ފުލުހުންގެ މުއައްސަސާ އިޞްލާޙުކުރުމަށް ކުރަމުންދާ މަސައްކަތްތަކުގެ ދަށުން މިހާރު ލިބިވަޑައިގަންނަވާ އެންމެ ބޮޑު އުފަލާއި ހިތްހަމަޖެހުމަކީ އެމަސައްކަތުގެ އެންމެ ފަހު ތުންފަތުގައި ތިބުމުގެ ވަގުތަށް ހުއްޓޭކަން ކަމަށް ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދު ވިދާޅުވެއްޖެއެވެ.
ރައްޔިތުންގެ މަޖިލީހުގެ ހޯމަ ދުވަހުގެ ޖަލްސާގައި ދިވެހި ފުލުހުންގެ ޚިދުމަތުގެ ބިލްގައިވާ ޕޮލިސް ބޯޑަށް އާންމުންގެ ތެރެއިން ޢައްޔަނުކުރަންޖެހޭ ދެ މެމްބަރުން ޢައްޔަނުކުރުމަށްޓަކައި އެކަމަށް ކުރިމަތިލުމުގެ ފުރުޞަތު ހުޅުވާލައްވަމުން ވާހަކަދައްކަވަމުން ރައީސް ނަޝީދު ވަނީ މީގެ 9 އަހަރުން ކުރިން އެމަނިކުފާނުގެ ވެރިކަން ވެއްޓި ހިނގާދިޔަ ކަންތައްތަކަށް ކޮންމެވެސް ވަރަކަށް އަލިއަޅުވާލައްވައި ވާހަކަދައްކަވާފައެވެ. އެގޮތުން ރައީސް ނަޝީދު ވިދާޅުވީ އެކަން އާންމުކޮށް އަންގާ އިޢުލާންކުރަނީ ދިވެހި ފުލުހުން ޖަޒުބާތުގައި ކަމަށް ވިދާޅުވެ ނުކުންނަވާ ރާއްޖޭގެ އެތައް ރައްޔިތުންނަކަށް ވަރަށް ބޮޑެތި އަނިޔާ ދިންތާ 9 އަހަރު ވެގެންދިޔަ ދުވަހު ކަމަށެވެ.
ރައީސް ނަޝީދު ވިދާޅުވީ އެއަނިޔާގައި ގެއްލުން ލިބުނު އެތައް ބޭފުޅެއްނެއް މިހާރު ތިއްބެވީ ދައުލަތުގެ މަތީ މަގާމުތަކުގައި، ވުޒާރާތައް ހިންގެވުމަށާއި ޤާނޫނު ހަދާ މަޖިލީހުގައި ކަމަށެވެ. އަދި ފުލުހުންގެ ޤާނޫނު އިޞްލާޙުކުރުމުގެ މަސައްކަތް މަޖިލީހުން ކުރީ އެސަބަބަށްޓަކައި ކަމަށް ރައީސް ނަޝީދު ވިދާޅުވިއެވެ.
ރައްޔިތުންގެ މަޖިލީހުގެ އަޣްލަބިއްޔަތު ރައްޔިތުން ރީނދޫ ކުލައަށް ދިނީ އެބަދަލު ގެނައުމަށް ރައްޔިތުން އެދޭތީކަމަށް ރައީސް ނަޝީދު ވިދާޅުވިއެވެ.
އިރާދަކުރެއްވިއްޔާ ފުލުހުންގެ ބޯޑަށް ރައްޔިތުންގެ މަޖިލީހުން ޢައްޔަނުކުރާނީ ބަޣާވާތުގެ އަމަލުތައް، މިޔުޓިނީގެ މަސައްކަތްތައް ހިންގި މީހުންނާ ގުޅޭގޮތުން ފިޔަވަޅު އެޅި އަދި ހަމައެއާއެކު ފުލުހުންގެ މަސައްކަތަކީ ޕްރޮފެޝަނަލް، ފަންނީ ރާއްޖޭގެ ތަރައްޤީއަށް ދިވެހިންގެ އާންމު ހާލަތަށް ދިވެހިންގެ މަސްލަޙަތަށް ދިވެހިންގެ ކުރިއެރުމަށް އޮތް ދިވެހިން ލޯބިވާ ދިވެހިން އިޙުތިރާމްކުރާ ޚިދުމަތަކަށް އެ ޚިދުމަތް ވެގެންދިޔުންރައީސް މުހައްމަދު ނަޝީދު/ ރައްޔިތުންގެ މަޖިލީހުގެ ރައީސް
ރައީސް ނަޝީދު މިމޭރުމުން ޖަލްސާގައި ވާހަކަ ދައްކަވާފައިވާއިރު 7 ފެބްރުއަރީގައި ބަޣާވާތަކުން ރައީސް ނަޝީދުގެ ވެރިކަން ބަދަލުވި ދުވަހުގެ ހަނދާންތައް އެމަނިކުފާނު ވަނީ ޅެން ބައިތަކުން އައު ކުރައްވާފައެވެ. 7 ފެބްރުއަރީ ގައި އެމަނިކުފާނުގެ ވެރިކަން ދިވެހި ފުލުހުންނާއި ސިފައިން ނިކުމެ ފުރޮޅާލިތާ 9 އަހަރު ފުރުނު ދުވަހާ ދިމާކޮށް ރައީސް ނަޝީދު ވަނީ ޅެން ބައިތެއް ޓްވީޓް ކުރައްވާފައެވެ.
" ހަނދާންތައް ހިތުގައި ވިކަމުން ގެނުވަނީ ފިލުވޭ ތަދެއް ނޫނޭ،
އަދާ ހަމައަށް މި ޙާލަތު ގެނައުމީ ކުޑަ ކުޑަ ކުށެއް ނޫނޭ،
ޒަމާންތަކަކަށް ވި ޤުރުބާނީ ފަނާވެވި ޖިސްމު އިންސާނީ،
އަމާންކަން ނެއްޓި އުދުވާނީ މައާފް ކުރާ ވަރެއް ނޫނޭ"
7 ފެބްރުއަރީގައި ރައީސް ނަޝީދުގެ ވެރިކަން ބަދަލުވިގޮތް ބެލުމަށް އުފެއްދި ކޮމިޝަނުން އެ މައްސަލަ ތަހުޤީޤުކޮށް، ތަންފީޒުކުރަންޖެހޭ ކަންކަން ބަޔާން ކޮށްފައިވާއިރު، ކޯނީ ރިޕޯޓްގައި ބަޔާންކޮށްފައިވާ ފަރާތްތަކާމެދު ފިޔަވަޅުއަޅާފައި ނުވުމުން ރައީސް ނަޝީދު ވަނީ މީގެ ކުރިންވެސް ކަންބޮޑުވުން ފާޅުކުރައްވާފައެވެ.
އެގޮތުން 7 ފެބްރުއަރީގައި ފުލުހުން ނުކުމެ ހިންގި ބަޣާވަތް އެއީ ނުހިނގާ ކަމެއްގެ ގޮތުގައި ދެކި ފުލުހުންގެ ޤާނޫނަށް އިސްލާޙު ގެންނަން ވިސްނައިގެން ނުވާނެ ކަމަށެވެ. އަދި އެއީ ޒަމާންތަކެއް ވަންދެން ރާއްޖެއަށް ދެވޭނެ ބޮޑު ގެއްލުމެއްގެ ގޮތުގައި ރައީސް ނަޝީދު ސިފަ ކުރެއްވިއެވެ.
