ޕޮލިސް ބޯޑަށް އާންމުންގެ ތެރެއިން ޢައްޔަނުކުރަންޖެހޭ ދެ މެމްބަރުން ޢައްޔަނުކުރަމަށްޓަކައި އެކަމަށް ކުރިމަތިލުމުގެ ފުރުޞަތު ހުޅުވާލައިފިއެވެ.

ރައްޔިތުންގެ މަޖިލީހުގެ ހޯމަ ދުވަހުގެ ޖަލްސާގައި އެކަން އިޢުލާންކުރައްވަމުން ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދު ވިދާޅުވީ އެމަގާމަށް އެދޭ ފަރާތްތަކުން މިހިނގާ ފެބްރުއަރީ މަހުގެ 22 ވަނަ ދުވަހުގެ މެންދުރު 12 ޖެހުމުގެ ކުރިން އެކަމުގެ ލިޔެކިޔުންތައް މަޖިލީހުގެ އިދާރާއަށް ހުށަހެޅުމަށެވެ.

ޕޮލިސް ބޯޑަކީ މިދިޔަ އަހަރު ރައްޔިތުންގެ މަޖިލީހުން ފާސްކުރި ދިވެހި ފުލުހުންގެ ޚިދުމަތުގެ ޤާނޫނުގެ ދަށުން އެކުލަވާލަންޖެހޭ ބޯޑެކެވެ. އެގޮތުން އެ ޤާނޫނުގެ 75 ވަނަ މާއްދާގައި ވަނީ ކޮމިޝަނަރާއި ޑެޕިޔުޓީ ކޮމިޝަނަރ ޢައްޔަނުކުރުމުގައި އެ މަގާމަށް އެކަށޭނެ ފަރާތެއް ވަޒަންކުރުމަށް ކުރަންޖެހޭ އެންމެހައި ކަންތައްތައް ކުރުމަށާއި ޤާނޫނުގެ ދަށުން ލަފާދޭންޖެހޭ ކަންކަމުގައި ވަޒީރަށާއި ޤާނޫނުގައި ލަފާދިނުމަށް ކަނޑައަޅާފައިވާ ފަރާތްތަކަށް ލަފާދިނުމަށް 7 މެމްބަރުންގެ މައްޗަށް އެކުލެވޭ ބޯޑެއް ރައީސުލްޖުމްހޫރިއްޔާ އެކުލަވާލަންވާނެ ކަމަށެވެ. އެބޯޑުގައި ހިމެނެނީ:

- ރައީސުލްޖުމްހޫރިއްޔާ ޢައްޔަނުކުރާ 2 މެމްބަރުން

- ފަންނީ ދާއިރާއަކުން ތަޢުލީމާއި ތަޖުރިބާ ލިބިފައިވާ 3 މެމްބަރުން

- އާންމުކޮށް ހުޅުވާލައިގެން އާންމު ރައްޔިތުންގެ ތެރެއިން ކުރިމަތިލާ 2 މެމްބަރުން

މިބޯޑަށް ރައީސުލްޖުމްހޫރިއްޔާ ޢައްޔަނުކުރައްވާ 2 މެމްބަރުން ޢައްޔަނުކުރައްވާނީ ވަޒީރުންގެ ލަފާގެ މަތިންނެވެ. އަދި އާންމުކޮށް ހުޅުވާލައިގެން އާންމުންގެ ތެރެއިން ކުރިމަތިލާ 2 މެމްބަރުން ޢައްޔަނުކުރާނީ މަޖިލީހުގެ ޖަލްސާއެއްގައި ހާޒިރުވެ ވޯޓުގައި ބައިވެރިވާ މެމްބަރުންގެ އަޣްލަބިއްޔަތުން ފާސްކުރާ މީހުންނެވެ. އެމަގާމަށް މެމްބަރުން ޢައްޔަނުކުރާނީ ރައީސުލްޖުމްހޫރިއްޔާއެވެ.

މިއީ 4 އަހަރު ދުވަހަށް ޢައްޔަނުކުރާ ބޯޑެކެވެ.