ސިޔާސީ ވާހަކަ ދެއްކި ކަމަށް ބުނެ، ވަކިކުރި ދެ ޓީޗަރެއްގެ ވަޒީފާ އިޔާދަ ކުރަން އަމުރުކޮށްފި
5 މެއި 2019 | އާދީއްތަ 06:02މުސާރަ އާއި އިނާޔަތް ދިނުމަށް ވެސް އަމުރު ކުރި
ގއ. އަތޮޅު ތައުލީމީ މަރުކަޒުގެ ދަރިވަރުންނާ އެކު ޓީޗަރުންތަކެއް
ސިޔާސީ ވާހަކަތަކެއް ސްކޫލު ތެރޭގައި ދެއްކި ކަަމަށް ބުނެ، ސިވިލް ސާވިސް ކޮމިޝަން (ސީއެސްސީ)އިން ވަކިކުރި ތުހުމަތުތަކާ ގުޅިގެން ވަޒީފާއިން ވަކިކުރި ގއ. ވިލިނގިލީ ދެ ޓީޗަރެއްގެ ވަޒީފާ އިޔާދަކޮށް، ވަކިކުރި ތާރީހުން ފެށިގެން މުސާރަ އާއި އެހެނިހެން އިނާޔަތްތައް ދިނުމަށް ވަޒީފާއާ ބެހޭ ޓްރައިބިއުނަލުން އަމުރު ކޮށްފިއެވެ.
ތައުލީމީ ދާއިރާގައި 15 އަހަރަށް ވުރެ ގިނަ ދުވަސް ވަންދެން ހިދުމަތް ކުރަމުން ދަނިކޮށް، މިދިޔަ އަހަރުގެ ކުރީކޮޅު، ގއ. އަތޮޅު ތައުލީމީ މަރުކަޒުން ވަކިކުރީ ލީޑިންގ ޓީޗަރު ޒުލްފީނާ އަހުމަދާއި ޕްރައިމަރީ ޓީޗަރު ހިދާޔަތު އަހުމަދެވެ. ޒުލްފީނާއަކީ އެމްޑީޕީ މެޖޯރިޓީ އޮންނަ ވިލިނގިލީ ކައުންސިލްގެ ރައީސް، މުސްތަފާ މުހައްމަދުގެ އަނބިކަނބަލުންނެވެ. ހިދާޔަތުއަކީ އެ ކައުންސިލްގެ ކުރީގެ މެމްބަރު ފަތުހީ މޫސާގެ އަނބިކަނބަލުންނެވެ.
އެ ދެ ޓީޗަރުން ސްކޫލުގެ ވަޒީފާއިން ވަކިކުރީ ސްކޫލުން ކުރާ މަސައްކަތަކަށް އެއްބާރުލުން ނުދޭ ކަމަށާއި ސިޔާސީ ވާހަކަ ދައްކާ ކަަމަށް ބުނެ، ސަސްޕެންޝަންގައި ބޭތިއްބުމަށް ފަހުގައެވެ. އެ ދެ ޓީޗަރުން ސަސްޕެންޑްކުރީ މިދިޔަ އަހަރުގެ ޖެނުއަރީމަހުގައެވެ.
ވިލިނގިލީގައި ހުންނަ ގއ. އަތޮޅު ތައުލީމީ މަރުކަޒުން އެ ދެ ޓީޗަރުން ވަކިކުރި މައްސަލަ ބަލައިދިނުމަށް މިދިޔަ އަހަރުގެ އޮކްޓޯބަރު މަހު ޓްރައިބިއުނަލަށް ހުށަހެޅުމުން، މިދިޔަ މަހު އެ ޓްރައިބިއުނަލުން މައްސަލަ ނިންމި ގޮތުގެ ރިޕޯޓުގައި ބުނެފައި ވަނީ ވަޒީފާއިން ވަކިކޮށްފައި ވަނީ އެއްވެސް ނޯޓިސްއެއް ދިނުމަކާ ނުލައި ކަމަށާއި ވަޒީފާއާ ބެހޭ ގާނޫނާ ވެސް ހިލާފަށް ކަމަށެވެ.
އެހެންކަމުން އެ ދެ ޓީޗަރުންނަކީ ވަޒީފާއިން ވަކިވެފައިވާ މީހުންކަމުގައި ނުބެލުމަށާއި ވަޒީފާއިން ވަކިކުރި ތާރީހުން ފެށިގެން ލިބެންވާ މުސާރަ އާއި އިނާޔަތްތައް 14 ދުވަހުގެ ތެރޭގައި ދިނުމަށް ވަޒީފާއާ ބެހޭ ޓްރައިބިއުނަލުން ވަނީ އަމުރު ކޮށްފައެވެ.
ޓްރައިބިއުނަލުން އެ އަމުރު ނެރުނުތާ މިއަދަށް 19 ދުވަސްވީ އިރު ވެސް، އެ ދެ ޓީޗަރުންގެ ވަޒީފާ އިޔާދަކޮށް، ބަދަލު ވެސް ދީފައެއް ނުވެއެވެ.
