީރޯ ކާބަންއަށް އަމާޒު ހިފާވާއިރު، އެންމެ ފާހަގަކޮށްލެވޭ އަދި އެންމެ ބޮޑު މަސައްކަތްތަކެއް ކުރައްވަނީ ބޮޑު ވަޒީރު ނަރެންދްރަ މޯދީގެ އިސްނެންގެވުމާއެކު އިންޑިއާއިންކަމަށް ރައީސް ނަޝީދު ވިދާޅުވިއެވެ. ދުނިޔޭގެ ޤައުމުތަކުން ކާބަން އެމިޝަން މަދުކުރުމަށް ކުރާ މަސައްކަތް ބެލުމަށް ރައްޔިތުންގެ މަޖިލީހުން ތައްޔާރުކުރި ދިރާސާއަކުން ދައްކާގޮތުން އިންޑިއާއަކީ ވިހަ ގޭސް އެންމެ ގިނައިން ބޭރު ކުރާ ޤައުމުތަކުގެ ލިސްޓްގައި ނުހިމެނުނަސް އެ ޤައުމުން މިކަން ހުއްޓުވުމަށްޓަކައި ގިނަ އުންމީދީ މަސައްކަތްތަކެއް ކުރައްވާކަމަށެވެ.

ރައީސް ނަޝީދު ވަނީ، އިންޑިއާގެ ބޮޑު ވަޒީރު ނަރެންދްރަ މޯދީ މިދިޔަ އަހަރުގެ ޑިސެމްބަރު މަހު އެ ޤައުމުން 2030 ވަނަ އަހަރުގެ ކުރިން 440 އަށްވުރެ ގިނަ ވޯޓްގެ ރިނުއުވަބަލް ހަކަތަ އުފެއްދުމަށް ނިންމުމަކީ އުފާފުޅުކުރައްވާ އަދި މައްސަލަ ހައްލުކުރުމަށް ލިބޭ ބޮޑު ބާރެއްކަމަށް ވިދާޅުވެފައެވެ. އަދި މި ސަމިޓްގެ ތެރެއިން މިހާތަނަށް އައިރު 90 އަށްވުރެ ގިނަ ވޯޓްގެ ކަރަންޓު އުފެއްދުމުގެ އިންތިޒާމު ހަމަޖެހިފައިވާކަން ބޮޑު ވަޒީރު ނަރެންދްރަ މޯދީ ހާމަކުރެއްވުމަކީ އިންޑިއާއިން މި މައްސަލަ ސީރިއަސް މައްސަލެއްގެގޮތުގައި ބަލާކަން ހާމަވާކަމެއްކަމަށް ރައީސް ނަޝީދު ވިދާޅުވިއެވެ.

ރައީސް ނަޝީދުވަނީ ރާއްޖެ ހިމެނޭހެން 48 ޤައުމު ބައިވެރިވާ ކްލައިމެޓް ވަލްނަރަބަލް ފޯރަމްގެ މަސައްކަތްތަކަށްވެސް އަލިއަޅުއްވާލައްވާފައެވެ. މި ފޯރަމްގެ ތެރެއިން ޤައުމުތަކުން ތަރައްޤީ ގެންނައިރު ތިމާވެއްޓާއި ރައްޓެހި ޕްލޭނެއް ނުވަތަ ކްލައިމެޓް ޕްރޮސްޕެރިޓީ ޕްލޭނެއް ހަދާފައިވާކަމަށް ވިދާޅުވިއެވެ. އެމަނިކުފާނު ވަނީ ދެކުނު އޭޝިއާގެ ޤައުމުތައް އެކުގައި މަސައްކަތްކޮށްފިނަމަ މި ސަރަހައްދަކީ މިފަދަ ތަރައްޤީ ގެނައުމުގައި ދުނިޔޭގެ ލީޑިން ޤައުމުތަކަށްވުމުގެ ޤާބިލުކަން އެބަހުރިކަމަށް ވިދާޅުވެފައެވެ.