60 އަހަރުން މަތީގެ މީހުންނަށް ސިނޮފަރމް ވެކްސިނެއް ނުޖެހޭ
މިވެކްސިން އުމުރުން 60 އަހަރުން މަތީގެ މީހުންނަށް ދިނުމުގެ ހުއްދަ ދީފައި ނުވޭ
ޗައިނާގެ ސިނޮފަރމް އިން ވަނީ ކޮވިޑް-19 އަށް ދެ ވެކްސިނެއް އުފައްދާފައި
ޗައިނާގެ ސިނޮފަރމް ކުންފުނީގެ ބެއިޖިން އިންސްޓިޓިއުޓް އޮފް ބަޔޮލޮޖިކަލް ޕްރޮޑަކްޓްސް އިން ކޮވިޑް-19 އަށް އުފައްދާފައިވާ ވެކްސިން އުމުރުން 60 އަހަރުން މަތީގެ މީހުންނަށް ނުޖެހޭ ކަމަށް ޕާކިސްތާނުން ބުނެފިއެވެ.
ސިނޮފަރމްގެ ވެކްސިނާއިއެކު ބުދަ ދުވަހު ޕާކިސްތާނުގައި ކޮވިޑް-19އަށް ވެކްސިން ޖަހަން ފަށާފައިވާއިރު، ބުރާސްފަތި ދުވަހު އެގައުމުން ވަނީ ސިނޮފަރމްގެ ވެކްސިން ޖަހަން ރަނގަޅީ އުމުރުން 18 އަހަރާއި 60 އަހަރާއި ދެމެދުގެ މީހުންނަށް ކަމަށް ބުނެފައެވެ.
ޕާކިސްތާނުގެ ބޮޑުވަޒީރުގެ ސްޕެޝަލް އެސިސްޓެންޓް އޮން ހެލްތު ޑރ. ފައިސަލް ސުލްތާން ވިދާޅުވީ މިހާތަނަށް އައިއިރު ވެކްސިނަށް ހުއްދަދިން އެކްސްޕަރޓް ކޮމިޓީން މިވެކްސިން އުމުރުން 60 އަހަރުން މަތީގެ މީހުންނަށް ދިނުމުގެ ހުއްދަ ދީފައި ނުވާކަމަށެވެ. އަދި ކުރިއަށް އޮތް ދުވަސްތަކުގެ ތެރޭގައި ސިފޮރަމްގެ ވެކްސިން 60 އަހަރުން މަތީގެ މީހުންނަށް ބޭނުންކުރެވޭނެކަން ނުވަތަ ނޫންކަން ހާމަކުރާނެ ކަމަށް ޑރ. ފައިސަލް ވިދާޅުވިއެވެ.
ޗައިނާއިން ޕާކިސްތާނަށް ސިނޮފަރމް ވެކްސިންގެ ބައި މިލިއަން ޑޯޒް ހަދިޔާކޮށްފައިވާއިރު، އެގައުމުގައި ވެކްސިން ޖަހަން ފަށާފައި ވަނީ ހަތަރު ޕްރޮވިންސްގައި އެއްފަހަރާއެވެ.
ޕާކިސްތާނުގެ ބޮޑުވަޒީރު އިމްރާން ހާން ވަނީ އެގައުމުގައި ވެކްސިން ދޭއިރު، އެންމެ ފުރަތަމަ އިސްކަން ދޭނީ ފްރަންޓްލައިންގައި މަސައްކަތްކުރާ މީހުންނާއި އުމުރުން ދުވަސްވީ މީހުންނަށް ކަމަށްވިދާޅުވެފައެވެ. އެހެން ނަމަވެސް ސިނޮފަރމް ވެކްސިނަކީ އުމުރުނެ 60 އަހަރުން މަތީގެ މީހުންނަށް ދިނުމުގެ ހުއްދަ ނެތް ވެކްސިނެއް ކަމުން އެހެން ވެކްސިނަކަށް އެގައުމުން ޖެހޭނީ މަޑުކުރާށެވެ.
މިހާތަނަށް އައިއިރު، ޕާކިސްތާނުން ވަނީ ސިނޮފަރމްގެ ވެކްސިންގެ އިތުރުން އެސްޓްރަޒެނެކާ-އޮކްސްފޯޑް ޔުނިވާސިޓީގެ ވެކްސިނާއި ރަޝިއާގެ ސްޕަޓްނިކްވީ ބޭނުން ކުރުމުގެ ހުއްދަދީފައެވެ. އަދި ކޮވެކްސް ފެސިލިޓީގެ ދަށުން އެގައުމަށް އެސްޓްރަޒެނެކާ ވެކްސިންގެ 17 މިލިއަން ޑޯޒް މިއަހަރުގެ ކުރީ ކޮޅު ލިބިގެންދާނެ ކަމަށް ޕާކިސްތާނުން ބުނެއެވެ.
