ވޭރިއަންޓުން ސަލާމަތްވުމަށް އޮތް އެންމެ މޮޅު ދިފާއަކީ އަވަހަށް ވެކްސިން ޖެހުން: ޑރ ފައުޗީ

މިހާރު ފެތުރެމުންދާ ކޮވިޑް-19 ގެ އެކި ވޭރިއަންޓުތަކުން ސަލާމަތްވުމަށް އަވަހަށް ވެކްސިން ޖެހުން މުހިންމު ކަމަށް އެމެރިކާގެ އިންފެކްޝަސް ޑިޒީޒްގެ ޑޮކްޓަރ އަދި ރައީސް ޖޯ ބައިޑެންގެ ޗީފް މެޑިކަލް އެޑްވައިޒަރ އެންތަނީ ފައުޗީ ވިދާޅުވެއްޖެއެވެ.

ހޯމަ ދުވަހު ނޫސްވެރިންނާއި ބައްދަލު ކުރައްވައި ދެއްވި ބަސްދީގަތުމެއްގައި ޑރ ފައުޗީ ވިދާޅުވީ، ކޮވިޑުގެ އައު ވޭރިއަންޓުތައްވެސް ދުނިޔޭގެ އެކި ކަންކޮޅުތަކުގައި ފެތުރެމުންދާއިރު، މިވަގުތު އޮތް އެންމެ ބޮޑު ދިފާއަކީ އަވަހަށް ވެކްސިން ޖެހުން ކަމަށެވެ. އަދި ވީ އެންމެ އަވަހަށް އާބާދީގެ ބޮޑު ބަޔަކަށް ވެކްސިން ދީ ނިންމާލުން މުހިއްމުކަން ޑރ ފައުޗީ ފާހަގަ ކުރެއްވިއެވެ.

ޑރ ފައުޗީ ވަނީ އޮންނަ އުސޫލުގެ ތެރެއިން ވެކްސިންގެ 2 ޑޯޒް ފުރިހަމަ ކުރުމަށް އިލްތިމާސް ކުރައްވާފައެވެ. ޢެގޮތުން ގިނަ މީހުން ވެކްސިން ޖަހައި "އިމިއުން" ވަމުންދާ ވަރަކަށް ވައިރަސް އިތުރަށް މިއުޓޭޓްވުމުގެ ފުރުސަތު ކުޑަކޮށްދޭކަން ޑރ ފައުޗީގެ ވާހަކައިގައި ފާހަގަ ކުރެއްވިއެވެ.

އޭގެ އިތުރުން، ވައިރަސް ޖެހި ރަނގަޅުވެފައި ހުރި މީހެއްވެސް އަލުން އައު ވޭރިއަންޓަށް ޕޮޒިޓިވްވުމުގެ ފުރުސަތު އެކަމުގެ ސަބަބުން ކުޑަކޮށްދޭނެކަންވެސް ޑޮކްޓަރުން ފާހަގަ ކުރެއެވެ.

ދުނިޔޭގެ އެކި ކަންކޮޅުތަކުގައި ވެކްސިނޭޝަން ޕްރޮގްރާމް ފަށާފައިވާއިރު، ބައެއް ޤައުމުތަކުން ގެންދަނީ އަހަރުގެ ފުރަތަމަ ކުއާޓަރ ނިމޭއިރު އާބާދީގެ ބޮޑު ބަޔަކަށް ވެކްސިން ދިނުމަށް އަމާޒު ހިފައި، ވެކްސިން ޖެހުމުގެ ޙަރަކާތްތައް ފުޅާ ކުރަމުންނެވެ. ޚާއްސަ ގޮތެއްގައި އެކި ޤައުމުތަކުން ކޮވިޑުގެ އައު ވޭރިއަންޓު ފެންނަމުންދާއިރު، ވޭރިއަންޓުގެ ސަބަބުން ބައެއް ޤައުމުތަކުގައި ރެކޯޑު އަދަދުތަކުން މީހުން ޕޮޒިޓިވްވަމުން ދެއެވެ.

މުޅި ދުނިޔެއިން އެންމެ ގިނަ މީހުން ޕޮޒިޓިވްވެފައިވާ އެމެރިކާއިންވެސް މިހާތަނަށް 27 މިލިއަނަށްވުރެ ގިނަ މީހުން ޕޮޒިޓިވްވެފައިވާއިރު، އެ ޤައުމުންވެސް ވަނީ މިހާތަނަށް އާބާދީގެ 25 މިލިއަނަށްވުރެ ގިނަ މީހުންނަށް ކޮވިޑު ވެކްސިންގެ ފުރަތަމަ ޑޯޒް ޖަހާފައެވެ. އަދި 5 މިލިއަނަށްވުރެ ގިނަ މީހުން ވެކްސިންގެ 2 ޑޯޒް ފުރިހަމަ ކޮށްފައިވާކަމަށް ރިޕޯޓުތައް ބުނެއެވެ.