ރައީސް މައުމޫނާއި އަނބިކަނބަލުން ވެސް ވެކްސިންގެ ފުރަތަމަ ޑޯޒް ޖައްސަވައިފި
10 ފެބުރުއަރީ 2021 | ބުދަ 10:22ހުރިހާ ރައްޔިތުން ވެސް ރައްކާތެރިވެ ތިބުމަށް ރައީސް މައުމޫން ވަނީ ޓްވީޓްގައި އިލްތިމާސް ކުރައްވާފައި
ކުރީގެ ރައީސް މައުމޫން އަބްދުލް ގައްޔޫމާއި އަނބިކަނބަލުން ނަސްރީނާ އިބްރާހިމް
ކުރީގެ ރައީސް މައުމޫން އަބްދުލް ގައްޔޫމާއި އަނބިކަނބަލުން ނަސްރީނާ އިބްރާހިމް ވެސް ކޮވިޝިލްޑް ވެކްސިންގެ ފުރަތަމަ ޑޯޒް ޖައްސަވައިފިއެވެ.
މިކަން ހާމަ ކުރައްވާ ކުރެއްވި ޓްވީޓެއްގައި ރައީސް މައުމޫން ވިދާޅުވީ އެމަނިކުފާނާއެކު އަނބިކަނބަލުން ވެކްސިން ޖައްސަވާފައިވާ ކަމަށާއި ވެކްސިން ޖެއްސެވީ ސެނެހިޔާ ހޮސްޕިޓަލުން ކަމަށެވެ.
އަދި ހުރިހާ ރައްޔިތުން ވެސް ރައްކާތެރިވެ ތިބުމަށް ރައީސް މައުމޫން ވަނީ ޓްވީޓްގައި އިލްތިމާސް ކުރައްވާފައެވެ.
ކުރީގެ ނައިބްރައީސް އަދި ރައީސް އަބްދުﷲ ޔާމީނުގެ ޤާނޫނީ ވަކީލުންގެ ޓީމުގައި ހިމެނިވަޑައިގަންނަވާ ޑރ މުހައްމަދު ޖަމީލް އަހުމަދު ވެސް ކޮވިޝީލްޑް ވެކްސިން ޖައްސަވާފައިވާއިރު ދާދި ފަހުން ކުރީގެ ރައީސް އަދި އިދިކޮޅު ކޯލިޝަންގެ ސްޕެޝަލް އެޑްވައިޒަރ ޑރ މުޙައްމަދު ވަޙީދު ޙަސަން މަނިކުވެސް ވެކްސިން ޖައްސަވާފައިވާއިރު، އެމަނިކުފާނު ވެސް ވަނީ ވީހާވެސް ގިނަ ބަޔަކު ވެކްސިން ޖެއްސެވުމަށް އިލްތިމާސް ކުރައްވާފައެވެ.
ވެކްސިން ޖެއްސެވިކަން ހާމަކުރައްވައި ޑރ. ވަޙީދު ކުރެއްވި ޓްވީޓުގައި ވިދާޅުވީ، އެމަނިކުފާނާއި އަނބިކަނބަލުންވެސް ކޮވިޑް ވެކްސިން ޖައްސަވާފައިވާ ކަމަށެވެ. އަދި ކޮވިޑް-19އަކީ މުޅި ދުނިޔެއަށް ކުރިމަތިވެފައިވާ އާލަމީ ވަބާއަކަށްވާއިރު، މިހާރުވެސް މި ވައިރަސްގެ ސަބަބުން އެތަކެއް ފުރާނައެއް ގޮސްފައިވާކަން ޑރ ވަޙީދު ފާހަގަ ކުރެއްވިއެވެ.
އެސްޓްރަޒެނެކާގެ ފޯރމިއުލާއަށް ސިރަމް އިންސްޓިޓިއުޓުން އުފައްދާފައިމިވާ ވެކްސިނަކީ އާންމު ރެފްރިޖްރޭޝަން ފިނިހޫނުމިނުގައި ވެސް ބޭނުން ކުރެވޭ ވެކްސިނެކެވެ.
1 ފެބްރުއަރީގައި ރާއްޖޭގައި ރަސްމީކޮށް ވެކްސިނޭޝަން ޕްރޮގްރާމް ފަށާފައިވާއިރު، ދައުލަތުގެ 3 ބާރުގެ އިސްވެރިންވެސް ވަނީ މި ވެކްސިން ޖައްސަވާފައެވެ.
