މިދިޔަ އަހަރު ޗައިނާގައި ކުދިން އުފަންވި ރޭޓް، އޭގެ ކުރީ އަހަރާ އަޅައިބަލާއިރު 15 އިންސައްތަ ދަށަށް

ކޮވިޑް-19 އާ ގުޅިގެން އިގްތިޞާދީ ގޮތުން ދިމާވި ގޮންޖެހުންތަކާ ގުޅިގެން މިދިޔަ އަހަރު ޗައިނާގައި އުފަންވާ ރޭޓް އޭގެކުރީ 2019 ވަނަ އަހަރާ އަޅާބަލާއިރު 15 އިންސައްތަ ދަށަށްގޮސްފައިވާ ކަމަށް އެގައުމުގެ މިނިސްޓްރީ އޮފް ޕަބްލިކް ސެކިޔުރިޓީން ބުނެފިއެވެ.

ޗައިނާގައި މިދިޔަ އަހަރު 10.035 މިލިއަން ކުދިން ވިހާފައިވެއެވެ. އޭގެކުރީ އަހަރު ވިހާފައިވަނީ 11.79 ކުދިންނެވެ.

ފާއިތުވި އަހަރުތަކުގައި ޗައިނާގައި ވަނީ ބޯހިޔާވަހިކަމާއި، ތައުލީމާއި ސިއްހީ ކަންކަމަށް ކުރަންޖެހޭ ހޭދައާ ގުޅިގެން ކުދިން ހޯދުމަށް މީހުން ޖެހިލުންވާ ޖެހިލުންވުން އިތުރުވެފައެވެ. އެތައް އަހަރެއް ވަންދެން ޗައިނާގައި އަމަލުކުރަމުން އައި ވަން ޗައިލްޑް ޕޮލިސީ ނުވަތަ ކޮންމެ ދެމަފިރިއަކު އެއް ކުއްޖަކު ހޯދުމުގެ ސިޔާސަތަށް އަމަލުކުރުން 2016 ވަނަ އަހަރު ހުއްޓާލާފައިވީ ނަމަވެސް ޗައިނާގައި އަލަށް އުފަންވާ ރޭޓަށް މާބޮޑު ބަދަލެއް އައިސްފައެއްނުވެއެވެ.

އަނެއްކޮޅުން މިދިޔަ އަހަރު ކުރިމަތިވި ކޮވިޑް-19 އާ ގުޅިގެން ކުދިން ހޯދުމާމެދު ޗައިނާގެ ގިނަ ރައްޔިތުންނަށް ވަނީ ޔަގީންކަން ކުޑަވެފައެވެ. އެއާއެކު މިހާރު ދުނިޔޭގައި އެންމެ ހަލުވި މިނުގައި މުސްކުޅިވަމުން އަންނަ އާބާދީގައި ޒުވާނުންގެ އިންސައްތަ އިތުރުކުރުމަށް ޗައިނާއަށް ވަނީ ގިނަ ގޮންޖެހުންތަކެއް ކުރިމަތިވެފައެވެ.

ޗައިނާގެ އާބާދީގެ 250 މިލިއަން މީހުންނަކީ އުމުރުން 60 އަހަރުން މަތީގެ މީހުންނެވެ. ޗައިނާގެ އާބާދީ ހަލުވި މިނެއްގައި މުސްކުޅިވަމުންދާ ދިޔުމުގެ ސަބަބުން ޕެންޝަނާއި ސިއްހީ ނިޒާމުގެ ކަންކަން ހަރުދަނާކުރުމަށް ގިނަ ސިޔާސަތުތަކެއް ވަނީ ޗައިނާގެ ސަރުކާރަށް އެކުލަވާލަން ޖެހިފައެވެ.

މިދިޔަ އަހަރުގެ ޗައިނާގެ އާބާދީގެ ތަފްސީލީ މައުލޫމާތުތައް ފެބްރުއަރީ މަހުގެ ފަހުކޮޅު ޗައިނާގެ ނޭޝަނަލް ބިޔުރޯ އޮފް ސްޓެޓިސްޓިކްސް އިން ހާމަކޮށްފައެވެ.