މާލެއިން ކޮވިޑް-19 އަށް ވެކްސިން ޖެހި މީހުންގެ އަދަދު 10،600ށް ވުރެ މައްޗަށް އަރައިފިއެވެ.

ރާއްޖޭގައި ކޮވިޑް-19 އަށް ވެކްސިން ޖަހަން ފެށިތާ އަށް ދުވަސް ވެފައިވާއިރު، މިހާތަނަށް 10،626 މީހުން މާލެ ސަރަހަދުން އެކަނިވެސް ކޮވިޑް-19 ވެކްސިން ޖަހާފައިވާކަމަށް ހެލްތު ޕްރޮޓެކްޝަން އެޖެންސީން ބުނެފިއެވެ.

އެޗްޕީއޭއިން ހާމަކޮށްފައިވާ މައުލޫމާތުތައް ދައްކާގޮތުން މުޅި ޖުމްލަ 12،934 މީހުން ރާއްޖެއިން ވެކްސިން ޖަހާފައިވާއިރު، އަތޮޅުތެރޭގެ އެކި ރަށްރަށުން 2،308 މީހުން ވަނީ ވެކްސިން ޖަހާފައެވެ.

ފެބްރުއަރީ އަށް ވަނަ ދުވަހު އެކަނި 3،190 މީހުން ކޮވިޑް-19 ވެކްސިން ޖަހާފައިވާ އިރު، އެއީ މާލެ ސަރަހައްދުން ވެކްސިން ޖެހި 2،663 މީހުންނާއި އަތޮޅުތެރެއިން ވެކްސިން ޖެހި 527 މީހުންނެވެ.

ފެބްރުއަރީ އެއް ވަނަ ދުވަހު ރާއްޖޭގައި ކޮވިޑް-19އަށް ވެކްސިން ޖަހަން ފަށާފައިވާއިރު، އެންމެ ފުރަތަމަ ވެކްސިން ޖަހަން ފެށީ ސިއްހީ ހިދުމަތްތެރިންނަށާއި ފްރަންޓްލައިންގައި މަސައްކަތްކުރާ ފަރާތްތަކަށެވެ. އޭގެ ފަހުން އުމުރުން 70 އަހަރުން މަތީގެ މީހުންނަށް ވެކްސިން ދޭން ފަށާފައިވާއިރު، އުމުރުން 65 އަހަރުން މަތީގެ މީހުންނާއި އުމުރުން 55 އަހަރުން މަތީގެ މީހުންނަށް ވެކްސިން ޖަހަން ވަނީ ފަށާފައެވެ. ފަތުރުވެރިކަމުގެ ސިނާއަތުގައި މަސައްކަތްކުރާ ފަރާތްތަކަށްވެސް ކޮވިޑް-19 ވެކްސިންދޭން ވަނީ ފަށާފައެވެ.

މިހާތަނަށް ރާއްޖެއިން އެމަޖެންސީކޮށް ބޭނުން ކުރުމުގެ ހުއްދަދީފައިވަނީ ސިރަމް އިންސްޓިޓިއުޓުން އުފައްދާފައިވާ ކޮވިޝީލްޑް ވެކްސިނަށެވެ. ފުރަތަމަ ވެކްސިން ދޭން ފެށިއިރު، ރައްޔިތުންގެ މެދުގައި ވެކްސިނާއި މެދު ޝައްކުތަކެއް ހުރި ނަމަވެސް ދުވަހަކަށް ވުރެ ދުވަހެއް ވެކްސިން ޖަހާ މީހުންގެ އަދަދު ދަނީ އިތުރުވަމުންނެވެ.