ތޮއްޑޫ ދާއިރާގެ މެމްބަރު ޝިޔާން، ޓޫރިޒަމް މިނިސްޓަރު މައުސޫމްއާ ކުރައްވާ ސުވާލު މާދަމާގެ ޖަލްސާއަށް އެޖެންޑާކޮށްފި

ރައްޔިތުންގެ މަޖިލީހުގެ ތޮއްޑޫ ދާއިރާގެ މެމްބަރު ހަސަން ޝިޔާން، ޓޫރިޒަމް މިނިސްޓަރު ޑރ. އަބްދުﷲ މައުސޫމްއާ ސުވާލު ކުރެއްވުމަށް ބުދަ ދުވަހުގެ ރައްޔިތުންގެ މަޖިލީހުގެ ޖަލްސާއަށް އެޖެންޑާކޮށްފިއެވެ.

މެމްބަރު ޝިޔާން، ޓޫރިޒަމް މިނިސްޓަރު މައުސޫމްއާ ކުރެއްވުމަށް ހުށަހަޅުއްވާފައިވާ ސުވާލުގައި ވިދާޅުވެފައިވަނީ، "10 ނޮވެމްބަރު 2020ގައި ހައިކޯޓުން ނިންމި ޤަޟިއްޔާގައި ކ. މަހާނައެޅިހުރާގެ ސަބްލީސް ރައިޓްސް މިނިސްޓްރީ އޮފް ޓޫރިޒަމްގައި ރެޖިސްޓްރީ ކޮށްފައިވާ ކަމަށާއި، ރިހިވެލި ބީޗް ރިސޯޓްގެ ސަބްލީސް ރައިޓްސް ކާސްޓްއަވޭ މޯލްޑިވްސް ޕްރައިވެޓް ލިމިޓެޑްގެ އަތުގައި ނެތްކަން އެނގޭތީ، ސިވިލް ކޯޓުން ވިއްކާލުމަށް ހުކުމްކޮށްފައިވަނީ ވުޖޫދުގައި އެވަގުތު ނެތް ހައްގެއްކަމުގައި ބަޔާންކޮށްފައިވާއިރު، ޓޫރިޒަމް މިނިސްޓްރީގައި ރަޖިސްޓްރީކޮށްފައިއޮތް ހައްގެއް ވުޖޫދުގައި ނެތިގެން ދިޔައިރު، އެގޮތަށް ނެތިގެން ދިޔައީ ޓޫރިޒަމް މިނިސްޓްރީއަށް އެނގިހުރެތޯ" އެވެ.

މެމްބަރު ޝިޔާންގެ އެ ސުވާލަށްފަހު، ގުޅުންހުރި ސުވާލެއް އޮތްނަމަ، މެމްބަރުންނަށް އިތުރު ސުވާލު ކުރުމުގެ ފުރުސަތު ލިބިގެންދާނެއެވެ.

މެމްބަރު ޝިޔާނުގެ ސުވާލުގެ އިތުރުން، މަޖިލީހުގެ ބުދަ ދުވަހުގެ ޖަލްސާގެ އެޖެންޑާގައި ވަނީ، ނުނިމިހުރި މަސައްކަތުގެ އެޖެންޑާގެ ދަށުން، ހެންވޭރު ހުޅަނގު ދާއިރާގެ މެމްބަރު ހަސަން ލަތީފް ހުށަހަޅުއްވާފައިވާ މާލޭގައި ޒުވާނުންނަށް އުފާވެރި މާހައުލެއްގައި އެއްވެ ތިބެވޭނެ ފަދަ މަރުކަޒެއް ގާއިމުކޮށްދިނުމަށް ސަރުކާރަށް ގޮވާލައި ހުށަހަޅާފައިވާ ޤަރާރަށް ބަހުސްކުރުމެވެ. އަދި މާފަންނު މެދު ދާއިރާގެ މެމްބަރު އިބްރާހީމް ރަޝީދު ހުށަހަޅުއްވާފައިވާ، ދިވެހިރާއްޖޭގެ މުއާޞަލާތީ ހިދްމަތްތައް ބެލެހެއްޓުމުގެ ޒިންމާއާ ހަވާލުކުރެވިފައިވާ ފަރާތުން، ނުހަނު ދިގު މުއްދަތަކަށް، ދިވެހިރާއްޖޭގައި ހަދާފައިވާ ގާނޫނުތަކަށް ބެލުމެއްނެތި، ޓެލެކޮމް އޮޕަރޭޓަރުންގެ މަންފާއަށް ފައިދާވާގޮތަށް، ރައްޔިތުންނަށް ނުހަނު ގެއްލުންވަމުންދާ މަގުން، ގިނަގުނަ ކަންތައްތަކެއް ތަރުތީބުކޮށްފައިވާތީ، އެ ކަންކަން ނިމުމަކަށް ގެނައުމަށް ގޮވާލައި ހުށަހަޅާ ޤަރާރުގެ ބަހުސްކުރުމަށްވެސް އެޖެންޑާ ކޮށްފައިވެއެވެ.

މީގެއިތުރުން، ކޮމެޓީތަކުން ހުށަހަޅާ ކަންކަމުގެ އެޖެންޑާގެ ދަށުން، ރައްޔިތުންގެ މަޖިލީހުގެ ގަވާއިދުގެ 179 ވަނަ މާއްދާގެ ދަށުން، މެދުހެންވޭރު ދާއިރާގެ މެމްބަރު އަލީ އާޒިމް ހުށަހަޅުއްވާފައިވާ މައްސަލަ އިޖުތިމާއީ ކޮމެޓީން ދިރާސާކޮށް ނިންމިގޮތުގެ ރިޕޯޓުވެސް ބުދަ ދުވަހުގެ ޖަލްސާގެ އެޖެންޑާގައި ހިމެނެއެވެ.

އާޒިމް ހުށަހަޅުއްވާފައިވާ އެ މައްސަލާގަައި ވަނީ، މިނިސްޓްރީ އޮފް ޔޫތް، ސްޕޯޓްސް އެންޑް ކޮމިއުނިޓީ އެންޕަވަރމަންޓްއިން ދިވެހިރާއްޖޭގެ ކުޅިވަރު ގާނޫނާ އެއްގޮތަށް ފުޓްބޯޅަ އެސޯސިއޭޝަން އޮފް މޯލްޑިވްސްއާ ދޭތެރޭ ފިޔަވަޅު އަޅާފައިނުވާތީ، ފުޓްބޯޅަ އެސޯސިއޭޝަން އޮފް މޯލްޑިވްސްއާއި ދޭތެރޭ ގާނޫނުގައިވާ ގޮތަށް ފިޔަވަޅު އަޅައިދިނުމަށެވެ.