ގއ. މާމެންދޫގައި ހިނގި މާރާމާރީއާ ގުޅިގެން 3 ފިރިހެނުން ހައްޔަރުކޮށްފި
9 ފެބުރުއަރީ 2021 | އަންގާރަ 03:46މި މައްސަލަ މިހާރު ބަލަމުންދަނީ ފުލުހުންގެ ސީރިއަސް އެންޑް އޮރގަނައިޒްޑް ކްރައިމް ޑިޕާޓްމަންޓުން
ގއ މާމެންދޫގައި ހިންގި މާރާމާރީގައި އަނިޔާވި ކުއްޖާ ހޮސްޕިޓަލަށް ގެންދަނީ، - މި ޙާދިސާ ހިނގާފައިވަނީ ހޯމަ ދުވަހުގެ ރޭގެ ވަގުތެއްގައި ކަމަށް ފުލުހުން މައުލޫމާތު ދޭ
ގއ މާމެންދޫގައި ހިނގި ގްރޫޕް މާރާމާރީއާ ގުޅިގެން 3 ދިވެހި ފިރިހެނުން ހައްޔަރުކޮށްފިއެވެ.
ފުލުހުން ބުނީ މި މާރާމާރީއާ ގުޅިގެން ކޯޓު އަމުރެއްގެ ދަށުން ހޯމަ ދުވަހުގެ ރޭ ހައްޔަރުކޮށްފައިވަނީ އުމުރުން 27 އަހަރުގެ މީހަކާއި އުމުރުން 23 އަހަރުގެ މީހެއްގެ އިތުރުން އުމުރުން 18 އަހަރުގެ މީހެއް ކަަމަށެވެ.
ހޯމަ ދުވަހުގެރޭ ދެ ގްރޫޕެއްގެ ދެމެދުގައި ހިނގި މި މާރާމާރީގައި އުމުރުން 17 އަހަރުގެ އަހުމަދު އުދައްޔު ނަމަކަށް ކިޔާ ކުއްޖަކު ވަނީ މަރުވެފައެވެ.
އެކަމާ ގުޅޭ ގޮތުން ފުލުހުންގެ ކޮމިޝަނަރ މުޙައްމަދު ހަމީދު ކުރެއްވި ޓްވީޓެއްގައި ވިދާޅުވީ، މި ޙާދިސާގައި އުދައްޔު މަރުވެފައިވާއިރު، ޒަޙަމްވި ދެވަނަ ކުއްޖާގެ ޙާލު ވެސް ސީރިއަސް ކަމަށެވެ. ޙަމީދު ވިދާޅުވީ، މި މައްސަލަ މިހާރު ބަލަމުންދަނީ ފުލުހުންގެ ސީރިއަސް އެންޑް އޮރގަނައިޒްޑް ކްރައިމް ޑިޕާޓްމަންޓުން ކަމަށެވެ.
ސީޕީ ޙަމީދު ވަނީ މި މައްސަލަ ތަހުޤީޤުކުރުމުގައި ފުލުހުންނަށް އެއްބާރުލުން ދެއްވުމަށް އެރަށު ރައްޔިތުންގެ ކިބައިން އިލްތިމާސް ކުރައްވާފައެވެ.
މިއީ 2019 ވަނަ އަހަރުގެ ފަހުން ގްރޫޕް މާރާމާރީއެއްގައި މީހަކު މަރުވި ފުރަތަމަ ފަހަރެވެ.
