149 ކިލޯގެ މަސްތުވާތަކެތީގެ މައްސަލާގައި ފުލުހުންގެ ތަހުގީގު ޓީމުންވަނީ ބޮޑެތި ގޯސްތަކެއް ހަދާފައި: ޕީޖީ

ގދ. ހުޅުވާރުލުން ހޯދި 149 ކިލޯގެ މަސްތުވާތަކެތީގެ މައްސަލާގައި ފުލުހުންގެ ތަހުގީގު ޓީމުން ބޮޑެތި ގޯސްތަކެއް ހަދާފައިވާ ކަމަށް ޕްރޮސެކިއުޓަރ ޖެނެރަލް (ޕީޖީ) ހުސައިން ޝަމީމު ވިދާޅުވެއްޖެއެވެ.

މި ފަހުން ރާއްޖެއިން އެންމެ ގިނަދަދަކަށް އަތުލައިގަނެވުނު މަސްތުވާތަކެތީގެ މި މައްސަލަ، ދަށު ކޯޓުން ނިންމި ނިންމުން ހައިކޯޓުގައި އިސްތިއުނާފް ނުކުރަން ޕީޖީ ޝަމީމު ނިންމަވާފައިވާތީ، އެކަން ހިނގާފައިވާ ގޮތް ބެލުމަށް ރައްޔިތުންގެ މަޖިލީހުގެ ޖުޑީޝަރީ ކޮމެޓީން ހޯމަ ދުވަހު ބޭއްވި ބައްދަލުވުމުގައި ޕީޖީ ޝަމީމު ވިދާޅުވީ، އެ މައްސަލައިގެ ތަހުގީގައި ބަލާ ފާސްކުރުމާއި ހެކި ހޯދުމުގައި ގާނޫނާއި ހިލާފަށް އަަމަލުކޮށްފައިވާ ކަމަށެވެ. އަދި ޖިނާއީ އިޖުރާއަތާ ހިލާފަށް ބޮޑެތި ގޯސްތަކެއް ހެދިފައި ހުރުމުން، ދަށު ކޯޓުން މި މައްސަލަ ނުބެލޭނެ ކަމަށް ނިންމާފައިވާ ނިންމުން ހައިކޯޓުގައި އިސްތިއުނާފް ކުރިއަސް، ލިބޭނެ ކުރިއެރުމެއް، އަދި ދެއްކޭނެ އޮއްޓަރުހުރި ވާހަކައެއްވެސް ނެތްކަމަށް ޝަމީމު ވިދާޅުވިއެވެ.

Advertisement

ޝަމީމު ވިދާޅުވީ، 149 ކިލޯގެ މަސްތުވާތަކެތީގެ މައްސަލާގައި ފުލުހުންގެ ތަހުގީގު ޓީމުން، 28 އޭޕްރީލް 2019އިން ފެށިގެން ޖެހިގެންއައި 29 ވަނަ ދުވަހާ ހަމައަށް ތުހުމަތު ކުރެވޭ މީހުން ހައްޔަރު ނުކޮށް ފުލުހުންގެ ބެލުމުގެ ދަށުން ގެންގުޅުނު ކަމަށެވެ. އަދި ޕީޖީގެ އޮފީހާއި އެމައްސަލަ ހިއްސާކޮށްފައިވަނީވެސް، 29 އޭޕްރީލް 2019ގައި ކަމަށާއި، ތަހުމަތު ކުރެވޭ މީހުން ހައްޔަރުކުރީ އެމީހުން ފުލުހުންގެ ބެލުމުގެ ދަށުގައި ގެންގުޅޭތާ 25 ގަޑިއިރުފަހުން، ގދ. ތިނަދޫ މެޖިސްޓްރޭޓް ކޯޓުގެ އަމުރެއްގެ ދަށުންކަމަށެވެ.

ޝަމީމު ވިދާޅުވީ، ގދ. ހުޅުވާރުލުން މަސްތުވާތަކެތި ހޯދުމުގައިއާއި ގޭގެއަށްވަދެ މީހުން ހައްޔަރުކުރުމުގައި ވެސް އެއްވެސް ކޯޓު އަމުރެއް ފުލުހުން ހޯދާފައިނުވާއިރު، ތުހުމަތު ކުރެވޭ މީހުން، 25 ގަޑިއިރު ވަންދެން ފުލުހުންގެ ބެލުމުގެ ދަށުގައި ކޯޓު އަމުރެއްނެތި ގެންގުޅުނީވެސް ގާނޫނާއި ހިލާފަށް ކަމަށެވެ.

ވަރަށް އާދައިގެ އިޖުރާއަތުތަކާއި ފުލުހުން ހިލާވެފައިވާކަން ފާހަގަކުރައްވާ ޝަމީމު ވަނީ ތަފްސީލީ ގޮތެއްގައި ކޮމެޓީއަށް މައުލޫމާތު ހާމަކުރެވޭނީ، ކޮމެޓީން ސިއްރުކޮށްގެން ކަމަށެވެ. އެގޮތުގެ މަތީން ކޮމެޓީގެ ފަހުބައި ކުރިއަށް ގެންދިޔައީ ސިއްރުކޮށްގެންނެވެ.

މަސްތުވާތަކެތީގެ މި މައްސަލައަކީ ކުރީގެ ޕީޖީ އާއިޝަތު ބިޝާމުގެ ޕީޖީކަމުގައި ހިނގާދިޔަ ކަމެކެވެ. މިހާރުގެ ޕީޖީ ޝަމީމު ވިދާޅުވީ، 149 ކިލޯގެ މަސްތުވާތަކެތީގެ މައްސަލަ ކްރިމިނަލް ކޯޓަށް ހުށަހެޅުމަށް ޕީޖީގެ އޮފީހަށް ލިޔެކިޔުންތައް ލިބިފައިވަނީ، 26 ޖޫން 2019ގައި ކަމަށެވެ. އަދި ޖިނާއީ އިޖުރާއަތު ގާނޫނު ބުނާގޮތުން 28 ޖޫންގެ ކުރިން ކޯޓަށް އެމައްސަލަ ހުށަހަޅަންޖެހޭތީއާއި، އެދުވަހަކީ ހުކުރު ދުވަހަކަށްވާތީ، 27 ޖޫން 2019ގައި އެ މައްސަލަ ކްރިމިނަލް ކޯޓަށް ހުށަހަޅާފައިވާކަމަށެވެ.

ނަމަވެސް، ކްރިމިނަލް ކޯޓުގެ ރަޖިސްޓްރާގެ ނިންމުމުގައި، ތުހުުމަތު ކުރެވޭ ދެމީހުންގެ ބަޔާނުގައި ދިފާއީ ވަކީލުން ސޮއިކޮށްފައިނުވާތީ، އެ ދެމީހުންގެ ބަޔާން ނެތްކަމަށް ނިންމައި، އަދި މިމައްސަލައަކީ ކްރިމިނަލް ކޯޓުގެ އިހުތިޞާސް ލިބިގެންވާ މައްސަލައެއް ނޫންކަމަށްވާތީ ނުބެލޭނެ ކަމަށް ބުނެފައިވާ ކަމަށް ޝަމީމު ވިދާޅުވިއެވެ. އަދި ރަސްޖިސްޓްރާގެ ނިންމުން ކްރިމިނަލް ކޯޓުގެ ފަނޑިޔާރުންގެ މަޖިލީހަށް ހުށަހެޅުމުންވެސް ނިންމާފައިވަނީ ރަޖިސްޓްރާގެ ނިންމުން ރަނގަޅުކަމަށެވެެ.

ކްރިމިނަލް ކޯޓުގެ އެ ނިންމުން ހައިކޯޓުގައި އިސްތިނާފު ކުރުމުގެ ބަދަލުގައި، އޭރުގެ ޕީޖީ ނިންމީ، ގދ. ގައްދޫ މެޖިސްޓްރޭޓް ކޯޓަށް އެމައްސަލަ ހުށަހަޅަން ކަމަށާއި، އެގޮތުން ގައްދޫ ކޯޓުގައި އެމައްސަލަ ކުރިއަށްގެންދިޔަ ކަމަށާއި ނަމަވެސް ނިންމުމުގައި ވަނީ އެއީ އެކޯޓަށް ބެލޭނެ މައްސަލައެއް ނޫންކަމަށެވެ. ޕީޖީ ޝަމީމު ވިދާޅުވީ ގައްދޫ މެޖިސްޓްރޭޓް ކޯޓުން ނިންމާފައިވާ ނިންމުން ރަނގަޅު ކަމަށެވެ.

ޕީޖީ ޝަމީމު ވިދާޅުވީ، ހައިކޯޓުގައި މި މައްސަލަ އިސްތިއުނާފް ނުކުރަން ނިންމީ، މި މައްސަލައިގެ ތަހުގީގު މަރުހަލާގައި، ގާނޫނުއަސާސީއާއި ގާނޫނާ އަދި ޖިނާއީ އިޖުރާއަތުގެ ގާނޫނާ ހިލާފަށް ބޮޑެތި ގޯސްތަކެއް ހެދިފައިވާތީ ކަމަށެވެ.

ޝަމީމް ވިދާޅުވީ، 149 ކިލޯގެ މަސްތުވާތަކެތީގެ މިމައްސަލާގެ ތަހުގީގުގައި ޖުމްލަ 9 ފުލުހުން ހަރާކާތްތެރިވިއިރު، އޭގެ ތެރެއިން 5 ފުލުހެއް، މ. އުޖާލާގޭގައި ފުލުހުން މީހަކަށް އަނިޔާކުރި ކަމަށް ތުހުމަތުކުރާ މައްސަލައިގައި ހިމެނޭ ކަމަށެވެ. ނަމަވެސް އޭގެ ތަފްސީލް މީޑިއާތަކަށް ހުޅުވާލައިގެން ބޭއްވި ކޮމެޓީގެ ބައްދަލުވުމުގައި ޝަމީމު ހާމަކުރައްވާފައެއް ނުވެއެވެ.