ބިލަބޮންގ އިންޓަނޭޝަނަލް ސްކޫލްގެ ޓީޗަރެއް ކޮވިޑް19 އަށް ޕޮޒިޓިވްވެ، ސެކަންޑްރީ ގްރޭޑްތަކުގެ ކިޔެވުން މެދުކަނޑާލައިފިއެވެ. މި ޓީޗަރު ޕޮޒިޓިވްވިކަން އެނގުނީ ޓީޗަރު ކިޔަވައިދިން ކްލާހުގެ ކިޔެވުން އާންމު ޙާލަތައް ރުޖޫޢަކުރުމުގެ ކުރިން ރައްކާތެރިކަމުގެ ފިޔަވަޅެއްގެ ގޮތުން އެޅި ފިޔަވަޅެއްގެ ދަށުން ނެގި ސާމްޕަލްއަކުންނެވެ.

ބިލަބޮންގްގެ ޓީޗަރެއް ކޮވިޑް19 އަށް ޕޮޒިޓިވްވެފައިވާކަން ހާމަކުރައްވައި ރާއްޖެ އެމްވީއަށް ދެއްވި ބަސްތީގަތުމެއްގައި ބިލަބޮންގ އިންޓަނޭޝަނަލް ސްކޫލްގެ ވައިސް ޕްރިންސިޕަލް އިސްމާއިލް ޝާނިމް ވިދާޅުވީ، މިގޮތަށް ސާމްޕަލްތަކެއް ނަގަން ނިންމީ ޕޮޒިޓިވްވި ޓީޗަރު ކިޔަވައިދޭ ކްލާހެއްގެ ދަރިވަރަކު ބައްޔަށް ޕޮޒިޓިވްވެ އޮންލައިން ކްލާސްތައް ކުރިއަށްގެންދިއުމަށްފަހު ކިޔެވުން އާންމު ޙާލަތައް ރުޖޫޢަކުރުމަށް ނެގި ސާމްޕަލްއަކުން ކަމަށެވެ.

ދަރިވަރު ޕޮޒިޓިވްވެފައިވަނީ ސްކޫލް މާޙައުލުން ނޫންކަމަށާއި، ގޭތެރެއިން ޑައިރެކްޓް ކޮންޓެކްޓްވެގެން ކަމަށް އިސްމާއިލް ޝާނިމް ވިދާޅުވިއެވެ. މި ކުއްޖާ ޕޮޒިޓިވްވިފަހުން ވެސް އަދި ޓީޗަރު ޕޮޒިޓިވްވުމާއެކު ވެސް ސީދާ ދިމާވެފައިވާމީހުން ނުވަތަ ޕްރައިމަރީ ކޮންޓެކްޓުންގެ ގޮތުގައި ފާހަގަވެފައިވާ ދަރިވަރުންނާއި މުވައްޒަފުން ބައްޔަށް ޓެސްޓްކޮށްފައިވާކަމަށް އިސްމާއިލް ޝާނިމް ވިދާޅުވިއެވެ. ބިލަބޮންގްއިން ދަރިވަރުންނާއި މުއައްޒަފުންގެ ރައްކާތެރިކަން އަބަދުވެސް އިސްކުރާނެކަން ފާހަގަކުރައްވައި އިސްމާއިލް ޝާނިމް ވަނީ، މި ސަބަބައްޓަކައި ސެކަންޑްރީ ގްރޭޑްތަކުން ސްކޫލަށް ހާޒިރުވެ ކިޔެވުން ދެ ހަފުތާއަށް މެދުކަނޑާލަން ނިންމާފައިވާކަން ހާމަކޮށްފައެވެ.

މިއާއެކު ބިލަބޮންގ އިންޓަނޭޝަނަލް ސްކޫލްގެ ގްރޭޑް 8، 9 އަދި 10ގެ ކިޔެވުން ކުރިއަށް އޮތް ދެ ހަފުތާއަށް އޮންލައިންކޮށް ކުރިއަށްގެންދިއުމުގެ އިންތިޒާމު ވަނީ ހަމަޖައްސާފައެވެ. އިސްމާއިލް ޝާނިމް ވިދާޅުވީ ދެ ހަފުތާއަށްފަހު އަލުން ކިޔެވުން އާންމު ޙާލަތައް ރުޖޫޢަކުރާއިރު ދަރިވަރުންނާއި މުވައްޒަފުން ކޮވިޑަށް ޓެސްޓްކުރާނެ ކަމަށެވެ. ބިލަބޮންގް ސްކޫލްގެ ޓީޗަރެއް ކޮވިޑް19 އަށް ޕޮޒިޓިވްވެ، ސެކަންޑްރީ ގްރޭޑްތަކުގެ ސްކޫލް ބަންދުކޮށްފައިވީނަމަވެސް، އެ ސްކޫލްގެ ގްރޭޑް 1ން 7އާ ދޭތެރޭގެ ގްރޭޑްތަކުގެ ކިޔެވުން ގަވައިދުން ކުރިއަށްދާނެކަމަށް ޝާނިމް ވިދާޅުވިއެވެ.