މާމެންދޫ މާރާމާރީ: އުދައްޔުގެ ޕޯސްޓްމޯޓަމް ހެދުމަށް އޭނާގެ ހަށިގަނޑު ރާއްޖެއިން ބޭރަށް ފޮނުވާލަނީ

ގއ މާމެންދޫގައި ހިނގި ގްރޫޕު މާރާމާރީއެއްގައި މަރުވި އުމުރުން 17 އަހަރުގެ އަހުމަދު އުދައްޔުގެ ޕޯސްޓްމޯޓަމް ހެދުމުގެ ތައްޔާރީތައް ފަށައިފިއެވެ.

ހޯމަ ދުވަހުގެރޭ ހިނގި މި މާރާމާރީގައި އުދައްޔުގެ ފުރާނަ ގޮސްފައިވާއިރު، ޕޯސްޓްމޯޓަމް ހެދުމަށްޓަކައި އޭނާގެ ހަށިގަނޑު ރާއްޖެއިން ބޭރަށް ފޮނުވާލުމަށް ފުލުހުން ދަނީ ތައްޔާރުވަމުންނެވެ. އަދި އެކަމަށްޓަކައި އޭނާގެ ހަށިގަނޑު މާލެ ގެނައުމުގެ މަސައްކަތް ފުލުހުން ވަނީ ފަށާފައެވެ.

އެކަމާ ގުޅޭގޮތުން ފުލުހުންގެ ކޮމިޝަނަރ މުޙައްމަދު ހަމީދު ކުރެއްވި ޓްވީޓެއްގައި ވިދާޅުވީ، މި ޙާދިސާގައި އުދައްޔު ނިޔާވެފައިވާއިރު، ޒަޙަމްވި ދެވަނަ ކުއްޖާގެ ޙާލުވެސް ސީރިއަސް ކަމަށެވެ. އަދި މި މައްސަލައާ ގުޅިގެން 3 މީހަކު މިހާތަނަށް ވަނީ ހައްޔަރު ކޮށްފައެވެ. އެގޮތުން ކޯޓު އަމުރެއްގެ ދަށުން ހޯމަ ދުވަހުގެ ރޭ ހައްޔަރު ކޮށްފައިވަނީ އުމުރުން 27 އަހަރުގެ މީހަކާއި އުމުރުން 23 އަހަރުގެ މީހެއްގެ އިތުރުން އުމުރުން 18 އަހަރުގެ މީހެއް ކަމަށް ފުލުހުން މައުލޫމާތު ދެއެވެ.

މި މައްސަލަ މިހާރު ބަލަމުންދަނީ ފުލުހުންގެ ސީރިއަސް އެންޑް އޮރގަނައިޒްޑް ކްރައިމް ޑިޕާޓްމަންޓުންނެވެ. އަދި މިއީ 2019 ވަނަ އަހަރުގެ ފަހުން ގްރޫޕް މާރާމާރީއެއްގައި މީހެއްގެ ފުރާނަ ދިޔަ ފުރަތަމަ ފަހަރެވެ.